ROMANIK 7 - BUKUIT NE TILIL

Kaborunet ne bunu katunisiet

¹ Anan mongen okwek, che kitupche (amu ang’alaljini bik che ingen Ng’atutiet), ole tinyei ng’atutiet bounatet eng’ chito eng’ betusiek tugul che bo sobennyi?

² Amu kobogoriot ne tinyei manong’otiot koratei ng’atutik eng’ manong’otiot eng’ betusiek tugul che bo sobennyi; ago ngo me manong’otiot, kotiagak anyun eng’ ng’atutietab manong’otiot.

³ Noto anyun, ye ta kosobei manong’otiot, ak konamgei ak chito age, keguure inendet chebaigeiyat: ago ngo kagome manong’otiot, kotiagak eng’ ng’atutiet, eng’ noto anyun, ko ma keguure chebaigeiyat, agot ngotun chito age inendet.

⁴ Noto anyun, che kitupche, kigeyaak obegu eng’ Ng’atutiet eng’ bortab Kristo; si kobiit obunji chito age, inendet ne kiging’eet komong’une che kibek, si keiichi Jehovah logoek.

⁵ Amu ye kingota kemi eng’ borto ko kiboisiei magutik che bo tengek eng’ kebeberwekab borwekyok, che kimi amu Ng’atutiet, si koiiyo logoek che ityin meet.

⁶ Ago nguno, ko kigitiachech eng’ Ng’atutiet, ko kagebekyi noto ne kiga ratech; si kobiit keotisie eng’ leelindab Tamirmiriet, ma eng’ osindab ng’atutik che sirotin.

Ng’atutiet ak tengekto

⁷ Kimwae nee anyun? Tos tengek Ng’atutiet? Achicha, ma u noto. Ago kima kota anae tengek nda kima ko eng’ Ng’atutiet: amu kima kota anai kasetab miat nda kima mwa Ng’atutiet kole, Amegase miat:

⁸ ago kinyor tengek boroindo eng’ ng’atutiet koyai eng’ ane kasetab miat age tugul: amu ye mami Ng’atutiet ko meat tengekto.

⁹ Ak kiasobe eng’ tai ye kima komi Ng’atutiet: ago ye kingonyo ng’atutiet, kosob kogeny tengekto, amee anyun;

¹⁰ ak kiageer ale kibunji meet ng’atutiet ne ki bo sobondo:

¹¹ amu kinyor tengek boroindo eng’ ng’atutiet kong’ala, ak kobara eng’ noto.

¹² Noto anyun tilil Ng’atutiet, ak ko tilil kayomiset, ak ko bo imanda, ak ko mie.

¹³ Tos kiek anyun noto mie meet eng’ ane? Achicha, ma u noto. Ago si koborgei tengekto kele tengekto, ko kiyai meet eng’ ane eng’ noto mie; - si kobiit koek tengekto tengekto inne eng’ ng’atutiet.

Bo kebeberwek aeng’ biteetab chito

¹⁴ Amu kingen kele bo Ng’atutiet tamirmiriet: ago a chitab borto, ne kigealdochi tengek.

¹⁵ Amu mangen ne ayae: amu ma ne amache, ne ayae; ago ne aweche, ko noto ne ayae.

¹⁶ Ago ngayai noto mamache, ayan anyun ale mie Ng’atutiet.

¹⁷ Nguno anyun ko ma ko ane ne ayae, ago tengekto ne menya.

¹⁸ Amu angen ale eng’ ane, noto ko eng’ bortanyu, ko mamenyei kiy ne mie: amu mi chamet kobota, ago ale ayai noto mie, ko mayae.

¹⁹ Amu noto mie ne kata ayae, ko mayae: ago yaitiet ne mamache, ko noto ne cham ayae.

²⁰ Ago ngot ayae ne mamache, ko ma ko ane ne yaei, ago tengekto ne menya.

²¹ Ageere anyun ng’atutiet, ale, eng’ ane, ne kata ayae ne mie, komitei yaitiet kobota.

²² Amu abaibai eng’ Ng’atutietab Jehovah eng’ chito ne bo orit:

²³ ago ageere ng’atutiet ne ter eng’ kebeberwekab bortanyu, kobortos ak ng’atutietab ng’omnatennyu, koyaa aek luulenetab ng’atutiet ne bo tengekto ne mitei kebeberwekab bortanyu.

²⁴ Ee, ane ne nyalili! Ng’o ne itiacha eng’ bortab meoni?

²⁵ Amwachini Jehovah kongoi eng’ Jesu Kristo Kiptaiyandennyo. Noto anyun, aote eng’ ng’omnatennyu Ng’atutietab Jehovah, ago eng’ borto aote ng’atutikab tengekto.