ROMANIK 6 - BUKUIT NE TILIL

Manamegei ak tengek katuiyet ne kigituiyech ak Kristo

¹ Kimwae nee anyun? Kitebi eng’ tengek, si kobiit kotesak mieindo?

² Achicha, ma u noto. Achek che kigebekyi tengek, ko ta kesoptoi ano eng’ tengek?

³ Anan ma onai ole achek tugul che kigibatisanjech Jesu Kristo ko kigibatisanjech meennyi?

⁴ Noto anyun kigetubech koboto inendet eng’ kabatisanet agoi meet: si ko u ye kiging’eet Kristo eng’ che kibek eng’ torornatetab Kwanda, ko u noto, kibendoti agachek eng’ sobondo ne leel.

⁵ Amu ngo kigituiyech ak inendet eng’ kergeindab meennyi, ke u noto agachek eng’ kergeindab ng’eetyennyi;

⁶ kingen ni, kele kigigartat chinnyo ne bo keny koboto inendet, si kong’emak bortab tengek, si mata koratech tengekto kogeny.

⁷ Amu inendet ne kigome kotiagat eng’ tengek.

⁸ Ago ngo kigebegu koboto Kristo, kiyani kora kele kisoptosi koboto inendet;

⁹ kingen kele kiging’eet Kristo komong’ eng’ che kigobek: ma komeei kogeny; ma kotinyei meet bounatet eng’ inendet kogeny.

¹⁰ Amu meet ne kime, ko kimechi tengek konyil agenge ak koyam; ago sobet ne sobei inendet kosobei eng’ Jehovah.

¹¹ Ko u noto oiityige ak okwek ole kiobekyi tengek, ago osoptosi eng’ Jehovah eng’ Kristo Jesu.

¹² Noto anyun amochamji tengek koboi borwekwok che begu, si ogas it magutikwak:

¹³ anan ogochi tengek kebeberwekab borwekwok koek karik che ma bo iman; ago ogochige Jehovah, ko u che soptos che kamong’une che kibek, ak ogochi Jehovah kebeberwekab borwekwok koek karikab imanda.

¹⁴ Amu matinyei tengek bounatet eng’ okwek: amu ma omi eng’ Ng’atutik, ago eng’ mieindo.

Kaborunet ne bunu otwoknateb

¹⁵ Nee anyun, kiyai tengek, amu ma kemi eng’ Ng’atutik, ago eng’ mieindo? Achicha, ma u noto.

¹⁶ Mongen ole, inendet ne ogochinige oegu otwogik agoi kasetab it, ko o otwogikab inendet ne ogase it; ngo bo tengekto agoi meet, anan ngo bo kasetab it agoi imanda?

¹⁷ Ago kimwachini Jehovah kongoi, amu, okwek che ki o otwogikab tengekto, ko kiogas it eng’ muguleldo konetisiet ne u ne kigegonok okwek;

¹⁸ ak ye kingitiachak eng’ tengek, oegu otwogikab imanda.

¹⁹ Ang’alali ko u biteetab bik amu nyalulet ne bo borwekwok: amu ko u ye kiogoite kebeberwekab borwekwok koek otwogikab muruonindo ak tengek agoi tengek, ko u noto anyun ogoite kebeberwekab borwekwok koek otwogikab imanda agoi tililindo.

²⁰ Amu ye kita ko o otwogikab tengekto, ko kiotiagotin eng’ imanda.

²¹ Kiotinye logoek nee eng’ betusiechoto eng’ tuguk che olilane nguno? Amu kagesunetab tuguchoto ko meet.

²² Ago nguno ko kagitiachak eng’ tengekto, ak kaoegu otwogikab Jehovah, otinye logoekwok agoi tililindo, ak kagesunet ko sobondab koigeny.

²³ Amu melektab tengek ko meet; ago konunetab chamnyet ne bo Jehovah ko sobondab koigeny eng’ Kristo Jesu Kiptaiyandennyo.