SEKARIA 1 - BUKUIT NE TILIL

Keretab kong’ene bo Jehovah eng’ bik

¹ Kinyonji ng’olyotab Jehovah Sekaria weritab Berekia weritab Ido, maotiot, eng’ arawetab sisiit eng’ kenyit ne bo aeng’ ne bo Darius, kolenji,

² Kigonerekyi Jehovah mising’ kwanisiekwok.

³ Mwachi anyun ichek ilenji, Mwaei Jehovah ne bo lugosiek ko u ni kole: Oweekyage, mwaei Jehovah ne bo lugosiek, si aweekyoge, mwaei Jehovah ne bo lugosiek.

⁴ Amoige kwanisiekwok, che kiga ititenji maotik che bo tai, kolenji, Mwaei Jehovah ne bo lugosiek ko u ni kole, Oweege anyun nguno omete ortinwekwok che yaach, ak boisionikwok che yaach: ago kima kas ichek, anan koepcha it, mwaei Jehovah.

⁵ Mi ano kwanisiekwok? Ak maotik, tos soptos agoi?

⁶ Ago tos kima ityi kwanisiekwok ng’alekyuk ak ng’atutikyuk che kiang’at otwogikyuk maotik? Ak kiweek ichek ak kole, Kigoyaiywech Jehovah ne bo lugosiek ko u ye kigaibwat kole yaiywech ko u ortinwekyok, ak ko u boisionikyok.

Ng’ang’utietab Sekaria agobo mbartanyisiek

⁷ Kinyonji ng’olyotab Jehovah Sekaria weritab Berekia, weritab Ido, maotiot, eng’ betutab tiptem ak ang’wan ne bo arawetab taman ak agenge, ne arawetab Sebat, eng’ kenyitab aeng’ ne bo Darius, kolenji,

⁸ Kiageer kemoi, ak ogeero, chito ne kilanyei mbartanyit ne birir ak kotonone kwenutab ketik che kiguure myrtle eng’ ole bo uruet; ak kimi batennyi mbartanyisiek alage, che biriren, che muruonen, ak che leelachen.

⁹ Kiale anyun, Ee kiptaiyandennyu, nee chu? Ak kilenja malaikaiyat ne king’alalwa, Ta aborun kit ne bo chuto.

¹⁰ Ak kiwol chito ne kitonone kwenutab ketichato kole, Chuto ko ichek che kiiyokto Jehovah kobunot komoswek tugul che bo ng’ony.

¹¹ Ak kiwolji ichek malaikyatab Jehovah ne kitonone kwenutab ketichato kolenji, Kogebunote komoswek tugul che bo ng’ony, ak keero, tebyei ng’ony tugul kosisei, ak komuunyi.

Ng’olyotab Kagaigaet ne kiipchin Sion

¹² Kiwol anyun malaikaiyatab Jehovah, kole, Ee Jehovah ne bo lugosiek, ta iesioi kot kotianit si irire Jerusalem, ak nganasokab Juda, che kiinerekyi kenyisiechu tamanwogik tisab?

¹³ Ak kiwolji Jehovah malaikaiyandanato king’alalwa eng’ ng’alek che miach, ng’alek che bo kagaigaet.

¹⁴ Kilenja anyun malaikaiyandanato king’alalwa, Ititenji inye ilenji, Mwaei Jehovah ne bo lugosiek kole: Ama ng’etkong’ agobo Jerusalem ak agobo Sion eng’ ng’etkonda ne o.

¹⁵ Ak anerechi mising’ agobo bororiosiek che imuunyi: amu ye kita anerechi kitigin kityo, kotes icheget nyalilda.

¹⁶ Mwaei anyun Jehovah ko u ni kole: Kaaweekyige Jerusalem arire; kiteechei gonnyu nganasanato, mwaei Jehovah ne bo lugosiek, ak kechuul borowet ne kikwaise, eng’ Jerusalem.

¹⁷ Ititenji kogeny ilenji, Mwaei Jehovah ne bo lugosiek ko u ni kole: Kibaroi nganasokyuk eng’ kaberuret; ak ta kogoigoi Jehovah Sion ak ta koleweni Jerusalem.

Ng’ang’utiet agobo kuinoik ak kitong’ik

¹⁸ Ak kiayot met, ak ageer, ogeero, kuinoik ang’wan.

¹⁹ Ak kiateebe malaikaiyat ne king’alalwa alenji, Nee chu? Ak kiwolwa kolenja, Chu ko kuinoik che kiiyesta Juda, Israel, ak Jerusalem.

²⁰ Ak kiiborua Jehovah kitong’ik ang’wan.

²¹ Kiamwa anyun ale, Bwanei chuto koyaei nee? Ak kimwa kole, Chu ko kuinoik che kiiyesta Juda, kot ko mata kobiit chi ne yotei met: ago kabwa chuto si kobiit komu ichek, ak kotimda kuinoikab bororiosiek, che kinamji barak kuinenywa koborie emetab Juda koiyesta.