SEKARIA 10 - BUKUIT NE TILIL

Tun iweegu Jehovah bikyik che kigoiyesta

¹ Osom Jehovah ropta eng’ betusiek che bo ropta ne bo let, Jehovah ne yaei kalyelosiek; si kogochi ichek ropta ne inesi, ak kogochi chi age tugul suswek eng’ emet.

² Amu kigomwa terapik tangoita, ak kigogeer bik che ng’orsei lembechek, ak kigomwa ichek karuotitaosiek che bo lembech, igoigoisiei buch; bendoti ko u kechirek, kinyalili amu matinyei mestowot.

³ Anerekyini mestowek, ak abire kwesik: amu karutochi Jehovah ne bo lugosiek akwennyi ne bo kechirek, gotab Juda, ak koyai ichek koigei mbartanyinnyi ne mie eng’ boriet.

⁴ Mong’une inendet koita ne bo luita, mong’une inendet kipchumariat, mong’une inendet kwangetab boriet, mong’une inendet age tugul ne usisiei kibagenge.

⁵ Ak koigei bik che nyigonen, che tiechei bunikwak eng’ ng’atatekab ortinwek eng’ boriet; ak kobargei, amu mi Jehovah koboto ichek: ak kotoptobenso bik che lanyei mbartanyisiek.

⁶ Ak agimit gotab Juda, ak asoru gotab Josep, ak amutu ichek kogeny, amu arire ichek; ak koigei ye kima amete ichek: amu a Jehovah Kamuktaindenywa, ak agas ichek.

⁷ Ak koigei ichek che bo Epraim chito ne nyigan, ak koboiboitu mugulelwekwak ko u che kaeei divaik: ee, keerei lagokwok noto, ak koboiboitu; igasegei mugulelwekwak eng’ Jehovah.

⁸ Aititenjini ichek, ak ayum, amu kiatiach ichek: ak kotesogis ko u ye kiga kotesogis.

⁹ Ak agol ichek eng’ kwenutab bororiosiek; ak kobwata komi emotinwek che looen: ak komeng’is koboto lagokwak, ak koweeigei.

¹⁰ Amutu ichek kogeny komong’une emetab Misri, ak ayum ichek komong’ eng’ Asuria; ak amutu ichek kobwa emetab Gilead ak Lebanon; ama biitu ole yamei ichek.

¹¹ Ak beek che mildogei eng’ nyanjet, ak kotenyo rirosiek tugul che bo Nael: ak kiming’in menotetab Asuria, ak koistogei siaritab Misri.

¹² Ak agimit ichek eng’ Jehovah; ak kobendate kainennyi, mwaei Jehovah.