ROMANIK 11 - BUKUIT NE TILIL

Ma kiesio Israel konyi

¹ Amwae anyun ale, Kitoorta Jehovah bikyik? Achicha, ma u noto. Amu a Israelindet agane, ne bo keswekab Abraham, ne bo oretab Benjamin.

² Kima toorta Jehovah bikyik che kisib konai. Anan ma onai ne mwaei siret agobo Elija? Ko u ye king’andoi inendet Israelik eng’ taitab Jehovah, kole,

³ Kiptaiyandani, kigobar maotiguk, ak kigoluul ole kitisisie: ak kaang’etu anege, ak kocheng’ei sobondanyu.

⁴ Ago lenjin nee wolunetab Jehovah? Kaatukyige murenik elfusiek tisab, che ma kutung’ji Baal.

⁵ Agot ko u noto anyun agine eng’ betusiechu, mitei che ng’etunotin ko u lewenet ne bo mieindo.

⁶ Ago ngot ko bo mieindo, ko ma ko bo boisionik: ngo ma u noto, ko mata koek mieindo mieindo.

⁷ Nee anyun? Kimanyor Israel noto kicheng’ei; ago kinyor lewenik, ak kigiuuiit chun alak:

⁸ ko u ye sirat kole, Kigogochi Jehovah ichek tamirmirietab ruondo ne nyigis, ak konyek che mageerei kiy, ak itik che magasei kiy, agoi betunito.

⁹ Am mwaei Daudi kole, Ingoek mesenywa meset ak rigeito, Ak kanagutiet, ak yaaktaet eng’ ichek:

¹⁰ Ingoimenitu konyekwak, si mageer kiy, Ak iyai batoikwak kogumbu kotugul.

¹¹ Amwae anyun ale, Tos, kiterteriot kot kobutyo? Achicha, ma u noto: ago kinyonji yetunet Bororiosiek eng’ kabutenywa, si kobiit kogochi ichek ng’etkonda.

¹² Ngot koegu kabutenywa magornatosiekab ng’ony, ak koek lusenywa magornatosiekab Bororiosiek; kosiirei ne tia anyun nyiienywa?

Kisoru che bo Bororiosiek: kaborunetab ketik che kinamdos

¹³ Ago ang’alalwok okwek che o bo Bororiosiek. Ko u ye a ne kiyoktoi ne bo Bororiosiek, atorori boisiennyu:

¹⁴ si agochi ng’etkonda eng’ or age tugul icheget che ki borto agenge, ak asoru alak eng’ ichek.

¹⁵ Amu ngo toortaenywa ko katuiyetab ng’ony, ko tos nee anyun taagetab ichek, kobate sobondo ne mong’une che kibek?

¹⁶ Ak ngo tilil tongoaniat, ko tilil kit komugul agine: ak ngo tilil tigitiot, ko tililen agichek temenik.

¹⁷ Ago ngot ko kigiiri temenik alak, ak inye ne i emditab timin, ko kiginamnyenen ichek eng’ kwenunywa, ak kioyamde koboto icheget ne bo tigitiot ak akwaiyetab emdit;

¹⁸ mechauge ile isiire temenik: ago, ngot ichauge, ko ma inye ne igeseni tigitiot, ago tigitiot ne kesenin.

¹⁹ Imwae anyun ile, Kigiiri temenik, si kinamnyena.

²⁰ Mie; kigiiri ichek amu bistoenywa, ak itononi eng’ kayaneng’ung’. Amelasge, ago iyweisie:

²¹ amu ngo kima rire Jehovah temenik che ki bo ketoto ye kinye, ko marirenen ak inye.

²² Keer anyun-o mieindo ak koromnatetab Jehovah: eng’ ichek che kibutyo, ko koromnatet; ago eng’ inye, ko mieindab Jehovah, ngitebi eng’ mieindanyi: ngo ma u noto ketilin aginye.

²³ Ak ngo matebi ichek eng’ bistoenywa, kinamdos: amu imuchi Jehovah konamnyo ichek kogeny.

²⁴ Amu ngo kigetilin eng’ emdit ne bo timin eng’ biteennyi, ak kiginamnyenen emdit ne mie ne kima ko bo timin eng’ biteennyi: ko siirei anyun ne tia kinamnye temenik che ki bo ye kinye emdinywa!

Machei Jehovah korire bik tugul

²⁵ Amu mamache oegu che mongen ung’otioni, che kitupche, si moiityige ole o ng’omen eng’ loseng’wong’ bo ge, ale kanyonji Israel uuindo eng’ kebeber, agoi konyo nyiiet ne bo Bororiosiek;

²⁶ ak u noto tun kisoru Israel tugul: ko u ye sirat kole, Tun mong’une Sion Katiagindet; Ak koistoe Jakobo bistoet:

²⁷ Ak ni arorutiennyu eng’ ichek, Ye tun aiste tengekwogikwak.

²⁸ Ago bunik ichek eng’ okwek, amu logoiywek che miach: ago eng’ ng’olyotab lewenet, ko chamanik ichek amu kwanisiek.

²⁹ Amu matinyei ndara konunoikab Jehovah ak kuursennyi.

³⁰ Amu ko u ye kiongelelji Jehovah eng’ betusiek che kigosiirto, ago nguno ko kaonyoru rirenetab ge eng’ bistoenywa,

³¹ ko u noto agichek chu, kigobistoe, si konyor agichek rirenetab ge eng’ rirenetab ge ne kigiboruok.

³² Amu kigoratyi Jehovah tugul eng’ bistoet, si kobiit korire tugul.

³³ Ee tianitu anyun oindo ne bo magornatosiekab ng’omnatet ak naetab Jehovah! Ak kiruogutikyik che maisiagaksei, ak ortinwekyik che ma cheng’oksei!

³⁴ Amu ng’o ne kigonai kabwatutikab Kiptaiyat? Anan ng’o ne kigoek konetindennyi?

³⁵ Anan ng’o ne kisib kogochi kiy, si kobiit koyaakyi inendet kogeny?

³⁶ Amu bou inendet, ak kobunu inendet, ak koweekyingei inendet, tuguk tugul. Bunjin inendet torornatget koigeny. Amen.