RIREKAB JEREMIA 1 - BUKUIT NE TILIL

Koegu Sion karatia, ak arogenennyi

¹ Lyon si komi buch nganaset, ne ki nyiitat bik! Lyon si kotebi ko u mosok! Nganaset ne ki o eng’ bororiosiek, ak ko ki cheptab laitoriat eng’ emotinwek, Kagoek anyun otwogindet!

² Rirei mising’ kemoi, ak kotendeni beekab kong’ eng’ matang’wekyik; Mami agot agenge ne igoigoi inendet eng’ chamanikyik tugul: Kigoberber choronokyik tugul inendet, Kagoek bunikyik.

³ Kigiluul Juda amu nyalilda, ak amu otwoknatet ne o; Menyei kwenutab bororiosiek, masichei kamuung’et: Kagonam inendet usikyik tugul eng’ ole bichii.

⁴ Iteitos ortinwekab Sion, amu mami chi ne nyonjin tuiyet ne kiging’at; Kigoek karatia ormarichokyik tugul, tigendos tisiikyik: Kinyalili bergeinikyik, ak kotinyei inendet ng’wanindo.

⁵ Kogoek usikyik kandoik, nyoru borotet bunikyik; Amu kogonyalil Jehovah inendet amu chang’indab bistaosiekyik: Kogimut lagokyik keluul eng’ taitab bunyot.

⁶ Kogoistoegei cheptab Sion torornatennyi tugul: Kogoigei bounikyik cheptirgichik che matinyei ole agete, Ak komwei ama tinyei kimnatet eng’ taitab chito ne onei.

⁷ Ibwati Jerusalem eng’ betusiekab nyalildanyi ak che bo bichiinwekyik Tugukyik tugul che kiiboiboi inendet koboch betusiek che bo keny: Ye kiibutyi bikyik eutab bunyot, ama toret chi inendet, Kigeer bounik inendet, kichot nyerotiosiekyik.

⁸ Kigoyai Jerusalem tengekto ne ya mising’; kogoek anyun kit ne muruon amu noto: Sasei inendet tugul che kigonyiti inendet, amu kigogeer ach ngorinnyi: Ee, tigeni, ak koweechigei let.

⁹ Kimi simdanyi ngoroikyik; ma ibwat kagesunennyi ne bo let; Katururgei anyun eng’ kwong’et; matinyei kagaigaindet: Keero, ee Jehovah, nyalildanyu; amu kogotororgei bunyot.

¹⁰ Kogoiitochi bunyot eunnyi tugukyik tugul che koboiboitune: Amu kagogeer kole kogochut bororiosiek oldanyi ne tilil, Che kiing’at ile, amat kochut ichek tuiyeng’ung’.

¹¹ Tigendos bikyik tugul, cheng’ei amitwogik; Kigogoito tugukwak che kororon si konyorune amitwogik che isoobi sobondo: Keero, ee Jehovah, ak ibwat; amu kaaegu ne kisasei.

¹² Tos ma kiy eng’ okwek, okwek tugul che osiirtoi? Ogeer ak obwat ngo mi arogenet age tugul ne u arogenennyu, ne kigiyaiywa, Ne kiinyalilena Jehovah eng’ betutab neregekyik che ng’wonen.

¹³ Kiiyok inendet mat eng’ barak koyokyi kowekyuk, ak kiiterter maata kowek: Kiriich mestet konam kelyekyuk, kigoweekya let; Kigoyaa aek banan ak atanui bet komugul.

¹⁴ Kirat eunnyi chogitab bistaosiekyuk: Kigonamgei tugul, kigoit kaatinnyu; kigoges kimnatennyu: Kigondea Kiptaiyat eunekwak, ne ma amuchi atonon agirinda.

¹⁵ Kigoyai Kiptaiyat bik tugul che nyigonen koek buch eng’ kwenunnyu; Kigoguurja tuiyet ne kiging’at kole kotuatui neranikyuk: Kigotiechatiech Kiptaiyat bergeiyatab Juda ko u ye kitiechei ole kitue sabibuk.

¹⁶ Arire anyun agobo tuguchuto; saitoi beekab kong’ eng’ konyekyuk; Amu loo eng’ ane kagaigaindet ne kata isoobi sobondanyu: Kigoek lagokyuk kibananok, amu kigoterteris bunyot.

¹⁷ Iitoi Sion eunekyik; ago mami chi ne igoigoi inendet; Kigong’at Jehovah agobo Jakobo, kole egu bunikyik bik che menyei komoswekyik: Mi Jerusalem kwenunywa ko u kit ne muruon.

¹⁸ Bo imanda Jehovah; amu kiangelelji ng’atutiennyi: Asaok ale, ogas okwek bororiosiek tugul, ak ogeer arogenennyu: Kogimut bergeinikyuk ak neranikyuk koba koek luulenik.

¹⁹ Kiaguur chamanikyuk, ago kiiberbera: Kibekyi nganaset tisiikyuk ak boisiekyuk, Ye kicheng’jingei amitwogik kole kosoob sobonwekwak.

²⁰ Keero, ee Jehovah, amu ami bichiindo; anyalili moennyu; Kawalak muguleldanyu; amu kaangelel mising’: Rebisiei rotwetab chok eng’ ole bo sang’, mi ga ne u meet.

²¹ Kigogas ichek kole atigeni; mami chi ne igoigoa; Kigogas bunikyuk tugul agobo nyalildanyu; boiboi ichek amu kiiyai ko u noto: Tun iibu betut ne kiimwaite, si kegergeitu ak ichek.

²² Ingobwa taing’ung’ yaitwogikwak tugul; Ak iyachi ichek, ko u ye kiiyaiywa agobo bistaosiekyuk tugul: Amu chang’ tigenoikyuk, ak tanui muguleldanyu.