ROMANIK 9 - BUKUIT NE TILIL

Arogenetab Paulo amu bistoetab Israel

¹ Amwae iman eng’ Kristo, mamwae lembech, baoriani kabwatutikyuk kobota eng’ Tamirmiriet ne Tilil,

² ale atinye arogenet ne o ak ng’wanindo ne maigesugei eng’ muguleldanyu.

³ Amu kata amache ale king’wanita anendet eng’ Kristo agobo tupchosiekyuk, che bikyuk eng’ borto:

⁴ che Isrealik; che kigiyai koek lagok, che nenywa torornatet, ak kayomisutik, ak kagoitoetab Ng’atutiet, ak otetab Jehovah, ak arorutik;

⁵ ne chechuak kwanisiek, ak nenywa Kristo eng’ atebetab borto. Iberurot koigeny Jehovah, ne bou tugul. Amen.

Maek buch arorutikab Jehovah

⁶ Ago ma kele kogoek buch ng’olyotab Jehovah. Amu ma Israelik ichek tugul, che bo Israel:

⁷ ama kele lagok ichek tugul, amu keswekab Abraham: ago, Kiguurtoe Isak keswondeng’ung’.

⁸ Noto anyun, ichek ko ma lagokab borto che lagokab Jehovah; ago lagokab arorutiet che kiiti koek keswot.

⁹ Nito anyun ko ng’olyotab arorutiet, Anyone tun kapkora eng’ kenyit ne nyonei, ak kosich Sara werit.

¹⁰ Ak ma u noto kityo; ago ye kingo kagomanach Rebeka agine eng’ agenge, noto kwandanyo Isak-

¹¹ amu ye kitomo kesich lagok, koyai kiy age tugul ne mie anan ne ya, si kobiit kotonon magetab Jehovah ko u lewenet, ama bo boisionik, ago bo inendet ne kuursei,

¹² kigilenji inendet, Otei ne o ne ming’in.

¹³ Agot ko u ye sirat, kele, Kiacham Jakobo, ago kiawech Esau.

Bo iman Jehovah

¹⁴ Kimwae nee anyun? Mi ne ma bo imanda eng’ Jehovah? Achicha, ma u noto.

¹⁵ Amu mwachin inendet Musa kolenjin, Arire inendet ne amache arire, ak atinye rirenetab ge eng’ inendet ne amache arirege.

¹⁶ Noto anyun ma bo inendet ne machei, anan inendet ne labati, ago bo Jehovah ne tinyei rirenetab ge.

¹⁷ Amu mwachin siret Parao kolenjin, Kang’eetin amu ng’olyondonito ale, abartaenen kamuktaennyu, si keamdaat kainennyu eng’ ng’ony komugul.

¹⁸ Noto anyun inendet ne machei korire, koriregei, ak ne machei kouuiit, kouuiiti.

Bou Jehovah tuguk tugul

¹⁹ Ilenjina anyun, Amu nee si kota kocheng’ei lelutiet? Amu ng’o ne kirindoi magennyi?

²⁰ Achicha, ago, ee inye chi, i ng’o ne tos iwolji Jehovah kiy? Tos mwachin kit ne kigimimi mimiindet, kolenjin, Amu nee si iyaa ko u noto?

²¹ Anan matinyei cheptereniot kimnatet eng’ menet, koyai eng’ kebebertab menonoto teret ne bo teegisto, ak age ne ma bo teegisto?

²² Tos nee anyun, ngo machei Jehovah kobarta nereknatennyi, ak kong’any kimnatennyi, komuita eng’ talasiet ne o agobo terenik che bo neregek che nyoljin ng’emisiet:

²³ ak si kobiit kobarta magornatosiekab torornatennyi eng’ terenik che bo rirenetab ge che kiga sib kochopchi telunatet,

²⁴ agot achek che kiguurech, ma eng’ Yahudik kityo, ago eng’ Bororiosiek agichek?

²⁵ Ko u ye mwaei agine eng’ Hosea kole, Aguure ichek bikyuk, che kima ko bikyuk; Ak aguure inendet chamanet, ne kima ko chamanet.

²⁶ Ak eng’ oloto ole kigimwachine, kelenji, Ma o bikyuk, Keguure eng’ oloto werikab Jehovah ne sobei.

²⁷ Ak kimwa Isaia eng’ kutit ne o agobo Israel, kole, Agot ngo koitetab lagokab Israel ko te ng’aniekab nyanjet, kesoru che king’et:

²⁸ amu yaei Kiptaiyat ng’olyondennyi eng’ ng’ony, koges ak kotil konwagit.

²⁹ Ak, ko u ye kiga sib komwa Isaia kole, Nda kima bagakwech Kiptaiyatab Lugosiek keswot, Ta kiga kegergeitu ak Sodom, ak ta kiga keyaech keige Gomora.

Kit ne bunu tengektab Israel

³⁰ Kimwae nee anyun? Kimwae kele kigonor Bororiosiek imanda che kima kosubi imanda, noto ko imanda ne bo kayanet:

³¹ ago Israel, ye kingosub ng’atutietab imanda, ko maityi Ng’atutionoto.

³² Amu nee? Amu kima cheng’ eng’ kayanet, ago ko u eng’ boisionik. Kiriich ichek koita ne riichei bich;

³³ ko u ye sirat kole, Ogeero, andoi Sion koita ne riichei bich ak ruandet ne inachi bich: Ak ne iyani inendet ko magigochin kolilan.