PILIPIK 1 - BUKUIT NE TILIL

Kagatet

¹ Paulo ak Timoteo, otwogikab Kristo Jesu, kisirjini tugul che tililen eng’ Kristo Jesu che mitei Pilipi koboto ribikab kaniset ak kiboitinik:

² Ingoteb mieindo kobotok ak kalyet che bunu Jehovah Kwandanyo ak Kiptaiyat Jesu Kristo.

Kongoi ne bo koboto boiboiyennyi

³ Amwachini Jehovah nenyu kongoi agobo kabwatennyu tugul ne abwatok,

⁴ eng’ somennyu age tugul agobo okwek tugul, asome eng’ somennyu eng’ boiboiyet kotugul,

⁵ amu yamdaeng’wong’, eng’ logoiywek che miach koboch betut ne bo tai agoi betuni;

⁶ angen komie ng’olyondonito, ale inendet ne kitoi boisiet ne mie eng’ okwek koyaei kosulda agoi betutab Jesu Kristo:

⁷ ko u ye mie eng’ ane abwat ko u nito agobo okwek tugul, amu omi muguleldanyu, amu eng’ monjorornatennyu, ak eng’ ripset ak kagimitetab logoiywek che miach, okwek tugul ko o yamdoik kobota eng’ mieindo.

⁸ Amu Jehovah baoriandennyu, ko u ye ating’enok okwek tugul emosto eng’ rirenosiekab Kristo Jesu.

Saet ne sachin Paulo bik che somani baronokyik

⁹ Ak ni ko saennyu ale kotesak chamnyeng’wong’ mising’ inne eng’ naet ak kaguiyet tugul;

¹⁰ si kobiit onai komie tuguk che bo telunatet; si kobiit oegu che matinyei kenisiet, che matinyei kanagut agoi betutab Kristo;

¹¹ ko o nyiitotin eng’ logoekab imanda, che bunu Jesu Kristo, agoi torornatet ak kalosunetab Jehovah.

Tuguk che kibiitune ratet ne kigirat Paulo

¹² Ago amache, che kitupche, ale, onai ole tuguk che kibwanja, ko kigotoret logoiywek che miach koba tai;

¹³ kot kotook monjorornatennyu agobo Kristo eng’ askarik tugul che bo gab laitoriat, ak eng’ bik alak tugul;

¹⁴ ak tinyei che chang’ eng’ che kitupche eng’ Kiptaiyat nyiganatet ne o kosiir, komwaita ng’olyotab Jehovah ama eng’ kaiyweisiet, amu tinyei kamang’unet agobo monjorornatennyu.

¹⁵ Amdoi alage Kristo eng’ ng’etkonda, ak suriet; koamdoi alage agichek eng’ kabwatutik che miach;

¹⁶ amdoi alage eng’ chamnyet, kongen kole kigindea arib logoiywek che miach:

¹⁷ ago amdoi alage Kristo eng’ toiyet, ma eng’ mugulelwek che leelach, kolen teswa nyalilda eng’ monjorornatennyu.

Kibaibai Paulo amu kigiamdoi Kristo

¹⁸ Nee anyun? Kobate kityo eng’ oret age tugul, ngo eng’ kenisiet anan ngo eng’ imanit, keamdoi Kristo; ak abaibai eng’ noto, ee, ak ta abaibaitu.

¹⁹ Amu angen ale walaksei nito koegu yetunennyu, eng’ someng’wong’, ak ne konu Tamirmirietab Jesu Kristo.

²⁰ Ko u eng’ kagenisiennyu ne ageni mising’ ak kamang’unennyu, ale magigona alilan eng’ kiy age tugul ago eng’ nyiganatet tugul, ko u kotugul, ko u noto agine nguno kitorori Kristo eng’ bortanyu, ngo eng’ sobondo, anan eng’ meet.

Kaigai sobet anan meet?

²¹ Amu eng’ ane ngasobe ko Kristo, ak ngamee ko borotet.

²² Ago ngasobe eng’ borto, - ngo nito logoekab boisiennyu, ko mangen anyun ne aleweni.

²³ Amu kagigikya kwenutab tuguk aeng’, atinye maget awa ketebi ak Kristo; amu mie noto mising’ kosiir:

²⁴ ago ngatebi eng’ borto konyolu kosiir agobo okwek.

²⁵ Ak atinye kamang’unoni, ak angen ale atebye, ee, ak ta atebye kobotok okwek tugul, agobo teseng’wong’ bo tai ak boiboiyet eng’ kayanet;

²⁶ si kobiit kotesak kalosuneng’wong’ eng’ Kristo Jesu eng’ ane, amu ami kobotok kogeny.

Komwachin bik konyiganitu

²⁷ Ago ingoek atebeng’wong’ ne nyoljin logoiywek che miach che bo Kristo: si ngot anyo ageerok anan ngo mami ane, amuchi agas agobo atebeng’wong’, kele otonondosi komie eng’ tamirmiriet agenge, eng’ muguleldo agenge ogiilige agobo kayanetab logoiywek che miach;

²⁸ amat komuok bunik eng’ kiy age tugul: noto kaborunet ne toogunot ne bo luset eng’ ichek, ago bo yetuneng’wong’, ak bunu noto Jehovah;

²⁹ amu kigigonok agobo Kristo, ma oyan inendet kityo, ago onyalilye agobo inendet:

³⁰ otinye lugonoto kiogeerena, ak ogase nguno kele mi eng’ ane.