RUTH 2 - BUKUIT NE TILIL

Koturisioti Ruth

¹ Ak kitinyei Naomi chitab oretab manong’otiondennyi, chito ne o ne magorio, ne bo oretab Elimelek; ak kainennyi ko ki Boas.

² Ak kilenji Ruth Jemoabindet Naomi, Chamwa awa mbar, aturot bek asubot inendet ne anyorune mieindo. Ak kilenji inendet, Ui anyun cheptanyu.

³ Ak kiwa, ak kiit, ak koturisiot eng’ mbar kosubot bik che kesisiei: ak kingole kogeer, komi kebebertab mbaretab Boas, ne ki bo oretab Elimelek.

⁴ Ak ogeero, kinyo Boas eng’ Bet-lehem, ak kolenji bik che kesisiei, Ingoteb Jehovah kobotok. Ak kiwolji ichek kolenji, Ingoberurin Jehovah.

⁵ Yeityo kolenji Boas otwogindennyi ne kitononjin bik che kesisiei, Bo gab ng’o chebi?

⁶ Ak kiwolji otwogindet ne kitononjin bik che kesisiei, kolenji, Inendet ko cheptab Moab ne kibwanei ak Naomi koweeksei eng’ emetab Moab:

⁷ ak kile, Asomin ale, chamwa aturisiot, ak ayumate asubot bik che kesisiei eng’ kwenutab ratutikab bek: konyo anyun, ak kagoturisiot kong’eete karon agoi nguno, kobate katebi kitigin eng’ go.

⁸ Kolenji anyun Boas Ruth, Megase anyun-o, cheptanyu? Amat iwe iturisiote eng’ mbaret age, anan isiirte eng’ yu, ago tebi eng’ yu negite tibikyuk.

⁹ Ingotokyige konyeguk mbaret ne kesei icheget, ak iwe isub ichek: tos ma ang’at murenik ale, si matwain? Ak ye amin melelda, iwe ole mi terenik, ak iee beek che karamei murenik.

¹⁰ Kiibutyi ng’ony anyun inendet ak kong’uruk kot koit ng’ony, ak kolenji chichoto, Amu nee si anyor mieindo eng’ taing’ung’, kot ibwata, ane ne a toondet?

¹¹ Ak kiwolji Boas inendet, kolenji, Kogemwawa inne tuguk tugul che kiiyachi korgeng’ung’ bo yugoi koboch ngome manong’otiondeng’ung’: ak ko u ye kiibagakte kwandang’ung’ ak komet, ak emet ne kigisikyinin, ak inyo ole mi bik che kima ingen eng’ tai.

¹² Ingoyaagun Jehovah boisieng’ung’, ingogonin melekto ne nyiitat, Jehovah Kamuktaindetab Israel, ne kiinyo imwechi kebebaikyik.

¹³ Kole anyun Ruth, Inganyor mieindo eng’ taing’ung’, kiptaiyandennyu; amu kaigaigaa, ak amu kaing’alalji cheptang’ung’ ne otwogin eng’ chamnyet, agot nganda maa u age eng’ tibiguk che otwogik.

¹⁴ Ak eng’ saitab amitwogik, kolenji Boas inendet, Nyo butul amitwogichu, ak iburburte kererutieng’ung’ siki. Ak kiteb Ruth eng’ ye negite bik che kesisiei: ak kiigochi inendet bek che kagigel, ak kinyei ak kibiyo, ak kiituuch.

¹⁵ Ak kingong’eet kwo koturisiot, kong’at Boas murenikyik, kolenji, Ingoturot chebi agot eng’ kwenutab ratutikab bik, amoger kong’.

¹⁶ Ak kogeny ong’usu alak eng’ ratutik, ak obagakte, ak ingoturot, amoger kong’.

¹⁷ Kiturisiot anyun eng’ mbar agoi koskoleny; ak kibor che kagoturot, ak ki olo bo epah agenge ne bo sairik.

¹⁸ Kiinem kola koba nganaset: ak kigeer korgennyi bo yugai che kagoturot: ak kiib amitwogik che kiga ituuch, ko kagobiyo, ak kogochi inendet.

¹⁹ Ak kilenji korgennyi bo yugoi, Keture ano ra? Ak keboisie ano? Iberurot inendet ne kanain. Ak kiiborji korgennyi bo yugoi chito ne kaboisiei tuwai, ak kolenji, Kainetab chito ne kagiboisiei tuwai rani ko Boas.

²⁰ Ak kilenji Naomi osotiondonoto ki bo werinnyi, Ingoberur Jehovah inendet ne ma bagakta rirenennyi bo ge eng’ che soptos ak che kigobek. Ak kilenji Naomi inendet, Chichoto ko chitab oret ne negit.

²¹ Ak kile Ruth Jemoabindet, Ee, kamwawa kole, Tebe yu negite murenjuchuk, agoi kogosor kesisiennyu tugul.

²² Ak kilenji Naomi Ruth osotiondonoto ki bo werinnyi, Mie, cheptanyu, obe ak tibikyik, amat kogeerjin mbaret age.

²³ Kitebe anyun ye negite tibikab Boas koturisiot agoi kegosor kesisietab sairik ak kesisietab nganok; ak kimeny koboto korgennyi bo yugoi.