NG'ATUTIK 7 - BUKUIT NE TILIL

Keete Israelik konamgei ak bikab Kanan

¹ Ye kagoitin Jehovah Kamuktaindeng’ung’ emet ne iwendi iname kobunjin, ak koon bororiosiek che chang’ eng’ taing’ung’, Hitik, Girgasik, Amorik, Kananik, Perisik, Hibik, ak Jebusik, bororiosiek tisab che eechen ak ko kimen kosiirin;

² ak ye kagonin Jehovah Kamuktaindeng’ung’, ibar anyun iwong’u amoarorjige kiy koboto ichek, anan irire:

³ anan ogan ge; amegochi cheptang’ung’ werinnyi, anan itunji wering’ung’ cheptanyi.

⁴ Amu tun imaasi wering’ung’ si maisuba, ak koot kanamonik: eng’ noto anyun kolalyo neregekab Jehovah eng’ okwek, ak kong’emin kochokyin.

⁵ Ago oyachi ko u ni; obut kapkorosusiekwak, ak otonaton tolochikwak, ak oeb Aserik, ak obeel kanamonikwak.

⁶ Amu i bororiet ne itabanat eng’ Jehovah Kamuktaindeng’ung’: kilewenin Jehovah Kamuktaindeng’ung’ iegu bororiet ne nenyi inegei, eng’ bororiosiek tugul che mi ng’ony.

⁷ Amu kima chamak Jehovah, kolewenok, amu ki o chang’ kosiir bik alak (ki o ng’ering’ kosiir bik tugul):

⁸ ago amu kichamak Jehovah, ak kimach korib kayosiet ne kiiyosiechi kwanisiekwok, kiimoong’wok anyun Jehovah eng’ eut ne kim, kotiachak eng’ gotab otwognatet, eng’ eutab Parao, laitoriatab Misri.

⁹ Nai anyun ile Jehovah Kamuktaindeng’ung’, ko Kamuktaindet; Kamuktaindet ne bo imanda, ne ribei kayomisiet ak rirenet eng’ ichek che chamei inendet ak koribei ng’atutikyik agoi ibindab elfut;

¹⁰ ak koyaakyi mugetut che wechei inendet kegeerei, si kong’em ichek: maigaigei eng’ ne wechei, igeerjin kegeerei.

¹¹ Rib anyun ng’atutik, ak konetisiosiek, ak kiruogutik, che kang’atin rani, iyai.

¹² Amu ye ogase kiruogutichu, ak oribe, ak oyae, korib anyun Jehovah Kamuktaindeng’ung’ kayomiset ak rirenet eng’ inye ne kiiyosiechi kwanisieguk;

¹³ ak kochamin, ak koberurin, ak kotesin: ak koberur iyoteng’ung’ ak ruratetab emeng’ung’, beguk ak beekab logoeguk, ak mwaniguk, ak bitatetab tuguk ak che bo kechireguk, eng’ emet ne kiiyosiechi kwanisieguk kole konin.

¹⁴ Kiberurin kosiir bik tugul: mabiitu ne soneni ne muren anan ne kobogorio eng’ okwek, anan eng’ tukwok.

¹⁵ Ak koistoenen Jehovah mianwek tugul; ak magonin korotwek che yaach che bo Misri, che ingen, ago igochin tugul che wechin.

¹⁶ Ak iwong’u bororiosiek tugul che konin Jehovah Kamuktaindeng’ung’; amat irire ichek: anan iot kanamonikwak; amu egu mestet eng’ inye noto.

¹⁷ Ngimwa eng’ muguleldang’ung’ ile, Chang’ bororiosiechu kosiira; aondoi ano?

¹⁸ Ameiywei bichoto: ibwat mising’ ne kiyachi Jehovah Kamuktaindeng’ung’ Parao, ak Misri komugul;

¹⁹ tiemisiosiek che eechen che kiigeer eng’ konyeguk, ak kaborunoik, ak kwong’utik, ak eut ne kim, ak eut ne chuulat, che kiimoong’unenen Jehovah Kamuktaindeng’ung’: yaachin ko u noto Jehovah Kamuktaindeng’ung’ bororiosiek tugul che iywei.

²⁰ Ak ne siirei choto koyokyin Jehovah Kamuktaindeng’ung’ ichek karamik, agoi kowong’gei eng’ taing’ung’ che unyegei che kang’et.

²¹ Amongomuok: amu mi Jehovah Kamuktaindeng’ung’ kwenung’ung’, Kamuktaindet ne o ne bo kamuiset.

²² Ak koon Jehovah Kamuktaindeng’ung’ bororiosiechoto eng’ taing’ung’ mutyo: manyol ibar iwong’u eng’ yoto, si machang’achin tiong’ikab timin.

²³ Ago konin ichek Jehovah Kamuktaindeng’ung’ eng’ taing’ung’, ak kobarei ichek eng’ baret ne o, agoi kowong’gei.

²⁴ Ak konde laitorinikwak euneguk, ak ibet kainenywa eng’ kureretab kipsengwet: mabiitu chi ne imuchi kotonon eng’ taing’ung’, ibare kowong’gei.

²⁵ Obeel kanamonikab cheptalelisiekwak: amat igase miat feda anan tahabu che mi kanamonichoto, anan iipchige, si mariichin: amu wechei noto Jehovah Kamuktaindeng’ung’;

²⁶ ameib kit ne kiwechei kwo gong’ung’, si meegu ne istoot ko u kioto: wech mising’, ak iesie kioto; amu kigeisto.