ROMANIK 2 - BUKUIT NE TILIL

Mi Yahudik agichek kiruogetab Jehovah

¹ Noto anyun, metinye lotania, ee, inye chi age tugul ne iruochi: amu noto iruokyine age, iruokyinege inyendet; amu inye ne iruochi, iyae aginye tuguchoto.

² Ak kingen kele namegei kiruogetab Jehovah ak imanit agobo ichek che yaei tuguk che u choto.

³ Ee, inye chi, tos iiti inye, ile ichilile kiruogetab Jehovah, inye ne iruokyini ichek che yaei tuguk che u choto, ak iyae aginye choto?

⁴ Anan isase magornatosiek che bo mieindanyi ak muitaennyi ak talasiennyi ama inai ile imutyinin sigunet mieindab Jehovah?

⁵ Ago eng’ uuindang’ung’ ak muguleldang’ung’ ne matinyei sigunet, igonorjinige nereknatet kobunji betutab nereknatet ak ng’ang’utietab kiruoget ne bo imanda ne bo Jehovah;

⁶ ne tun igochin chi tugul ko u boisionikyik:

⁷ igochin sobondab koigeny ichek che cheng’ei eng’ muitaet ak eng’ boisionik che miach, torornatet ak teegisto ak che ma ng’emaksei;

⁸ ago eng’ ichek che ngelelik, ama kase it imanit, ago che kase it ne ma bo imanda, koegu nyitatet ak nereknatet,

⁹ nyalilda ak bichiindo, eng’ sobondab chi age tugul ne yaei yaitio, ne bo Yahudiot korok, ak ne bo Yunanindet agine;

¹⁰ ago torornatet ak teegisto ak kalyet eng’ chi age tugul ne yaei ne mie, bo Yahudiot korok ak Yunanindet agine:

¹¹ amu matiytii Jehovah bik.

¹² Amu tugul che kiyai tengek ko mami Ng’atutiet, ko tun lustos ama eng’ Ng’atutiet: ak tugul che kiyai tengek ko mi eng’ Ng’atutiet, ko tun kiruokyin eng’ Ng’atutiet;

¹³ amu ma ichek che kasei Ng’atutiet ko che bo imanda eng’ taitab Jehovah, ago ichek che yaei Ng’atutiet, kiityin imanda.

¹⁴ Amu ye yaei Bororiosiek, che matinyei Ng’atutiet, eng’ biteenywa, tuguk che bo Ng’atutiet, chuto, bichoto matinyei Ng’atutiet, kobougei ichegei;

¹⁵ ibortoi eng’ noto boisietab Ng’atutiet ne sirat eng’ mugulelwekwak, kobaorianjin agichek nautikwak, ak komwaitogei ichegei eng’ ichegei eng’ kabwatutikwak, anan kosorugei;

¹⁶ eng’ betut ne tun iruokyin Jehovah ung’otikab bik, ko u logoiywekyuk che miach, eng’ Jesu Kristo.

¹⁷ Ago ngeguurenen Yahudiot, ak itiiege Ng’atutiet, ak ichouge eng’ Jehovah,

¹⁸ ak ingen magennyi, ak ichame komie tuguk che kororon kosiir, amu kiginetin Ng’atutiet,

¹⁹ ak iiti ile i kandoindet ne bo che koriotin, lapkeiyetab icheget che mi mesundeito,

²⁰ kotigonindet ne bo che berber, konetindet ne bo manyurunik, ne itinye eng’ Ng’atutiet kergeindab naet ak imanit;

²¹ inyendet anyun ne ineti age, ko menetige? Inye ne iamdoi ile amat kochorse chi, ko tos ichorsei inye?

²² Inye ne imwae ile amat oipgei, ko tos iyae inye? Inye ne iweche kanamonik, ko tos irebe che mi gorikab kanamonik?

²³ Inye ne ichouge eng’ Ng’atutiet, ko tos iteweri Jehovah eng’ bistoeng’ung’ ne ibistoe Ng’atutiet?

²⁴ Amu kichubei kainetab Jehovah eng’ kwenutab Bororiosiek, amu okwek, ko u ye kigisir.

²⁵ Amu toreti iman kamuratanet, ngo i yaindetab Ng’atutiet: ago ngot ko i butindetab Ng’atutiet, ko kagoek kamurataneng’ung’ ne ma kamuratano.

²⁶ Ngot koribei anyun tetutikab Ng’atutik inendet ne ma kimuratan, ko tos magiiti ne ma kimuratan kele imuratanat?

²⁷ Ak tos matun iruogun inendet ne ma kimuratan eng’ atebennyi, ngot koyai Ng’atutiet kosulda, inyendet ne i butindetab Ng’atutiet ak itinye ng’atutik che sirotin ak kamuratanet?

²⁸ Amu ma Yahudiot inendet ne Yahudiot eng’ borto barak, ama kamuratanet noto bo borto barak:

²⁹ ago Yahudiot inendet ne Yahudiot eng’ orit; ak kamuratanet ko noto bo muguleldo, eng’ tamirmiriet, ma eng’ siret; ne kalosunennyi ko ma bo bik, ago bo Jehovah.