SEKARIA 11 - BUKUIT NE TILIL

Mestowek che yaachen che bo Israel

¹ Yat kurgotiguk, ee Lebanon, si kobeel mat taragoniguk.

² Waach, ee biribirioni, amu kagobut tarakwet, amu kageng’em che kororon: owaach, ee ketikab Bason, amu kagolul osnet ne kim.

³ Kutitab mestowek che waachei! Amu kageng’em torornatenywa; kutitab ng’etunyik che neran che borisendos! Amu kageng’em menotetab Jordan.

⁴ Kamwa Jehovah Kamuktaindennyu ko u ni kole: Iyage akwetab kechirek che kienyei;

⁵ che enyei bikab kobo, ak kolen, Magitinye tengek; ak komwaei ichek che aldoi, kole, Iberurot Jehovah, amu a magorio: ama rire mestowekwak ichek.

⁶ Amu ma arire kogeny bik che menyei emoni, mwaei Jehovah: ago keero, agoitoi chi tugul kwo eutab chitab kokwennyi, ak agoite kwo eutab laitoriandennyi: ak kobar emet, amasoru ichek eng’ eunywa.

⁷ Kiayage anyun akwetab kechirek che kienyei, kechirek che nyerotin iman. Kiaib anyun kirokwek aeng’; kiaguure age Mieindo, aguure age Ratutik; ak kiayage akwet.

⁸ Ak kiang’em mestowek somok eng’ arawet agenge; amu kigong’et sobondanyu agobo ichek, ak kowecha kogeny sobonwekwak.

⁹ Kiamwa anyun ale, Maayagok: ingome ne meei; ak ingebar ne kibarei; ak ingoam age tugul eng’ che kang’et banyekab age.

¹⁰ Ak kianam kiroktanyu Mieindo, ak aeb apcheune aeng’, si kobiit abut kayomisennyu ne kigiyomisge koboto bororiosiek tugul.

¹¹ Ak kibutok eng’ betunoto: ak kinai anyun che nyerotin che bo akwetab kechirek, che kiepcha it, kole ki ng’olyotab Jehovah noto.

¹² Ak kialenji ichek, Ngot obwat ole mie, ogona melektanyu; ak ngo ma u noto, ko mat ogona. Kogerua anyun fedaisiek sosom koek melektanyu.

¹³ Ak kilenja Jehovah, Wirji cheptereniot, noto ko alyet ne mie ne kigamanwa. Kiaib anyun fedaisiechoto sosom, ak awirji cheptereniot eng’ gotab Jehovah.

¹⁴ Yeityo aeb apcheune aeng’ kiroktanyu age, noto Ratutik, si kobiit ang’eti tupchondit ne ting’egei Juda ak Israel.

¹⁵ Ak kilenja Jehovah, Nam kogeny tugukab mestowot ne berber.

¹⁶ Amu, keero, ang’eeti mestowot eng’ emoni, ne marutochin che kigeon, ama cheng’ei che kiyesta, anan konya ne kigoil; ama baei ne chamegei, ago amei banyekab che neriotin, ak kobetabet siokwak.

¹⁷ Bwa mestowot ne matilei kiy ne bagaktoi akwet! Ing’ururi rotwetab chok eunnyi ak kondanyi ne bo tai: yaamei eunnyi, ak kogor kondanyi ne bo tai.