PILIPIK 2 - BUKUIT NE TILIL

Komakyin bik yamdaet agenge

¹ Ngo mitei anyun kagaigaet age tugul eng’ Kristo, ngo mi saisaet age tugul ne bo chamnyet, ngo mi yamdaet age tugul ne bo Tamirmiriet, ngo mi rirenosiek ak rirge,

² osulde anyun boiboiyennyu, si oegu che bo kabwatet agenge, otinye chamnyet agenge, o bo yamdaet agenge, che bo maget agenge.

Komakyin bik kaming’inetab ge

³ Amoyai kiy age tugul eng’ toiyet, anan eng’ kalosunetab ge, ago eng’ kaming’inetab ge ne bo naet, koiiti chi age tugul chito age kole kaigai kosiir inendet;

⁴ amat kogeer chi age tugul eng’ okwek tugukyik kityo, ago chi age tugul eng’ okwek kogeer tugukab bik alak agichek.

Kaborunet ne bo Jesu ibortoi kaming’inetab ge ak esioetab ge

⁵ Ingotebenok ateboni, ne kimi agine eng’ Kristo Jesu:

⁶ ne, nganda kitinye itondab Jehovah, ko ma iit kole kit ne bo kamanut ne o kole kogergeit ak Jehovah,

⁷ ago kigaigei inendet koek buch ak konam itondab otwogindet, kogergeit ak bik;

⁸ ak kingotook eng’ itondab chi, koming’ingei, kogas it agoi meet, ee, meet ne bo kimurtoiyot.

⁹ Noto anyun, kiitoror Jehovah inendet mising’, ak kogochi inendet kainet ne siirei kainet age tugul;

¹⁰ si kobiit kogutuny kutundo age tugul eng’ kainetab Jesu, age tugul ne mi kipsengwet, ak ne mi ng’ony ak ne mi ng’ony orit,

¹¹ si kong’any ng’elyepta age tugul kole Jesu Kristo ko Kiptaiyat, agoi torornatetab Jehovah Kwanda.

Kanyol kosulda sorunet eng’ atebetab chi

¹² Noto anyun, chamanikyuk, ko u ye koogase it kotugul, ma ye ami kityo, ago nguno ye mami ogase it kosiir, oboisie yetuneng’wong’ kosulda eng’ kaiyweisiet ak botanet;

¹³ amu Jehovah ne boisiei eng’ okwek si omach, ak oboisie agine, agobo magennyi ne mie.

¹⁴ Oyai tuguk tugul ama eng’ kang’unyng’unyosiek ak tiiyosiek;

¹⁵ si kobiit oegu che matinyei lelut ak ko libwoben, lagokab Jehovah che matinyei kunenden eng’ kwenutab ibinda ne kunur ak ko mastaat, che koluu eng’ kwenunywa ko u lapkeiyosiek eng’ ng’ony,

¹⁶ obortoi ng’olyotab sobondo; si kobiit anyor ne alosunege eng’ betutab Kristo, ale kima alabat buch anan aboisie buch.

¹⁷ Ee, agot ngerong’ja baragutab kaptisisiet ak otisietab kayaneng’wong’, ko abaibai, ak agasige kobotok okwek tugul:

¹⁸ ak ko u noto oboiboitu ak okwek, ak ogase ge kobota.

Timoteo

¹⁹ Ago amang’u eng’ Kiptaiyat Jesu ale ayokwok Timoteo ko negit, si anyor agane kagaigaet ne mie, ye kaanai atebeng’wong’.

²⁰ Amu matinye chi age ne kergei kabwatennyi ak nenyu, ne ribei iman atebeng’wong’.

²¹ Amu cheng’ei ichek tugul chechuak, ma tuguk che bo Jesu Kristo.

²² Amu ongen atebennyi komie, ole, ko u lakwet ak kwanda, ko kibois kobota eng’ logoiywek che miach.

²³ Amang’u anyun ale, ayokwok inendet nguno, eng’ sait ye kaageer ole ateptoi:

²⁴ ago amang’u eng’ Kiptaiyat ale anyone anendet agane ko negit.

Epaprodito

²⁵ Ago kiabwat ale nyolu ayokwok Epaprodito, tupchennyu ne kiboitiot ne kiboisiei tuwai ne askarindet kobota, ak ko neng’wong’ ne kiyoktoi ak toretindet agobo tuguk che amakyinige;

²⁶ amu kiting’enok emosto okwek tugul, ak kitinye nyalilda ne o, amu kiogas kele kimiani inendet:

²⁷ amu kimian iman, kot ko negit kome: ago kirire Jehovah inendet; ago ma eng’ inendet kityo, ago eng’ ane agane, si manyoru arogenet eng’ arogenet.

²⁸ Kayogu inendet anyun eng’ kagiiletab ge ne o, si, ye ogeer inendet kogeny, omuchi oboiboitu, si kowisisit arogenennyu.

²⁹ Otaach inendet anyun eng’ Kiptaiyat eng’ boiboiyet tugul; ak ogonyit che u noto:

³⁰ amu ki negit kome agobo boisietab Kristo, ko marire sobondanyi si konyiitwa kit ne ki rartaat eng’ boisieng’wong’ ne kioboisiewa.