NG'ATUTIK 6 - BUKUIT NE TILIL

Kagiilet agobo kasetab it.

¹ Ni ng’atutiet anyun, ak konetisiosiek, ak kiruogutik, che king’at Jehovah Kamuktaindeng’wong’ kinetak, si kobiit oyai eng’ emet ne olandoi oname kobunjok.

² Si kobiit igonyit Jehovah Kamuktaindeng’ung’, ak irib konetisiosiekyik tugul ak ng’atutikyik, che ang’atin, inye, ak wering’ung’, ak mochogoreng’ung’, betusieguk tugul kote isobe; si kochang’ait betusieguk.

³ Ogaso, ee Israel, ak orib oyai; si komieit eng’ inye, ak ochang’aitu mising’, eng’ emet ne nyiitat chego ak kumik, ko u ye kiiarorun Jehovah, Kamuktaindetab kwanisieguk.

⁴ Ogaso, ee Israel; agenge Jehovah Kamuktaindennyo:

⁵ ak kanyol icham Jehovah Kamuktaindeng’ung’ eng’ muguleldang’ung’ tugul, ak eng’ sobondang’ung’ tugul, ak eng’ kimnateng’ung’ tugul.

⁶ Ak ingotebe muguleldang’ung’ ng’alechu kang’atin raini:

⁷ ak inet lagoguk eng’ kagiiletab ge, ak ing’alale ye itebye eng’ gong’ung’, ak ye iwendoti eng’ oret, ak ye irue, ak ye ing’eete.

⁸ Ak iratyi eung’ung’ si koek kaborunet, ak koek ratutik che kirate anok eng’ turietab togeng’ung’.

⁹ Ak isirji tugatugikab gong’ung’, ak ormarichoguk.

¹⁰ Ak ye kagomutin Jehovah Kamuktaindeng’ung’ iwe emet ne kiiyosiechi kwanisieguk, Abraham, Isak, ak Jakobo, kole konin; nganasok che eechen ak ko miachen che kima iteeche,

¹¹ ak gorik che nyiitotin tuguk tugul che miachen, che kima inyiiti, ak keringonik che bo beek che kima ibale, mbarenikab sabibuk ak emitik, che kima imine, ak iam ak ibiye;

¹² ripge anyun si meutie Jehovah, ne kiimutun imong’une emetab Misri, eng’ gotab otwoknatet.

¹³ Iywei Jehovah Kamuktaindeng’ung’; ak iot, ak iyosie eng’ kainennyi.

¹⁴ Amosub kanamonik, agot che bo bororiosiek che negitenok;

¹⁵ amu tinyei ng’etkong’ Jehovah Kamuktaindeng’ung’ ne mi kwenung’ung’; si malalyo neregekab Jehovah Kamuktaindeng’ung’ eng’ inye, ak kowong’un eng’ ng’ony.

¹⁶ Amotiem Jehovah Kamuktaindeng’wong’, ko u ye kiotiem eng’ Masa.

¹⁷ Orib ng’atutikab Jehovah Kamuktaindeng’wong’ eng’ kagiiletab ge, ak baornatosiekyik, ak konetisiosiekyik, che king’atin.

¹⁸ Ak iyai ne bo iman ak ne mie eng’ taitab Jehovah: si komieit eng’ inye, si iwe inam kobunjin emet ne mie ne kiiyosiechi Jehovah kwanisieguk,

¹⁹ kole onei buniguk tugul eng’ taing’ung’, ko u ye kigomwa Jehovah.

²⁰ Ye tun teebenen wering’ung’ kole, Bo nee baornatosiechu, ak konetisiosiek, ak kiruogutik, che king’atak Jehovah Kamuktaindennyo?

²¹ Ilenji anyun wering’ung’, Kigi otwogikab Parao eng’ Misri; ak kiimoong’wech Jehovah eng’ Misri eng’ eut ne kim:

²² ak kiibarta Jehovah kaborunoik ak kwong’utik, che eechen, che bichien, che kibire Misri, ak Parao, koboto bikyik tugul, kegeerei:

²³ kiimutwech eng’ oloto kebwa olito, kogonech emet ne kiiyosiechi kwanisiekyok.

²⁴ Ak king’atech Jehovah keyai konetisiosiechu tugul, kiywei Jehovah Kamuktaindennyo, si ketepte mieindo kotugul, si koribech kesopche ko u ra.

²⁵ Egu anyun imanda eng’ achek, ngigiilge keyai ng’atutioni tugul eng’ taitab Jehovah Kamuktaindennyo, ko u ye king’atech.