NG'ATUTIK 5 - BUKUIT NE TILIL

Kogetyingei Musa Ng’atulik Taman

¹ Ak kiguur Musa Israel tugul, ak kolenji, Ogaso, ee Israel, konetisiosiek ak kiruogutik che amwawok rani, ogas eng’ itikwok, si kobiit onetgei, ak orib oyai.

² Kiyai Jehovah Kamuktaindennyo kayomiset kobotech eng’ Horeb.

³ Kima yai Jehovah kayomisionito ak kwanisiekyok, ago kiyai kobotech, agot achek, che kimi tugul olito kesoptosi rani.

⁴ King’alalwok Jehovah kimni eng’ tulwet eng’ mat,

⁵ (kiatonon eng’ kwenung’wong’ ak Jehovah eng’ betunoto, si aboruok ng’olyotab Jehovah: amu kioiyweisie amu mat, ak kima otogoste tulwet;) kolenjok,

⁶ A Jehovah Kamuktaindeng’ung’ ne kiamoong’un eng’ emetab Misri, eng’ gotab otwoknatet.

⁷ Amecheng’jigei cheptalelisiek alak, kobatena anege.

⁸ Ameyachigei kanamwet, anan itondab kiy age tugul ne mi barak kipsengwet, anan ne mi ng’ony orit, anan ne mi beek eng’ ng’ony orit:

⁹ ameng’urukyi, anan iot: amu ane Jehovah Kamuktaindeng’ung’ ko a Kamuktaindet ne amei ng’etkong’, ageerjini lagok tengektab kwanisiekwak, agoi ibinda ne bo somok ak ne bo ang’wan eng’ ichek che wecha;

¹⁰ ak arire elfusiek eng’ ichek che chama, che isubi ng’atutikyuk.

¹¹ Amemwa kainetab Jehovah Kamuktaindeng’ung’ eng’ tangoi: amu iityin Jehovah ng’ogisto ne mwaei kainennyi eng’ tangoi.

¹² Rib betutab sabato, itaban, ko u ye king’atin Jehovah Kamuktaindeng’ung’.

¹³ Iboisiei eng’ betusiek lo, ak iyai boisioniguk tugul:

¹⁴ ago betutab tisab ko sabato ne bo Jehovah Kamuktaindeng’ung’: ameyai boisiet betunoto, inye, anan wering’ung’, anan cheptang’ung’, anan otwogeng’ung’ ne muren, anan otwogeng’ung’ ne tie, anan eitang’ung’, anan sigirieng’ung’, anan tuguk, anan toondeng’ung’ ne mi kurgotiguk; si komuuny otwogeng’ung’ ne muren ak otwogeng’ung’ ne tie ko u inye.

¹⁵ Ak ibwat ile ki i otwoget eng’ emetab Misri, ago kiimoong’un Jehovah Kamuktaindeng’ung’ eng’ oloto, eng’ eut ne kim, ak eng’ eut ne chuulat: king’atin anyun eng’ noto Jehovah Kamuktaindeng’ung’ irib betutab sabato.

¹⁶ Teech kwandang’ung’ ak komet, ko u ye king’atin Jehovah Kamuktaindeng’ung’: si kochang’ait betusieguk, ak komieit eng’ inye eng’ emet ne konin Jehovah Kamuktaindeng’ung’.

¹⁷ Amerumisie.

¹⁸ Amoipge.

¹⁹ Amechorse.

²⁰ Amebaorianji chitab kokweng’ung’ eng’ lembech.

²¹ Amegase miat osotiotab chitab kokweng’ung’; anan imakyige gotab chitab kokweng’ung’, anan emennyi, anan otwogennyi ne muren, anan ne tie, anan eitanyi, anan sigiriennyi, anan kiy age tugul ne bo chitab kokweng’ung’.

²² Kimwachi Jehovah tuiyeng’wong’ komugul ng’alechuto tugul eng’ tulwet eng’ mat, ak eng’ boldet, ak imenindo ne o, eng’ kutit ne o: ak kima tes alak. Ak kisirji koik aeng’ che lebelen, ak kogona.

²³ Ak kingogas kutit ne kimong’une mesundeito, ye kilalei tulwet, orikya anyun, agot bounikab ortinwekwok, ak boisiekwok;

²⁴ ak kole, Ogeero, kaiboruech Jehovah Kamuktaindennyo lilindanyi ak etunatennyi, ak kagegas kutinnyi komong’une mat: kagenai rani kele ng’alaljindos Jehovah ak chi, ak kosob.

²⁵ Kalya anyun si kebegu? Amu iwong’wech mai o: ngot kegas kogeny kutitab Jehovah Kamuktaindennyo, kebegu.

²⁶ Chi ng’o eng’ bik tugul, ne kigas kutitab Kamuktaindet ne sobei, kong’alali eng’ mat, ko u ye kigigas, ak kosob?

²⁷ Rikte inye, si igas tugul che mwaei Jehovah Kamuktaindennyo: ak inyo imwawech tugul che mwaun Jehovah Kamuktaindennyo; si kegas, ak keyai.

²⁸ Ak kigas Jehovah ng’alekwok ye kiong’alalwa; ak kilenja Jehovah, Kaagas ng’alekab bichu che kamwaun: miachen tugul che kamwa.

²⁹ Kata mie nda katinyei muguleldo ne u noto, si koiywea, ak korib kotugul ng’atutikyuk tugul, si komieit eng’ ichek, ak eng’ lagokwak agoi!

³⁰ Ui ilenji, Oweekyige emaisiekwok.

³¹ Ago tonon inye eng’ yu ami, ak amwaun tugul, ak konetisiosiek, ak kiruogutik, che ineti, si koyai eng’ emet ne agochini konyaban.

³² Orib anyun si oyai ko u ye king’atak Jehovah Kamuktaindeng’wong’: amomaste obe tai anan katam.

³³ Obun ortinwek tugul che king’atak Jehovah Kamuktaindeng’wong’, si osopche, ak komieit eng’ okwek, ak kochang’ait betusiekwok eng’ emet ne oname kobunjok.