RUTH 3 - BUKUIT NE TILIL

Komwechin Naomi Boas

¹ Ak kilenji Naomi korgennyi bo yugoi, Cheptanyu, tos macheng’un ane ole imuung’e, si komieit eng’ inye?

² Tos ma bo orennyo Boas, ne kiomi ak tibikyik? Keero, iruri sairik koi kemoi eng’ ruanyut ne kiborse.

³ Iunge anyun, ak iilge, ak ilaach ngoroiguk, yeityo iwe oloto mi ruanyut: ago amat iborjige chichoto, kot koges amisiet ak eeiset.

⁴ Ak ye kagoru, igeer ye karu, iwe yoto anyun, ak ing’any kelyekyik, ak iru yoto; si komwaun kit ne kanyol iyai.

⁵ Ak kilenji Ruth Naomi, Ayae tuguchoto tugul kemwa.

⁶ Kichortagei anyun kwo ole mi ruanyut, kwo koyai tugul che kamwachi korgennyi bo yugoi.

⁷ Ak ye kingo kagoamis Boas ak koee, ak kobaibait muguleldanyi, kwo koru ye boch karurugutietab bek: ak kinyo Ruth mutyo, ak kong’any kelyekyik, ak koru yoto.

⁸ Ak kingoek kemoi kwen kosiir chichoto eng’ ruondo, ak koweeigei: ak ogeero, kiruei kwony eng’ kelyekyik.

⁹ Ak kile, I ng’o? Ak kiwol kole, A Ruth cheptang’ung’ ne otwoget: tuge cheptang’ung’ ne otwoget ngorieng’ung’ amu i chitab oret ne negit.

¹⁰ Ak kile chichoto, Ingoberurin Jehovah, cheptanyu: kaiboru mieindo ne o eng’ let kosiir eng’ taunet, amu ma isub murenik che mengech, ngo che bonon anan ngo che magore.

¹¹ Noto anyun, cheptanyu, meiywei; ayaun tugul choto kemwa: amu ingen nganaset tugul ne bo bikyuk kole, i kwondo ne tinyei atebet ne nyolunot.

¹² Ak iman a chitab oret ne negit: ago mitei chito age ne ta ko negit kosiira.

¹³ Tebi kemouni, ak ngot koyaun chichoto mutai karon noto nyolunot eng’ chitab oret, ko mie noto; ko ingoyai noto nyolunot eng’ chitab oret: ago ngot ko mayaun noto nyolunot eng’ chitab oret, ayai anyun noto nyolunot eng’ chitab oret, ko u ye sobei Jehovah; ru anyun agoi koeech.

¹⁴ Ak kiru eng’ kelyekyik agoi koeech; king’eet kotomo kinyit chi. Amu kile Boas, Amengonai chi kole konyo kwonyoto ruanyut.

¹⁵ Ak kilenji, Ibu ngoriono ilaachi, ak itaach; ak kitaach ngorionoto: ak kigerji kerutik lo che bo sairik, ak kogesenji: yeityo kwo Boas nganaset.

¹⁶ Ak kingoit Ruth ole mi korgennyi bo yugoi, komwa kole, I ng’o, cheptanyu? Ak kimwachi inendet tuguk tugul che koyachi chichoto.

¹⁷ Ak kile, Kagona kerutichu lo bo sairik; amu kile, Amewe buch ole mi korgeng’ung’ bo yugoi.

¹⁸ Kile anyun, Tebi cheptanyu, kot inai kie egu ng’alechato: amu maimuunyi chichoto, kot koyai kioto rani kosulda.