ROMANIK 12 - BUKUIT NE TILIL

Sobondo ne leel

¹ Noto anyun che kitupche, asomok mising’, eng’ rirenosiekab Jehovah ale, ogoite borwekwok koek tiseiywot ne sobei, ne tilil, ne taachaksei eng’ Jehovah, noto ko boisieng’wong’ ne nyolu.

² Amoyaniege ateptab betusiechu: ago ingewalak eng’ kaleelitetab kabwatutikwok, si kobiit onai komie maget ne mie, ne tachaksei ak kogesunotgei, ne bo Jehovah.

Ole kanyol keboisie konunoik che bo Tamirmiriet

³ Amu amwachini chi age tugul ne mi kwenung’wong’, eng’ mieindo ne kigegona, amat kobwatgei chi kole toror kosiir ne te ne nyolu kobwat; ago kobwat ne yamei, ko u ye kiigochi Jehovah chi age tugul karagutietab kayanet.

⁴ Amu agot ko u ye kitinye kebeberwek che chang’ eng’ borto agenge, ama tinyei kebeberwek tugul boisiet agenge:

⁵ ko u noto eng’ achek che ki chang’, ki borto agenge eng’ Kristo, ak ki kebeberta age tugul ne bo age.

⁶ Ak ketinye konunoik che terotin ko u mieindo ne kigegonech, ngo maoinatet, ko ongeamde ko u ole te kayanennyo;

⁷ anan boisiet, ongigochige boisiennyo; anan inendet ne inetisiei, kochuljigei konetisiennyi;

⁸ anan inendet ne iteitoi, kochuljige kateitaennyi: inendet ne igoitoi, kogoito eng’ aiyebindo; inendet ne bou, koboi kochuljigei; inendet ne riregei, koriregei eng’ boiboiyet.

Atebosiek che nyoljin bikab Kristo kotepto

⁹ Ingoek chamnyet ne matinyei ng’alset. Wech mising’ noto ya; onamge ak ne mie.

¹⁰ Ochamnye eng’ chamnyet ne u ne bo tupchosiek; ingoiit chito age chito age kosiir inendet eng’ teegisto;

¹¹ eng’ kagiiletab ge amochoriren; ogiilge mising’ eng’ tamirmiriet, oote Kiptaiyat;

¹² oboiboitu eng’ kamang’unet; omuitoi eng’ nyalilda; ogiiljige saet kotugul;

¹³ otoret che tililen eng’ tuguk che bononi; oaiyebitu eng’ toek.

¹⁴ Oberur che usok; oberur, amochub.

¹⁵ Oboiboitu koboto che boiboi; oririe koboto che rirtos.

¹⁶ Oegu che tinyei kabwatet agenge okwege eng’ okwege. Among’asyige tuguk che tororen, ago onamge ak che iming’inegei. Moiityige ole o ng’omen eng’ loseng’wong’ bo ge.

¹⁷ Amoyaakyi chi yaitio eng’ yaitio. Ibwat tuguk che bo teegisto eng’ taitab bik tugul.

¹⁸ Ngomugaksei eng’ okwek, otebi ak bik tugul eng’ kalyet.

¹⁹ Chamanichu, amoyaakte mugetut, ago ogochi boroindo neregek: amu sirat kole, Nenyu yaaktaetab mugetut; ayaaktoi, mwaei Kiptaiyat.

²⁰ Ago ngo am rubet bunyondeng’ung’, ibai; ngo am melel, inage koee: amu ye iyae ko u noto ko kerurukyi ng’etetiot metinnyi.

²¹ Ameng’ koterterin yaitiet, ago iterter yaitiet eng’ ne mie.