NG'ATUTIK 33 - BUKUIT NE TILIL

Koberuri Musa ortinwek taman ak aeng’

¹ Ni kaberuret, ne kiiberur Musa chitab Kamuktaindet lagokab Israel kotom kome,

² kile, Kinyo Jehovah eng’ Sinai, Ak king’eet eng’ Seir amu ichek; Kiiluu eng’ tulwetab Paran, Kinyo eng’ che tililen tamanusiekab elfusiek: Kimi eunnyi ne bo tai ng’atutiet ne u mat eng’ ichek.

³ Ee, kichamei bororiosiek; Mi eung’ung’ bikyik tugul che tililen: Ak kitebe ole bo kelyeguk; Taachei age tugul eng’ ng’aleguk.

⁴ King’atwech Musa ng’atutiet, Borotetab tuiyetab Jakobo,

⁵ Kiek laitoriat eng’ Jesurun, Ye kiiyumjigei bounikab bik, Ortinwek tugul che bo Israel.

⁶ Ingosob Reuben, mameei; Ago ingong’ering’itu bikyik.

⁷ Ak ni kaberuretab Juda: kile, Kas, Jehovah, kutitab Juda, Imutu inendet konyo ole mi bikyik: Kisorgei eng’ eunnyi; Ak iegu toretindennyi eng’ bunikyik.

⁸ Ak kile agobo Lawi, Mi Tumim neng’ung’, ak Urim neng’ung’ koboto neng’ung’ ne tilil, Ne kiitiem eng’ Masa, Ak kioborie eng’ beekab Meriba;

⁹ Ne kimwa agobo kwandanyi ak kamet, kole, Ma ageer inendet; Ama nai che tupcho, Ama nai lagokyik: Amu kiisub ichek ng’olyondeng’ung’, Ak kirib kayomiseng’ung’.

¹⁰ Ineti Jakobo kiruogutiguk, Ak koneti Israel ng’atutieng’ung’: Indoi taing’ung’ nyamdutik che kibeelei, Ak konde kagochinet ne kibeelei komugul kaptisisieng’ung’.

¹¹ Ee, Jehovah, iberur tugukyik, Ak itaach boisionikab eunekyik: Bir suenutikab icheget che ng’eetyin, Ak che bo icheget che wechei inendet, si mang’eetyo kogeny.

¹² Kile agobo Benjamin, Meng’isiei chamanetab Jehovah eng’ kalyet eng’ ye negite inendet; Tuchei bet komugul, Ak komenyei kwenutab tigigoikyik.

¹³ Ak kile agobo Josep, Iberurot eng’ Jehovah emennyi; Amu tuguk che kororon kot che bo kipsengwet, amu rewot, Ak riret ne mi kurere,

¹⁴ Ak amu tuguk che kororon kot che bo logoekab asista, Ak tuguk che kororon kot che bo ruratetab arawek,

¹⁵ Ak amu tuguk che eechen mising’ che bo tulonokab keny, Ak tuguk che kororon che bo tulonok che mengechen che bo koigeny,

¹⁶ Ak amu tuguk che kororon che bo ng’ony ak nyiiennyi, Ak maget ne mie ne bo inendet ne kimenyei sondit: Ingonyonji metitab Josep berurto, Ak eng’ metitab inendet ne kigitabane tupchosiekyik.

¹⁷ Twateiyot ne bunu kirginnyi kotinyei torornatet; Ak kuinoikyik ko kuinoikab soet: Toortoe choto bororiosiek tugul agoi tabanwekab ng’ony: Ak choto tamanusiekab elfusiekab Epraim, Ak choto elfusiek che bo Manase.

¹⁸ Ak kile agobo Sebulun, Baibaitu, ee Sebulun, eng’ mandaeng’ung’; Ak, ee Isakar, eng’ emaisieguk.

¹⁹ Kuurei ichek bororiosiek kobwa tulwet; Kogoito eng’ oloto tiseiywek che bo imanda: Amu chuchuni chang’indab nyanjosiek, Ak konoraik che ung’otin che bo ng’aniek.

²⁰ Ak kile agobo Gad, Iberurot inendet ne ibaroi Gad, Meng’isiei inendet ko u ng’etundo ne kotoy, Bachei eut, ee, ak metit barak.

²¹ Kilewenjigei kebeberta ne bo tai, Amu kigigonor eng’ oloto kebebertab ne igoitoi ng’atutik; Kinyo koboto bounikab bik, Kiyai imandab Jehovah, Ak kiruogutikyik eng’ Israel.

²² Ak kile agobo Dan, Aruetab ng’etundo Dan, Torombenoti kobunu Basan.

²³ Ak kile agobo Naptali, Ee Naptali, ne kiibiye chamet, Ak ne nyiitat kaberuretab Jehovah: Ingobunjin cherongo ak murot ne bo tai.

²⁴ Ak kile agobo Aser, Ingiberurji Aser lagok; Ingochamak inendet eng’ che tupcho, Ak ingorooch keldanyi mwaita.

²⁵ Egu kweoniguk karik ak sugunonik; Tebyei kimnateng’ung’ ko u betusieguk.

²⁶ Ee, Jesurun, mami ne u Kamuktaindet, Ne lanyei kipsengwetisiek si kotoretin, Ak lanyei barak eng’ telunatennyi.

²⁷ Meng’ateng’ung’ Kamuktaindet ne bo koigeny, Ak kanabin eunek che bo koigeny: Ak toortoi bunik eng’ taing’ung’ Ak kole, Ng’em.

²⁸ Meng’isiei anyun Israel eng’ kalyet, Kondab beek ne bo Jakobo inegei, Eng’ emet ne bo bek ak divaik; Ee, isau kipsengwetisiekyik rewot.

²⁹ Ee Israel, igasige: O kerge ak ng’o, bororiet ne kisor Jehovah, Long’et ne toretin, Ak ko rotweng’ung’ bo chok, ne bo telunateng’ung’! Ak koyaigei buniguk koigei che kase it; Ak itiech oldinwekwak che sutotin.