NG'ATUTIK 34 - BUKUIT NE TILIL

Meetab Musa

¹ Kitogosta Musa eng’ warengetab Moab, kwo tulwetab Nebo, agoi baragutab Pisga, ne tokyingei Jeriko. Kiiborji Jehovah inendet emet komugul ne bo Gilead, agoi Dan;

² ak Naptali komugul, ak emetab Epraim ak Manase, ak emet komugul ne bo Juda, agoi nyanjet ne mi cherongo.

³ Ak Murot ne bo Tai, ak warenget ne bo atebwet ne bo Jeriko, nganaset ne mi tironik, agoi Soar.

⁴ Ak kilenji Jehovah, Emoni ne kiayosiechi Abraham, ak Isak, ak Jakobo, alenji, Agochini iyoteng’ung’: kagonin igeer eng’ konyeguk, ago melandoi olindo.

⁵ Kime anyun Musa kiboitiotab Jehovah eng’ oloto eng’ emetab Moab, ko u ng’olyotab Jehovah.

⁶ Ak kitupchi atebwet eng’ emetab Moab ole tokyingei Bet-peor: ama mi chi ne ingen kererinnyi agoi rani.

⁷ Kiga kotar Musa kenyisiek bogol ak tiptem ye kimeei: kima kor, ama igesgei kimnatennyi.

⁸ Kirirji lagokab Israel Musa eng’ warengetab Moab betusiek sosom: kiigesgei anyun betusiekab kateiyet ak rirek agobo Musa.

⁹ Ki nyiitat Josua weritab Nun tamirmiriet ne bo ng’omnatet; amu kiga kogonoor Musa eunekyik inendet: ak kigas it lagokab Israel inendet, ak kiyai ko u ye king’at Jehovah Musa.

¹⁰ Ak mata kobiit eng’ Israel maotiot ne u Musa, ne kinai Jehovah kimni;

¹¹ eng’ kaborunoik tugul, ak kwong’utik, che kiiyoktoi Jehovah inendet koyai eng’ emetab Misri, eng’ Parao, ak eng’ otwogikyik tugul, ak eng’ emennyi komugul;

¹² ak eng’ eut komugul ne kim, ak kamuiset komugul ne o, che kiyai Musa eng’ taitab Israel tugul.