NG'ATUTIK 9 - BUKUIT NE TILIL

Kobwatyin Musa Israelik ngelelnatosiekwak

¹ Ogaso, ee Israel: ilandoe rani Jordan iwendi iluule bororiosiek che eechen che kimen kosiirin, ak nganasok che eechen che kiging’ote irimosiek che itei barak,

² bik che eechen che koen, werikab Anagik, che ingen, che kiigase kemwaei ko u ni, Ng’o ne imuchi kotonon eng’ taitab werikab Anak?

³ Nai anyun rani ile, Jehovah Kamuktaindeng’ung’ ne landoi kondoenen ko u mat ne iwong’u; ng’emei bichoto, ak kogochi konyeratitu eng’ taing’ung’: ione anyun ko u noto, ing’em ichokyi ko u ye kimwaun Jehovah.

⁴ Amat imwa eng’ muguleldang’ung’ ye kagoon Jehovah ichek eng’ taing’ung’ ile, Kiitya Jehovah emoni kobunja amu imandanyu: ago onei Jehovah bororiosiechu eng’ taing’ung’ amu sogornatenywa.

⁵ Ma eng’ imandang’ung’, anan atebeng’ung’ ne mie, ne kagonin inam emenywa: ago onei Jehovah Kamuktaindeng’ung’ bororiosiechu eng’ taing’ung’ amu sogornatenywa, si kobiit kogimit Jehovah ng’olyot ne kiiyosiechi kwanisieguk Abraham, ak Isak, ak Jakobo.

⁶ Nai anyun ile, magonin Jehovah Kamuktaindeng’ung’ kobunjin emoni mie amu imandang’ung’; amu o bik che uuen metowek.

⁷ Ibwat, ameutie, chang’indab tagisiet ne kiitach Jehovah Kamuktaindeng’ung’ eng’ ong’atet: koboch betut ne kiimong’une emetab Misri, agoi oitu yu, ko kiongelelji Jehovah.

⁸ Ak kiotach Jehovah eng’ Horeb agine, kot konerech Jehovah komachei kobarak.

⁹ Ye kiatogoste tulwet ataach koik che lebelen, choto ko koikab kayomisiet ne kiyai Jehovah kobotok, atebi anyun eng’ tulwet betusiek artam ak kemousiek artam; maam amit amaee beek.

¹⁰ Ak kigona Jehovah koichato aeng’ che lebelen che kigisir eng’ mornetab Kamuktaindet; kigisirji ko u ng’alek tugul, che kimwawok Jehovah eng’ tulwet komong’une mat eng’ betutab tuiyet.

¹¹ Ak kingobata betusiechoto artamu ak kemousiek artam, kogona Jehovah koichato aeng’, choto bo kayomiset.

¹² Ak kilenja Jehovah, Ng’eet, chortege chakte; amu kagong’emgei biguk che kiimutune Misri; kesib komasta eng’ oret ne kiang’at; kagoyachigei kanamwet ne kitanyi.

¹³ Ak king’alalwa Jehovah kogeny, kole, Kaageer bichu, keero, bik che uuen metowek:

¹⁴ unda, si awong’, abukto kainenywa eng’ kureretab kipsengwet: ak ayain iegu bororiet ne kim ak ko o kosiir ichek.

¹⁵ Aweege anyun, achoruge eng’ tulwet, ak kilalei mat eng’ tulwet: atinye koichato aeng’ bo kayomiset eng’ eunekyuk tuwai.

¹⁶ Ak kiageer, ogeero, kioyachi tengekto Jehovah Kamuktaindeng’wong’; kiga otang’jigei itondab moita: kiga omaste ochakte omete oret ne king’atak Jehovah.

¹⁷ Ak kianam koichato tuwai, ak awirte, ak atui eng’ taing’wong’ ogeere.

¹⁸ Kiabutyi ng’ony eng’ taitab Jehovah betusiek artam, ko u ye kiayai eng’ tai; ma am amit ama ee beek; amu tengektang’wong’ tugul ne kioyai, kioyai ne ya eng’ Jehovah, otach inendet.

¹⁹ Amu kiaiywei neregek ak nyitatet ne ng’wan, ne kinerekyok Jehovah komachei kobarak. Ago kigaswa Jehovah betunoto agine.

²⁰ Ak kinerekyi Jehovah mising’ Aron komachei kobar: kiasa agobo Aron eng’ yoto agine.

²¹ Kiaib anyun tengektang’wong’, moita ne kiga oyai, abeel, atui, ang’a komengegitu, agoi kotambululitu: yeityo arong’ji kererut ne rootune tulwet.

²² Ak kiotach Jehovah kogeny eng’ Tabera, ak Masa, ak eng’ Kibrot-hataaba.

²³ Ak ye kiiyoktok Jehovah eng’ Kades-barnea kolenjok, Otogoste onam emet ne kiagonok; obistoe ng’atutietab Jehovah Kamuktaindeng’wong’, ama oyan inendet, anan ogas it kutinnyi.

²⁴ Kiongelelji Jehovah koboch betut ne kianaenak.

²⁵ Kiabutyi ng’ony eng’ taitab Jehovah eng’ betusiechoto artam ak kemousiechoto artam; amu kigale Jehovah, Awong’wok.

²⁶ Ak kiasa Jehovah ale, Ee Kiptaiyat Jehovah, amewong’u biguk che boroteng’ung’, che kiitaach eng’ etunateng’ung’, che kiimong’u eng’ Misri eng’ eut ne kim.

²⁷ Ibwat kiboitiniguk, Abraham, Isak, ak Jakobo; amat igeer uuindab met ne bo bichu, anan yaitienywa, anan tengektanywa:

²⁸ si male emet ne kiimoong’unenech, Amu ma imuch Jehovah komut ichek koit emet ne kiiarorji, ak amu wechei, kiimong’ si kobiit kobar eng’ ong’atet.

²⁹ Ago icheget ko biguk ak ko boroteng’ung’, che kiimoong’u eng’ kimnateng’ung’ ne o ak eng’ eung’ung’ ne chuulat.