OBADIA 1 - BUKUIT NE TILIL

Kiming’ini menotetab Edom ak kieeti Israel

¹ Ng’ang’utietab Obadia. Mwaei Kiptaiyat Jehovah ko u ni agobo Edom: Kigegas ng’alek che bunu Jehovah, ak kigiyokto tononjinindet kwo oldab bororiosiek, kolenji, Ong’eetye, ong’eetye, kegirinde inendet eng’ luget.

² Keero, kiaming’inin eng’ bororiosiek: kisasin mising’.

³ Kigoberberin menotetab muguleldang’ung’, ee inye ne imenye ole kibetak eng’ ruandet, ne toror meng’otennyi; ne mwaei eng’ muguleldanyi kole, Ng’o ne tururwa?

⁴ Agot ngitiriren iwe barak mising’ ko u kipsichit, agot ngiteech kesweng’ung’ ole mi kecheik, atururun eng’ oloto, mwaei Jehovah.

⁵ Ngot kobwanjin chorik, ngot kobwanjin rebik kemoi, (kebarin ne tia anyun!) Ko tos machorsei kot konyor che yamei? Ngot kobwanjin bik che butei sabibuk, ko tos mabagaktoi turonik?

⁶ Kisiaktoi ano tugukab Esau! Kicheng’doi ano konoraikyik che ung’otin!

⁷ Kigoonin bik tugul che kionamege kot iit kiwoto: kigong’alin bik che kioting’ege kalyet, ak koterterin; riichin ichek che amei amitwogiguk: matinyei kaguiyet inendet.

⁸ Tos mang’eme bik che ng’omen che bo Edom, eng’ betunoto, mwaei Jehovah, ak ang’em naet eng’ tulwetab Esau?

⁹ Ak toptobendos mureniguk che nyigonen, ee Teman, si kobiit kebar chi age tugul eng’ tulwetab Esau eng’ barisiet.

¹⁰ Tuchin tewernatet amu koromnatet ne kiiyachi ng’etab komet Jakobo, ak kebarin ak keisten koigeny.

¹¹ Eng’ betut ne kiitononi eng’ bitonin, eng’ betut ne kiibe toek tugukyik, ak kochut kipsagarek ormarichokyik, ak koser barbarek agobo Jerusalem, ko kiige inye age eng’ ichek.

¹² Ago amat igeer betutab ng’etab komet eng’ betutab tiritindanyi, amebaibaitu eng’ lagokab Juda eng’ betutab ng’emisienywa; anan ing’alal eng’ menotet eng’ betutab bichiindo.

¹³ Amechut ormarichetab bikyuk eng’ betutab nyalildanywa; ee, amegeer usisienywa eng’ betutab nyalildanywa, anan onam tugukwak eng’ betutab nyalildanywa.

¹⁴ Ametonone ole tuiyechin ortinwek, ile itilde bikyik che chilildos; amegoite bikyik che ng’etu eng’ betutab bichiindo.

¹⁵ Amu karikyi betutab Jehovah bororiosiek tugul: ko u ye kiiyai keyaun ko u noto; weekyingei meting’ung’ boisioniguk.

¹⁶ Amu ko u ye kioeeise eng’ tulwennyu ne tilil, eeisei ko u noto kotugul bororiosiek tugul, ee, eeisei, ak koterteriot, ak koigei tuguk che kima komi.

¹⁷ Ago biitu che chilildos eng’ tulwetab Sion, ak kotililit; ak konam gotab Jakobo tugukab bichoto, kobunji.

¹⁸ Ak koek gotab Jakobo mat, ak koek gotab Josep liblibenet, ak koek gotab Esau mobek, ak kolalyo eng’ kwenunywa ak kobeel koges: ama ng’etu chi eng’ gotab Esau; amu kagomwa Jehovah ng’olyondonito.

¹⁹ Ak konam ichek che bo Murot ne to Tai tulwetab Esau kobunji; ak konam ichek che menyei emet ne soi, Pilistik: ak konam emetab Epraim kobunji, ak emetab Samaria: ak konam Benjamin Gilead.

²⁰ Ak konam che kiga keluul che bo lugonito bo lagokab Israel che mi kwenutab Kananik, namei ichek kot koit Sarepat; ak namei che kiga keluul che bo Jerusalem, ne mi Separad, nganasok che mi Murot ne bo Tai.

²¹ Ak togosu sorunik tulwetab Sion koruokyi tulwetab Esau; ak kobunji bounatet Jehovah.