ROMANIK 4 - BUKUIT NE TILIL

Kaborunetab Abraham

¹ Kimwae nee anyun agobo Abraham, kwandanyo, kinyor nee eng’ atebetab borto?

² Amu nda kiga kiityi Abraham imanda eng’ boisionik, kotinyei inendet ne ilosunegei; ago ma eng’ taitab Jehovah.

³ Mwaei nee anyun sirutik? Kiiyan Abraham Jehovah, ak kigiityi inendet imanda.

⁴ Ago inendet ne boisiei, ko magiityin melekto kele bo mieindo, ago bo besendo.

⁵ Ago eng’ inendet ne maboisiei, ago iyani inendet ne iityin imanda chi ne ya, kiiti kayanennyi kele bo imanda.

⁶ Agot ko u ye kimwa Daudi agine agobo kaberuretab chito ne iityin Jehovah imanda ama eng’ boisionik,

⁷ kole, Boiboen ichek che kigenyochi kaat tengekwogikwak, Ak che kigetuch tengekwogikwak.

⁸ Baibai chito ne matun iityin kiptaiyat tengekto.

⁹ Tos kimwae kaberuroni agobo che kigimuratan, anan che ma kimuratan agichek? Amu kimwae kele, Kigiityi Abraham kayanennyi kobunji imanda.

¹⁰ Kigiityindo ano anyun? Ye kiga kimuratan anan ye kitom kimuratan? Ma eng’ kamuratanet, ago ye kitom kimuratan:

¹¹ kitaach kaborunetab kamuratanet, ng’okset ne bo imandab kayanet ne kitinyei ye kitom kimuratan: si kobiit koek kwandab ichek tugul che kiyani, agot ye kitom kimuratan, si kobiit kiityi ichek imanda;

¹² ak koek kwandab che imuratanotin eng’ ichek che ma bo kamuratanet kityo, ago che bendi agichek eng’ tiegutikab kayanonoto bo kwandanyo Abraham ne kitinyei ye kitom kimuratan.

¹³ Amu kima kigochi Abraham ak keswekyik arorutiet eng’ oret ne bo Ng’atutiet kele kobunji ng’ony, ago eng’ imanda ne bo kayanet.

¹⁴ Amu ngot koek che namei tuguk, ichek che bo Ng’atutiet, ko kagoek buch kayanet, ak kageyai arorutiet koek ne matilei kiy:

¹⁵ amu ibu Ng’atutiet neregek; ago ole mami ng’atutiet, ko mami bistoet.

¹⁶ Bunu kayanet amu nito, si kobiit koek ne bo mieindo; si mawalak arorutiet eng’ iyotet tugul; ma choto bo Ng’atutiet kityo, ago choto agichek che bo kayanetab Abraham, ne kwandanyo achek tugul

¹⁷ (ko u ye sirat kole, Kaayain iegu kwandab bororiosiek che chang’) eng’ taitab ne kigoyan inendet, noto ko Jehovah, ne isoobi che kigobek, ak koguurei tuguk che mami, ko u che mi.

¹⁸ Kiiyan eng’ kamang’unet ye kima komi kiy ne kimang’u, si kobiit koek kwandab bororiosiek che chang’, kiga kemwa ko u noto kele, Tenitu choto iyoteng’ung’.

¹⁹ Ak kima nyalul eng’ kayanet ye kiibwati bortanyi ne u ne kigome, (ye kiga kotar olo bo kenyisiek bogol) ak Sara ne kiga kosiirto betusiekab iyotet:

²⁰ ee, kima sage kobistoe ye kiibwati arorutietab Jehovah, ago kitesak kogimit eng’ kayanet, kotorori Jehovah,

²¹ ak kiingen komie kole kit ne kiga koaror inendet, komuchi koyai kosulda.

²² Eng’ noto anyun, ko kigiityi inendet imanda.

²³ Ago kima kisir agobo inendet inegei, kele kigiityi inendet;

²⁴ ago amu achek agachek, che tun kiityin, che iyani inendet ne kiing’eet Jesu Kiptaiyandennyo komong’ eng’ che kibek,

²⁵ ne kigigoito amu bistautikyok, ak kiging’eet si kobiit kiityech imanda.