PILIPIK 3 - BUKUIT NE TILIL

Matilei kiy ne o atebet ne bo sang’ inegei

¹ Ne bo let anyun, che kitupche, oboiboitu eng’ Kiptaiyat. Ma kaiimet iman eng’ ane asirwak tuguchuto, ago toretok okwek.

² Oribege sesenik, oribege yaikab yaitio, oribege ichek che tilegei:

³ amu ki kamuratanet achek, che saei eng’ Tamirmirietab Jehovah, ak kilosuge eng’ Kristo Jesu, ama kitinye kamang’unet eng’ borto:

⁴ agot ngamuchi amang’ge agot eng’ borto: ngobwati chi age tugul kolen tinyei kamang’unet eng’ borto, ko a siirtoot.

⁵ Kigimuratana eng’ betut ne bo sisiit, a bo keswekab Israel, a bo oretab Benjamin, Hebranindet ne bo Hebranik; eng’ ng’alekab Ng’atutiet, ko a Parisaindet;

⁶ eng’ kagiiletab ge, ko kiausaus kaniset; eng’ imanda ne mi eng’ Ng’atutiet, ko matinye lelut.

Kamkyingei Paulo mising’ konamgei ak Kristo

⁷ Ago tuguk che ki borotet eng’ ane, ko kiaiit chuto koek tugun che kigobetyo amu Kristo.

⁸ Ee iman, ak aiiti tuguk tugul koek tugun che kigobetyo amu telunatet ne bo naetab Kristo Jesu, Kiptaiyandennyu: kigobetwa tuguk tugul amu inendet, ak aiiti ale busagariek, si kobiit anyor Kristo,

⁹ ak kenyorua eng’ inendet, ko matinye imandanyu, noto ne bo Ng’atutiet, ago noto ne bunu kayanet eng’ Kristo, imanda ne bo Jehovah eng’ kayanet:

¹⁰ si kobiit anai inendet, ak kamuktaet ne bo ng’eetyennyi, ak yamdaet ne bo nyalilwogikyik, kirogendoena meennyi;

¹¹ si kobiit anyor eng’ or age tugul aiityi ng’eetyetab che kibek.

¹² Ma kele kianyoru, ama kele kiaegu ne igesunotgei: ago agiiljinige tai, si kobiit anam noto ne kiigochi Kristo Jesu konamena.

¹³ Che kitupche, maiiti ane ale kaanam: ago ayae kit agenge, autie tuguk che mi let eng’ ane, ayogochinige tuguk che mi tai.

¹⁴ Agiiljinige tai, ait ole boch melekto ne bo kuuretab barak ne bo Jehovah eng’ Kristo Jesu.

¹⁵ Noto anyun, ongibwat achek che kigesunotinge ko u noto: ak ngobwat kiy ne ter eng’ ng’olyo age tugul, ko ta kong’ang’wok Jehovah nito agine:

¹⁶ ago, yoto kogeit, ko ongebendate ng’atutionoto.

Kaborunetab Paulo ne kanyol Kisub

¹⁷ Che kitupche, oegu che yaei tuguk che ayae, ak ogeer ichek che bendoti ko u kaborunet ne ogeerenech.

¹⁸ Amu bendoti che chang’ che kiamwawok kotugul agobo ichek, ak nguno amwawok eng’ rirek, ale icheget ko bunikab kimurtoiyotab Kristo:

¹⁹ ne kagesunenywa ko luset, ne cheptalelinywa ko moet, ne kalosunenywa ko tewernatenywa, che ibwati tugukab ng’ony.

²⁰ Amu ki bikab kipsengwet: che kigeni Yetindet kobun oloto, Kiptaiyat Jesu Kristo:

²¹ ne tun walei kileelit bortanyo ne bo nyerotiet, si kobiit kogergeit ak bortanyi ne bo lilindo, eng’ kamugonato imuchi koyai tuguk tugul kogas it inendet.