RUTH 4 - BUKUIT NE TILIL

Kotunegei Boas ak Ruth

¹ Ak kitogosta Boas kwo ormarichetab nganaset, ak koteb ng’ony eng’ yoto: ak ogeero, kinyo kobun yoto chichoto bo oret ne negit noto kimwaei Boas; inendet ne kilenji, Kale-i, nyo yu, ibuur eng’ yu. Kiwa anyun ak kobuur.

² Ak kiguur Boas boisiek taman che bo nganaset, ak kolenji, Obuur eng’ yu. Kobuur anyun.

³ Yeityo kolenji Boas chitab oret ne negit, Aldoi Naomi, ne kigoweek eng’ emetab Moab, koret ne ki bo tupchennyo Elimelek:

⁴ ak koabwat amwaun ale, Ial koronoto eng’ taitab bichu ibuuri eng’ yu, ak eng’ taitab boisiekab bikyuk. Ngot imach itiach, itiach: ago ngot ko memach itiach, imwawa, anai: amu mami age ne itiachi kobatenen; ak arubin. Ak kile, Atiachi.

⁵ Yeityo kole Boas, Eng’ betut ne iale koronoto eng’ eutab Naomi, ko kanyol ial eng’ Ruth agine Jemoabindet, osotiotab ne kigome, si kobiit ilaalji mat ne kigome eng’ borotennyi.

⁶ Ak kile chichoto bo oret ne negit, Mamuchi atiakyige, si mang’em borotennyu: ib imandab katiaget ne kata atiachi kobunjin; amu mamuchi atiach.

⁷ Ki u ni biteet ne kimi Israel agobo katiaget ak agobo walet, si kigimit tuguk tugul; kiicheru chito kweiyondennyi, ak kogochi chitab kokwennyi: ak ki biteetab baornatet eng’ Israel noto.

⁸ Kolenji anyun Boas chichoto bo oret ne negit, Aljige. Ak kiicher kweiyondennyi.

⁹ Ak kilenji Boas boisiek, ak bik tugul, O baorinik ra, ole kaal tuguk tugul che ki bo Elimelek, ak tuguk tugul che ki bo Kilion ak che ki bo Malon, eng’ eutab Naomi.

¹⁰ Kogeny, ko kaal Ruth Chemoabindet, ne ki osotiotab Malon, koek osotiondennyu, si kobiit alaalji mat eng’ bortennyi inendet ne kime, si mabet kainetab inendet ne kime eng’ tupchosiekyik, ak eng’ kurgetab oldanyi: o baorinik rani.

¹¹ Kile anyun bik tugul che kimi ormarichet, koboto boisiek, Ki baorinik. Ingoyai Jehovah kwondo ne kanyo gong’ung’ koigei Rael ak Lea, choto aeng’ che kiteech gotab Israel: ak iegu ne nyolu eng’ Eprata, ak iegu ne toogunot eng’ Bet-lehem;

¹² ak ingogergeit gong’ung’ ak gotab Peres, ne kisikyi Tamar Juda, eng’ keswek che tun konin Jehovah eng’ kwonyi.

Sigetab lakwenywa

¹³ Kiimut anyun Boas Ruth, ak kiek osotiondennyi; ak kituiyogei ak inendet, ak kiigochi Jehovah komanach, ak kisich werit.

¹⁴ Ak kilenji gotab kor Naomi, Iberurot Jehovah, ne ma bagakten eng’ betuni ametinye chitab oret ne negit, ak ingotook kainennyi eng’ Israel.

¹⁵ Ak egu inendet ne weegun sobondang’ung’, ak koek ne bain eng’ osindang’ung’: amu kasich lakwet, osotiotab wering’ung’, ne chamin, ne kaigai eng’ inye kosiir werik tisab.

¹⁶ Ak kinam Naomi lakwet ak kotiny eng’ tegennyi, ak kiek cheblakwetab lakwanato.

¹⁷ Ak kitochi kainet kwonyikab kokwet che bo Naomi, kole, Kogesikyi Naomi werit, ak kiguure kainennyi Obed: inendet kwandab Jesii, kwandab Daudi.

¹⁸ Chu anyun ko ortinwekab Peres: kisich Peres Hesron;

¹⁹ ak kisich Hesron Ram, ak kisich Ram Aminadab;

²⁰ ak kisich Aminadab Nason, ak kisich Nason Salmon;

²¹ ak kisich Salmon Boas, ak kisich Boas Obed;

²² ak kisich Obed Jesii, ak kisich Jesi Daudi.