ROMANIK 5 - BUKUIT NE TILIL

Kit ne biitune kayanet

¹ Kitinye kalyet ak Jehovah eng’ Kiptaiyandennyo Jesu Kristo amu kigiityech imanda eng’ kayanet;

² ak kigenyoru eng’ inendet agine kemong’ji eng’ kayanet mieinoto kitonone; ak ongeboiboitu eng’ kamang’unetab torornatetab Jehovah.

³ Ak ma u noto kityo, ago ongeboiboitu eng’ nyalilwogikyok: kingen kele ibu nyalilda muitaet;

⁴ ak ibu muitaet tiemisiet; ak ibu tiemisiet kamang’unet:

⁵ magonu kamang’unet kililan; amu kigerong’ji chamnyetab Jehovah mugulelwekyok eng’ Tamirmiriet ne Tilil ne kigegonech.

Kiboru chamnyetab Jehovah eng’ meetab Kristo

⁶ Amu ye kita ko ki nyalulyotin, kome Kristo agobo che yaachen eng’ betut ne kiga kelewen.

⁷ Amu bichii kome chi agobo chi ne bo imanda: ago abere kanyei chito age kome agobo chi ne mie.

⁸ Ago iboruech achek Jehovah chamnyennyi, amu ye kita ko ki kiptengeginik, kome Kristo agobo achek.

⁹ Ak ne siirei mising’ anyun, ko kagiityech imanda eng’ korotikyik, kesoruech eng’ neregekab Jehovah eng’ inendet.

¹⁰ Amu ye kita ko ki bunik, ko kigituiyech ak Jehovah eng’ meetab Werinnyi, ne siirei mising’ anyun, koga kituiyech, kesoruech eng’ sobondanyi.

¹¹ Ak ma u noto kityo, ago kiboiboi agachek eng’ Jehovah eng’ Kiptaiyandennyo Jesu Kristo, amu kigenyoru eng’ inendet katuiyet.

Begu bik eng’ Adam, soptos bik eng’ Kristo

¹² Noto anyun, ko u ye kimong’ji ng’ony tengek eng’ chito agenge, ak meet amu tengek; koityi anyun meet bik tugul, amu kiyai tugul tengek -

¹³ amu kimi ng’ony tengek agoi koit Ng’atutik: ago magiiti tengek ye mami ng’atutik.

¹⁴ Ago kiboi meet koboch Adam agoi Musa, agot eng’ ichek che kima yai tengekto ne kergei ak bistoetab Adam, ne ki itondab inendet ne ki tun konyo.

¹⁵ Ago ma u bistoet, konunetab chamnyet. Amu ngo kibek che chang’ eng’ bistoetab agenge, ko kitesak mising’ kosiir eng’ che chang’, mieindab Jehovah, ak konunet eng’ mieindab chito agenge, Jesu Kristo.

¹⁶ Ak ma kergei kit ne biitune konunet ak kit ne biitune tengektab chito agenge: amu kinyo kiruoget eng’ agenge agoi kagikyinet, ago kinyo konunetab chamnyet eng’ bistautik che chang’ agoi kaiityinetab imanda.

¹⁷ Amu ngo kiboi meet eng’ bistoetab agenge; ne siirei mising’ anyun, kobou eng’ sobondo ichek che taachei chang’indab mieindo ak konunet ne bo imanda eng’ agenge, noto Jesu Kristo.

¹⁸ Noto anyun, ko u ye kinyonji bik tugul kiruoget agoi kagikyinet eng’ bistoetab agenge; ko u noto kinyonji bik tugul konunet ne kigoitoi buch, agoi kaiityinetab imanda ne bo sobondo eng’ bistoet agenge ne bo imanda.

¹⁹ Amu ko u ye kiek che chang’ kiptengeginik eng’ bistoetab chito agenge, ko u noto kiyaei che chang’ kobunji imanda eng’ kasetab it ne bo agenge.

²⁰ Ak kinyo Ng’atutiet, si kobiit kotesak bistoet; ago ye kitesak tengekto, ko kitesak mieindo mising’ kosiir:

²¹ si, ko u ye kiboi tengekto eng’ meet, ko u noto bou mieindo eng’ imanda agoi sobondab koigeny eng’ Jesu Kristo Kiptaiyandennyo.