ROMANIK 16 - BUKUIT NE TILIL

Kagatosiekab Paulo inegei

¹ Kande eunekwok Poibe ne kitupche ne cheboitiotab kaniset ne mi Kenkrea:

² ale otaach inendet eng’ Kiptaiyat, ko u ye nyoljin che tililen, ak otoret inendet eng’ kit age tugul ne magenok; amu inendet agine ko ki toretindet ne bo che chang’, ak kitoreta agane.

³ Ogat Priska ak Akula che ki kiboitinik tugul eng’ Kristo Jesu,

⁴ che ki chobotin kogoito sobonwekwak agobo sobondanyu; che mamwachini kongoi anege, ago koboto kanisosiek tugul che bo Bororiosiek agichek:

⁵ ak ogat kaniset ne mi gonywa. Ogat Epeneto ne achame mising’, ne tongoaniat ne bo Kristo eng’ emetab Asia.

⁶ Ogat Maria, ne kiboisiewok eng’ boisiet ne o.

⁷ Ogat Androniko ak Junia, che bo ornyo, ak che kimonjororinik kobota, che toogunotin eng’ che kiyoktoi, che kimi eng’ Kristo kotom ayan.

⁸ Ogat Ampliato ne achame mising’ eng’ Kiptaiyat.

⁹ Ogat Urbano kiboitiondennyu ne kiboisiei tugul eng’ Kristo, ak Stako ne achame.

¹⁰ Ogat Apele ne chamat eng’ Kristo. Ogat ichek che bo gotab Aristobulo.

¹¹ Ogat Herodion ne bo ornyo. Ogat ichek che bo gotab Narkiso, che mi eng’ Kiptaiyat.

¹² Ogat Trupena ak Truposa, che boisiei eng’ Kiptaiyat. Ogat Persis chamanet, ne kibois mising’ eng’ Kiptaiyat.

¹³ Ogat Rupo ne lewenot eng’ Kiptaiyat, ak kamet ne kamennyu agane.

¹⁴ Ogat Asunkrito, ak Plegon, ak Herme ak Patroba, ak Herma, ak tupchosiek che mi koboto ichek.

¹⁵ Ogat Pilologo ak Julia, ak Nereo ak chepkamet, ak Olumpa, ak che tililen tugul che mi koboto ichek.

¹⁶ Ogatge eng’ ng’ututet ne tilil. Igatok kanisosiek tugul che bo Kristo.

¹⁷ Kasomok anyun che kitupche, ale ogeer ichek che ing’eeti kabesiosiek ak kanagutik, che manamegei ak konetisiet ne kionetge: ak koistoege ichek.

¹⁸ Amu icheget che u choto, ko maotei Kiptaiyandennyo Kristo, ago otei mootinwekwak; ak kong’alei mugulelwekab che libwoben eng’ ng’alekwak che tangusen ak che bo chemwaikutnatet.

¹⁹ Amu kigogasak eng’ bik tugul kaseng’wong’ bo it. Noto anyun abaibai eng’ okwek: ago amache ong’omegitu eng’ noto mie, ak oegu che berber eng’ noto bo yaitiet.

²⁰ Ak tun tuei Jehovah ne bo kalyet Setani eng’ kelyekwok ko negit. Ingoteb kobotok mieindab Kiptaiyandennyo Jesu Kristo.

²¹ Igatok Timoteo ne kiboitiot kobota; ak Lukio ak Jason ak Sosipatro, che bo ornyo.

²² Ane Tertio ne kasirei baruani, agatok eng’ Kiptaiyat.

²³ Igatok Gaio ne ami gonnyi, ak kaniset komugul. Igatok Erasto ribindetab tugukab nganaset, ak Kuarto ne tupcho.

²⁴ Ingoteb kobotok tugul mieindab Kiptaiyandennyo Jesu Kristo. Amen.

Kalosunet

²⁵ Nguno eng’ inendet ne imuchi kogimitok ko u logoiywekyuk che miach ak amdaetab Jesu Kristo, ko u ng’ang’utiet ne bo ung’ot ne kiga kiuny kosis koboch betusiek che bo koigeny,

²⁶ ago kagong’ang’ak nguno, ak eng’ sirutik che bo maotik, ko u ng’atutietab Jehovah ne bo koigeny, ko kagiborji bororiosiek tugul agoi kasetab it ne bo kayanet;

²⁷ bo Jehovah ne ng’om inegei, torornatet koigeny, eng’ Jesu Kristo. Amen.