ROMANIK 3 - BUKUIT NE TILIL

Kewoljin bik che teepsei

¹ Tinyei borot nee anyun Yahudiot? Anan nee toretet ne bo kamuratanet?

² O eng’ oret age tugul: ne bo tai, ko amu kigigochi Yahudik kotononji ng’alekab Jehovah.

³ Amu egu nee ngot ko matinyei alage kayanet? Kayanenywa ne mami, ko tos walei imandab Jehovah koek buch?

⁴ Achicha: ma u noto: ingoek ne bo iman Jehovah, ago kiplembechwa chi age tugul; ko u ye sirat kole, Si kobiit kindein imanda eng’ ng’aleguk, Ak imuch ibelisie ye kiruogun.

⁵ Ago ngot kogonyiti atebennyo ne ma bo imanda, imandab Jehovah, ko ta kemwae nee anyun? Tos ma bo imanda Jehovah ne nyonei eng’ neregek? (Ang’alali ko u bik.)

⁶ Achicha: ma u noto: amu nda u noto koruokyindoi ano Jehovah ng’ony?

⁷ Ago ngo tesak imanitab Jehovah eng’ lembeitanyu agoi torornatennyi, ko amu nee si ko ta kiruokwa ko u kiptengekyo?

⁸ Ak amu nee si magimwa (ko u ye kimwaitaenech ne ya, ak ko u ye iyani alage kole kimwae achek) kele, Ongeyai che yaach si kobiit kobwa che miach? Bo iman kiruogenywa.

Bo chi age tugul tengek

⁹ Nee anyun? Tos ki miachen kesiir ichek? Achicha, agot kitigin: amu kiga kisib kiityi Yahudik ak Yunanik kele mi ichek tugul eng’ bounatetab tengekto;

¹⁰ ko u ye sirat, kole, Mami ne bo imanda, achicha, mami agot agenge:

¹¹ Mami ne iguitos, Mami ne cheng’ei Jehovah;

¹² Kigomasta tugul, kigoek tugul che matilei kiy; Mami ne yaei ne mie, achicha, mami agot agenge:

¹³ Mokwekwak ko kererit ne yatat; Kiboisie kenisiet eng’ ng’elyebwekwak: Mi ng’wonetab erenok kutuswekwak orit:

¹⁴ Che nyiitat kutuswekwak chubisiet ak ng’wanindo:

¹⁵ Chepcheb kelyekwak kotumda korotik;

¹⁶ Mi ortinwekwak ng’emisiet ak nyalilda;

¹⁷ Ama nai oretab kalyet:

¹⁸ Mami kaiyweisiet ne iywei Jehovah taitab konyekwak.

¹⁹ Ak kingen kele tuguk alak tugul che mwaei Ng’atutiet, komwachin ichek che mitei eng’ bounatetab Ng’atutiet; si kobiit keger kutit age tugul, ak si kimutyi ng’ony komugul kiruogetab Jehovah:

²⁰ amu mami chi ne kiityin imanda eng’ tainnyi eng’ boisionikab Ng’atutiet: amu bunu naetab tengekto Ng’atutiet.

Kinyoru imanda eng’ kayanet eng’ Krsto

²¹ Ago nguno ko kagong’ang’ak imandab Jehovah ama eng’ ng’atutik, ne baoriani Ng’atutiet ak maotik;

²² agot imandab Jehovah ne mi eng’ kayanet eng’ Jesu Kristo eng’ icheget tugul che iyani; amu mami kabesiet;

²³ amu kigoyai tugul tengek, ama ityin torornatetab Jehovah;

²⁴ che kiityin imanda buch eng’ mieindanyi eng’ katiaget ne mi eng’ Kristo Jesu:

²⁵ ne kiinde Jehovah koek kaptisisio eng’ kayanet, eng’ korotikyik, si kobarta imandanyi, amu kachundaetab tengekwogik che kigisib keyai, eng’ muitaetab Jehovah;

²⁶ amu kabartaetab imandanyi eng’ betusiechuto, si kobiit koek inendet ne bo imanda, ak koek ne iityin imanda inendet ne tinyei kayanet eng’ Jesu.

²⁷ Mi ano anyun kachaunetab ge? Kigegerji sang’. Eng’ ng’atutiet ne u nee? Ne bo boisionik? Achicha: ago eng’ ng’atutietab kayanet.

²⁸ Kiiti anyun kele kiityin chi imanda eng’ kayanet ama boisionikab ng’atutik.

²⁹ Anan Jehovah ko Jehovah ne bo Yahudik kityo? Ama Jehovah ne bo Bororiosiek agichek? Ee, bo Bororiosiek agichek:

³⁰ ko u ye agenge Jehovah, ak koiityin imanda eng’ kayanet che kigimuratan, ak koiityin imanda eng’ kayanet che ma kimuratan.

³¹ Tos kiyai anyun Ng’atutiet koek ne matilei kiy amu kayanet? Achicha, ma u noto: kigimiti Ng’atutiet.