PILIPIK 4 - BUKUIT NE TILIL

Kitigonutik

¹ Noto anyun, tupchosiekyuk chamanik, che ating’e emosto, boiboiyennyu ak kutwennyu, olumdege anyun eng’ Kiptaiyat, chamanikyuk.

² Asome mising’ Euodia, ak asome mising’ Suntuke, koek che bo kabwatet agenge eng’ Kiptaiyat.

³ Ee, asomin aginye, kiboitiot ne bo iman kobota, ale toret kobogoriosiechu, amu kigiboisiei tugul eng’ logoiywek che miach, koboto Klement agine, ak chun alak che ki kiboitinik tugul, che mi kainaikwak bukuitab sobondo.

⁴ Oboiboitu eng’ Kiptaiyet kotugul: ak amwae kogeny ale, Oboiboitu.

⁵ Ingonaak mutyoneng’wong’ eng’ bik tugul. Kagorik Kiptaiyat.

⁶ Amogereri met eng’ kiy age tugul; ago eng’ kiy age tugul ko eng’ saet ak somet koboto kongoi, ingonaak somutikwok eng’ Jehovah.

⁷ Ak ribei kalyetab Jehovah, ne siirei kaguiyet tugul, mugulelwekwok ak kabwatutikwok eng’ Kristo Jesu.

⁸ Ne bo let anyun, che kitupche, tuguk alak tugul che bo imanda, alak tugul che bo teegisto, alak tugul che bo imanda, alak tugul che tililen, alak tugul che chamotin, alak tugul che kimwaitoe ne mie; ngo mi miein age tugul, ak ngo mi kalosunet age tugul, obwat tuguchuto.

⁹ Tuguk che kionetge ak che kiotaach ak che kiogas ak che kiogeer eng’ ane, oyai tuguchoto: ak koteb kobotok Jehovah ne bo kalyet.

Komwaei Paulo kongoi amu aiyebindab Pilipik

¹⁰ Ago koabaibaitu mising’ eng’ Kiptaiyat, ale koobwata kogeny nguno, ko kagobata betusiek che chang’; ko u ye kootinye kabwatonoto iman, ago kima otinye boroindo.

¹¹ Mang’alali amun matinye kiy: amu kianetge, eng’ atebet age tugul ne atinye ale, yama ko u noto.

¹² Angen ole ateptoi eng’ terterindo, ak angen ole ateptoi ye katesak tuguk: eng’ kiy age tugul ak eng’ tuguk tugul, ko kianetge ung’otietab biyendo ak rugutet, anyor che chang’ ak abanan.

¹³ Amuchi ayai tuguk tugul eng’ inendet ne igimita.

¹⁴ Ago kioyai ne mie, amu kiotinye yamdaet eng’ nyalildanyu.

¹⁵ Ak ongen okweget okwek Pilipik, ole eng’ taunetab logoiywek che miach, ye kingawe eng’ Makedonia, ko ma biit kaniset ne kitinyei yamdaet kobota eng’ ng’olyotab kagoitoet ak taaget, kobate okwege kityo;

¹⁶ amu agot eng’ Tesalonika ko kioyokwa atkai tugul tuguk che kiabanani.

¹⁷ Ma kele acheng’e konunet; ago acheng’e logoek che tesoksei eng’ koiteng’wong’.

¹⁸ Ago atinye tuguk tugul, ak che siirtoot: a biyong’ot, amu kiataach eng’ Epaprodito tuguk che kibunwok, che bo ng’uunet ne nyamdut, korosiot ne taagaksei, ne iboiboi Jehovah.

¹⁹ Ago inyiitwok Jehovah nenyu kit age tugul ne obononi ko u magornatosiekyik eng’ torornatet eng’ Kristo Jesu.

²⁰ Nguno anyun ingobunji Jehovah nenyo, inendet Kwandanyo, torornatet koigeny ak koigeny. Amen.

²¹ Ogat age tugul ne tilil eng’ Kristo Jesu. Igatok tupchosiek che mi kobota.

²² Igatok tugul che tililen, mising’ ko icheget che mi gab Kaisari.

²³ Ingoteb mieindab Kiptaiyat Jesu Kristo koboto tamirmirikwok.