PILEMON 1 - BUKUIT NE TILIL

Ng’alek che indou

¹ Paulo, kimonjororiotab Kristo Jesu, ak Timoteo tupchennyo, kisirjini Pilemon chamanennyo ne kiboitiot ne kiboisiei tugul,

² ak Apia, chepkamennyo, ak Arkipa askarindet ne kiboisiei tugul, ak kaniset ne mi gong’ung’:

³ Ingoteb mieindo kobotok ak kalyet, che bunu Jehovah Kwandanyo ak Kiptaiyat Jesu Kristo.

Rirenet ne kigisomji otwogindet ne kiga komwei

⁴ Amwachini Jehovah nenyu kongoi kotugul, amwain eng’ sautikyuk,

⁵ agase agobo chamnyeng’ung’, ak kayanet ne itinye eng’ Kiptaiyat Jesu, ak eng’ che tililen tugul;

⁶ si koek yamdaetab kayaneng’ung’ ne boisie komie, eng’ naetab kiy age tugul ne mie ne mitech, eng’ Kristo.

⁷ Amu kiatinye boiboiyet ne o ak kagaigaet eng’ chamnyeng’ung’, amu kigonyor kamuung’et mugulelwekab bik che tililen agobo inye, ne kitupche.

⁸ Noto anyun, agot nga ndatinye nyiganatet eng’ Kristo si ang’atin agobo noto ne nyolu,

⁹ ago, amu chamnyet asomin mising’, ane Paulo ne koaositu, ak nguno kogeny ko a kimonjororiot ne bo Kristo Jesu:

¹⁰ asomin mising’ agobo lakwennyu Onesimo, ne kiasich eng’ monjorornatosiekyuk,

¹¹ inendet ne kima kotoretin eng’ kiy eng’ tai, ago nguno kotoretin ak kotoreta:

¹² ne kaaweegun inendet ne muguleldanyu:

¹³ ne kitamache arany ketebi tuwai, si kotoreta kogeerenengei eng’ monjorornatosiekab logoiywek che miach:

¹⁴ ago ma amach ayai kiy kotom agas kit ne ibwati; si mabun mieindang’ung’ torjinet, ago chamdaeng’ung’.

¹⁵ Amu abere kiibesienengei eng’ betusiek che matia, si kobiit otebi tuwai kogeny agoi;

¹⁶ ma ko u otwogin kogeny, ago kogosiir otwogin, tupchet ne chamat, mising’ ko eng’ ane, ago siirei ne tia anyun eng’ inye, eng’ borto ak eng’ Kiptaiyat.

¹⁷ Noto anyun ngiita ile ki agenge eng’ boisiet, itaach anyun ko u ye imuchi itaacha anendet.

¹⁸ Ago ngo kigoyaun kiy ne ya, anan ngo kigobesenin kiy, iitya noto;

¹⁹ anendet Paulo ne kasir eng’ eunnyu, ale ayaagun; ago mamwaun ale itinye besendanyu, u kele, inyendet noto.

²⁰ Ee, tupchennyu, inganyorunenen boiboiyet eng’ Kiptaiyat: imuung’ji muguleldanyu eng’ Kristo.

Ng’alek che bo let

²¹ Kasirun amu amang’u kaseng’ung’ bo it, angen ale iyae agot che siirei che amwae.

²² Ago koboto choto ichobwa ole anyo arue: amu amang’u ale eng’ sautikwok amuchi abiit.

²³ Igatin Epapra ne ki kimonjororinik tuwai, eng’ Kristo Jesu;

²⁴ ko u noto Mariko, Aristarko, Dema, ak Luka, che ki kiboitinik tugul.

²⁵ Ingoteb mieindab Kiptaiyandennyo Jesu Kristo koboto tamirmirikwok. Amen.