RUTH 1 - BUKUIT NE TILIL

Kowendi Naomi Moab ak tun koweeksei

¹ Kibiit rubet eng’ emet eng’ betusiek che kiiruochi kiruogik. Kiwa chito age ne bo Bet-lehem-juda kwo komeny emetab Moab, ak osotiondennyi, ak werikyik aeng’.

² Ak kainetab chichoto ko ki Elimelek, ak kainetab osotiondennyi ko ki Naomi, ak kainaikab werikyik aeng’ ko ki Malon ak Kilion, Epratikab Bet-lehem-juda. Kiit emetab Moab, ak kotebe oloto.

³ Ak kime Elimelek manong’otiotab Naomi; ak king’et inendet ak werikyik aeng’.

⁴ Ak kiitun osotik eng’ kwonyikab Moab; kainetab age ko ki Orpa, ak kainetab age ko ki Ruth: ak kimeny oloto olo bo kenyisiek taman.

⁵ Ak kibek tuwai Malon ak Kilion; kibegune kwonyoto lagokyik aeng’u ak manong’otiondennyi.

⁶ King’eet inendet anyun koboto che bo werikyik, komachei koweektagei eng’ emetab Moab: amu kiga kogas eng’ emetab Moab kole kigorutochi Jehovah bikyik kogochi amitwogik.

⁷ Ak kiwa eng’ komosta ne kimi, koboto osotik aeng’ che bo werikyik; ak kiba bandanywa koweektagei emetab Juda.

⁸ Ak kilenji Naomi osotichoto aeng’ bo werikyik, Oba, ingoweek age tugul kwo gotab kamet: ingoyaiywok Jehovah ne mie, ko u ye kioyachi bichu kibegu, ak ko u ye kioyaiywa.

⁹ Ingogonok Jehovah onyoru kamuung’et, age tugul eng’ okwek eng’ gotab manong’otiondennyi. Yeityo kong’utut ichek; ak kiwaach koririo.

¹⁰ Ak kilenji ichek inendet, Achicha, kiweeksei tugul ole mi biguk.

¹¹ Ak kile Naomi, Oweeige, tibikyuk: amu nee si kebe tugul? Ta asiche werik alak che imuchi koek manong’otaikwok?

¹² Oweektege anyun, tibikyuk, oba; amu koaositu, ma kituna. Nda amwae ale, atinye kamang’unet, nda agot asiche manong’otiot kemouni, ak asich werik;

¹³ ko kata ogeni kot koeegitu? Ko kata otebye amotinye manong’otaik? Achicha, tibikyuk; amu kona aarogen mising’ agobo okwek, amu kigonyalila eutab Jehovah.

¹⁴ Ak kiwaach koririo kogeny: ak king’utut Orpa korgennyi bo yugoi; ago kiratyigei Ruth inendet.

¹⁵ Ak kilenji Naomi Ruth, Keero, kagoweek kwondab bomurtang’ung’ kwo ole mi bikyik, ole mi kanamwennyi: weektege aginye isub ne bo bomurtang’ung’.

¹⁶ Ak kile Ruth, Amegaigaa abagachin, aweek awa ga amasubin: amu ole iwendi awendi; ak ole itebe atebe agane: egu biguk bikyuk, ak egu Kamuktaindeng’ung’ Kamuktaindennyu:

¹⁷ ole imechini, amechini agane, ak ketupcha yoto: ingoyaiywa Jehovah ko u noto, ak kotes, kobate meet inegei ne ibestosech ane ak inye.

¹⁸ Ak kingogeer Naomi kole, kiga kobegechi koba tuwai, ko mata kong’alalji inendet.

¹⁹ Kiba tuwai anyun kot koit Bet-lehem. Kingoit Bet-lehem, kochirjiren nganaset komugul agobo ichek, ak kile gotab kor, Naomi nito?

²⁰ Ak kilenji ichek, Amat oguurena Naomi, oguurena Mara: amu kigoyaiywa Inendet ne bo Kamuktaet kit ne ng’wan.

²¹ Kiawendi ko a nyiitat, ak kogomutwa Jehovah ga ami buch: amu nee si oguurena Naomi, amu kigobaorian Jehovah kogikya, kigonyalila Inendet ne bo Kamuktaet?

²² Kiweek anyun Naomi, koboto Ruth Jemoabindet, osotiotab werinnyi, che kiweek eng’ emetab Moab: ak kiit Bet-lehem eng’ taunetab kesisietab sairik.