ROMANIK 1 - BUKUIT NE TILIL

Kagatet

¹ Paulo, otwogindetab Jesu Kristo, ne kigiguur koek ne kiyoktoi, ne kigitabanji logoiywek che miach che bo Jehovah,

² che kisib koaror eng’ maotikyik eng’ sirutik che tililen,

³ agobo Werinnyi, ne kigisich eng’ keswekab Daudi eng’ borto,

⁴ ne kigimwaita kele Weritab Jehovah eng’ kimnatet, ko u tamirmiriet ne bo tililindo, eng’ ng’eetyetab che kibek; Jesu Kristo Kiptaiyandennyo,

⁵ kigitaach eng’ inendet mieindo ak kayoktoet, agoi kasetab it ne bo kayanet eng’ bororiosiek tugul amu kainennyi:

⁶ kigiguurok ak okwek eng’ icheget obunji Jesu Kristo:

⁷ eng’ okwek tugul che omite Rom, chamanikab Jehovah, che kigiguur koek che tililen: Ingoteb kobotok mieindo ak kalyet ne bunu Jehovah Kwandanyo ak Kiptaiyat Jesu Kristo.

Magatab Paulo kwo Rom

⁸ Ne bo tai, amwachini Jehovah nenyu kongoi eng’ Jesu Kristo agobo okwek tugul, amu kimwaitoi kayaneng’wong’ eng’ ng’ony komugul.

⁹ Amu Jehovah baoriandennyu, ne aote eng’ tamirmiriennyu eng’ logoiywek che miach che bo Werinnyi, ale masise amwa agobo okwek kotugul eng’ sautikyuk,

¹⁰ asome ale, tamangab kobiitwa boroindo nguno ko negit, anyonjok eng’ magetab Jehovah.

¹¹ Amu atinye emosto ageerok, si agonok konunet age ne bo tamirmiriet, si kobiit kigimitok;

¹² noto ko si kobiit kigaigaige ane ak okwek eng’ kwenung’wong’, chi tugul eng’ kayanet ne bo age, neng’wong’ ak nenyu.

¹³ Ak mamache oegu che mongen, che kitupche, ale, kiamach konyil che chang’ anyonjok (ak kigeranya agoi kora), si kobiit anyor logoek alak agot eng’ okwek, agot ko u eng’ Bororiosiechun alak agichek.

¹⁴ A ne kiyaachei eng’ Yunanik ak che ma Yunanik, eng’ che ng’omen ak che berber.

¹⁵ Noto anyun, ko u ye amuchi, ko a chobot aamwok logoiywek che miach ak okwek che omite Rom.

Kit ne u Logoiywek che Miach

¹⁶ Amu malilanjini logoiywek che miach: amu choto ko kimnatetab Jehovah agoi yetunet eng’ age tugul ne iyani; eng’ Yahudiot korok, ak Yunanindet agine.

¹⁷ Amu king’anyei eng’ choto imandab Jehovah eng’ kayanet agoi kayanet: ko u ye sirat kole, Ago sobei ne bo imanda eng’ kayanet.

Yaitietab Baroriosiek

¹⁸ Amu kigeng’any neregekab Jehovah kobun kipsengwet agobo bistoet tugul ak yaitiet tugul ne bo bik, che kirindoi imanit eng’ yaitiet;

¹⁹ amu tugukab Jehovah che naotin ko toogunotin eng’ ichek; amu kigong’ang’ji Jehovah ichek.

²⁰ Amu kigeerei komie tugukyik che ma toogu koboch yaetab ng’ony che naoksei eng’ tuguk che yaotin, agot kimnatennyi ne bo koigeny ak inendet iman ko Jehovah; si maek ichek che tinyei lotania:

²¹ amu kingo kagonai Jehovah, ko ma kolos ko u Jehovah, anan kogochi kongoi; ago kiberberitu eng’ kabwatutikwak, ak kiimenitu mugulelwekwak che matinyei naet.

²² Kingolen kondegei kong’omegitu, koberberitu,

²³ ak kowal torornatetab Jehovah ne ma ng’emaksei kogergeit ak itondab chito ne ng’emaksei, ak ne bo taritik, ak tiong’ik che bo kelyek ang’wan, ak tuguk che ichuutegei.

²⁴ Noto anyun kibagakyi Jehovah ichek magutikab mugulelwekwak kosub muruonindo, si kotewer borwekwak ichegei eng’ ichegei:

²⁵ amu kiwal imanitab Jehovah kowale lembeita, ak kolos ak koot kit ne kigiyai kosiir Yaindet, ne iberurot koigeny. Amen.

²⁶ Amu nito kibagakyi Jehovah ichek magutik che bo tewernatet: amu kiwal kobogorisiekwak biteet ne nyolu koek ne ma nyolu:

²⁷ ak ko u noto agichek murenik, kibagakta biteet ne nyolu ne bo kobogorisiek, ak kogasegei ichegei maget ne lalei, koyachingei murenik eng’ murenik noto ne ma nyolu, ak taachei ichegei melekto ne yamegei ak yaitienywa.

²⁸ Ak ko u ye kiesio kotebe Jehovah naenywa, kobagakyi Jehovah ichek kabwatutik che kigong’emogis, si koyai tuguchoto che ma nyolu;

²⁹ ko nyiitat tuguk tugul che ma bo iman, sogornatet, kasetab miat, yaitiet; nyiitat ng’etkonda, rumisiet, boriet, kenisiet, suriet; chaamik,

³⁰ che bo chemererosiek, che wechei Jehovah, che kolgolen, che menotik, che ichougei, taunikab tuguk che yaachen, che magase it sigik,

³¹ che matinyei kaguiyet, butikab kayomisutik, che matinyei chamnyet, che matinyei rirenetab ge:

³² che nganda ingen ng’atutietab Jehovah, ne len, nyoljin meet icheget che yaei tuguk che u chuto, ko mayaei kityo che u chuto, ago chamnyechin koboto icheget che yaei tuguchuto.