SEKARIA 12 - BUKUIT NE TILIL

Tun kimitu Juda

¹ Lautietab ng’olyotab Jehovah agobo Israel.

² Mwaei Jehovah, ne iitoi kipsengwetisiek, ak kolumei lumeiywotab ng’ony, ak koyaei tamirmirietab chi eng’ oritab chichoto, ko u ni kole: Ogeero, ayae Jerusalem koek kikombet ne bo terteriotet eng’ bik tugul che mi komoswekyik tugul, egu ko u noto eng’ Juda agine eng’ betusiek che kiyiemei Jerusalem.

³ Ak ayae Jerusalem eng’ betunoto koek koita ne nyigis ne iimi bik tugul; nyoru berutik che chang’ ichek che kanabi koyato: ak koyumjigei inendet bororiosiek tugul che bo ng’ony.

⁴ Mwaei Jehovah eng’ betunoto kole, Agochini mbartanyit age tugul kokwong’, ak abire iywek chinnyi ne lanyei: ak ayat konyekyuk ageer gotab Juda, ak abire koratet mbartanyit age tugul ne bo bororiosiek.

⁵ Ak komwa bounikab Juda eng’ mugulelwekwak kole, Bik che menyei Jerusalem ko kimnatennyu eng’ Jehovah ne bo lugosiek, Kamuktaindenywa.

⁶ Ayae eng’ betunoto bounikab Juda koigei rokyietab mat ne mi kwenik, ak koigei kegenget ne mi kwenutab ratutikab bek; ak koges bik tugul che mi komoswek tugul che mi eutab tai ak che mi eutab katam: ak komeny Jerusalem kogeny komostanyi, noto ko Jerusalem.

⁷ Sib kosoru Jehovah emaisiekab Juda, si maeet torornatetab gotab Daudi ak torornatetab bik che menyei Jerusalem, kosiir Juda.

⁸ Ribei Jehovah eng’ betunoto bik che menyei Jerusalem; ak koigei ne nyalulat eng’ ichek Daudi eng’ betunoto; ak koigei gotab Daudi Kamuktaindet, ko u malaikaiyatab Jehovah ne mi tainywa.

⁹ Ak acheng’ abar eng’ betunoto bororiosiek tugul che ibokyin Jerusalem.

Rirek eng’ Jerusalem

¹⁰ Ak arong’ji tamirmirietab mieindo ak ne bo somet gotab Daudi, ak bik che menyei Jerusalem, ak konyala ichek che kitoora: ak kotee agobo inendet ko u ye iteei chi agobo werinnyi ne kigii inegeik ak konyo ng’wanindo agobo inendet, ko u inendet ne mi eng’ ng’wanindo agobo taitanyi.

¹¹ Biitu eng’ betunoto kateeiyet ne o eng’ Jerusalem, ne u kateeiyetab Hadadrimon eng’ atebwetab Megidon.

¹² Ak kote emet, iteei oret age tugul inegei; iteeitos che bo gotab Daudi ichegei, ak koteeiyo osotikwak ichegei; iteeitos che bo gotab Natan ichegei, ak koteeiyo osotikwak ichegei;

¹³ iteeitos che bo gotab Lawi ichegei, ak koteeiyo osotikwak ichegei; iteeitos che bo gotab Simei ichegei, ak koteeiyo osotikwak ichegei;

¹⁴ iteeitos ortinwek tugul che kang’et, iteei oret age tugul inegei, ak koteeiyo osotikwak ichegei.