NG'ATUTIK 8 - BUKUIT NE TILIL

Kigiili bik kogas it ye itigoni Jehovah ichek

¹ Orib oyai ng’atutiet komugul ne kang’atin rani, si osopche, ak otesage, ak obe onam emet ne kiiyosiechi Jehovah kwanisiekwok.

² Ak ibwat oret komugul ne kigomutunenen Jehovah Kamuktaindeng’ung’ eng’ kenyisiechu artam eng’ ong’atet, si koming’inin, kotiemin, konai kit ne mi muguleldang’ung’, ngichame irib ng’atutik, anan ngo mechame.

³ Ak kiiming’inin, kigonin koamin rubet, ak kibaenen mana, che kima inai, agot kwanisieguk; si kogonin inai ile masobei chi eng’ amdit kityo, ago sobei chi eng’ kiy age tugul ne mong’une kutitab Jehovah.

⁴ Kima osegitu ngoroiguk che kiilaachi, anan kobwanso kelyeguk, eng’ kenyisiechoto artam.

⁵ Ak iguiye eng’ muguleldang’ung’ ile, ko u ye itigoni chi werinnyi, ko u noto itigonin Jehovah Kamuktaindeng’ung’.

⁶ Rib anyun ng’atutikab Jehovah Kamuktaindeng’ung’, ibun ortinwekyik, ak iywei.

⁷ Amu keitin Jehovah Kamuktaindeng’ung’ emet ne kararan, emetab kererusiek, ak kong’ikab beek, ak keringonik che kutune beek eng’ atebwosiek ak tulonok;

⁸ emetab nganok ak sairik, ak sabibuk ak mogoonik ak logoek alak che eechen; emetab emitik che bo mwanik ak kumik;

⁹ emet ne iamisiei ama biitu rubet, ama rerun kiy eng’ oloto; emet ne koikyik ko karik, ak ibale tulonokyik sugunonik.

¹⁰ Ak iamisie ibiye, ak ilosu Jehovah Kamuktaindeng’ung’ amu emet ne mie ne kagonin.

¹¹ Ripgei anyun, si meutie Jehovah Kamuktaindeng’ung’, imete ng’atutikyik, ak kiruogutikyik, ak konetisiosiekyik, che kang’atin rani:

¹² si ye kaiamisie ibiye, ak iteech gorik che kororon, ak imeny;

¹³ ak ye katesogis akwotisieguk ak kechireguk, ak fedaisieguk ak tahabu, ak kotesogis tuguk tugul che itinye;

¹⁴ eng’ noto anyun imen, iutie Jehovah Kamuktaindeng’ung’, ne kiimutun imong’une emetab Misri eng’ gotab otwognatet;

¹⁵ ne kiindoun eng’ ong’atet ne o ne bo kamuiset, ole mi erenok che ng’wonen susenywa ko u mat ak tagolik, emetab melelda ole mami beek; ne kiinagin beek komong’une ruandet ne uui:

¹⁶ ne kibaenen mana eng’ ong’atet, che kima nai kwanisieguk; si koming’inin, ak kotiemin, si koyaun ne mie eng’ let:

¹⁷ ak ile eng’ muguleldang’ung’, Kagona kimnatennyu ak kamugetab eunnyu magornatoni.

¹⁸ Ago ibwat Jehovah Kamuktaindeng’ung’, amu inendet ne konin kimnatet ne inyorune magornatet: si kogimit kayomisennyi ne kiiyosiechi kwanisieguk, ko u rani.

¹⁹ Ak ngiutie Jehovah Kamuktaindeng’ung’, isub kanamonik, iot, ak igutung’ji, abaoriani agobo okwek rani ale olustosi iman.

²⁰ Ko u bororiosiek che ng’emei Jehovah eng’ taing’wong’, olustosi ak okwek ko u noto; amu kima ocham ogas kutitab Jehovah Kamuktaindeng’wong’.