NG'ATUTIK 32 - BUKUIT NE TILIL

Tiendab Musa

¹ Oebit, okwek kipsengwetisiek, si kobiit ang’alal; Ak ingogas ng’ony ng’alekab kutinnyu:

² Rong’ugei konetisiennyu ko u ropta, Sou ng’alekyuk ko u rewot; Ko u ropta ne inesyin suswek che ng’orng’or, Ak ropta ne robonjin suswekab timin:

³ Amu amwaitoi kainetab Jehovah: Oiityi etunatet Kamuktaindennyo.

⁴ Ruandet inendet, igesunotgei boisiennyi; Amu imanda ortinwekyik tugul: Kamuktaindet ne bo imanit ne matinyei yaitio, Bo imanda inendet ak kosuldaat.

⁵ King’emgei; berutiet ne tinyei ko ma bo lagokab Jehovah; Ichek bororiet ne ngelelio ne mastaat.

⁶ Tos kongoi ne ogochini Jehovah ni, Okwek bik che o abusotin che ma o ng’omen? Tos ma kwandang’ung’ inendet, ne kialin? Kiyain, ak kogimitin.

⁷ Ibwat betusiek che bo keny, Ibwat kenyisiekab ibinwek che chang’: Teebe kwandang’ung’, si koborun; Teebe boisieguk, si komwaun.

⁸ Ye kiigochi Inendet ne Toror Mising’ bororiosiek borotenywa, Ye kipcheei werikab bik, Kiinde kiwotosiekab bik Ko u koitetab lagokab Israel.

⁹ Amu bikyik kebebertab Jehovah; Borotennyi Jakobo.

¹⁰ Kinyorji inendet ong’atet, Eng’ surkwen ne imuisei ne mami kiy; Kiyiem korib, Kirib inendet ko u laptetab kondanyi:

¹¹ Ko u ye ing’eeti kipsichit arekyik, Ne wendote baragutab lagokyik koribei, Ne uitoi kebebaikyik, konam ichek, Kogesene kebebaikyik:

¹² Jehovah inegei ne kiindochi inendet, Ak ma biit cheptalelit ne bo bororiosiek alak koboto inendet.

¹³ Kiigochi kolany oldinwek che sutotin che bo ng’ony, Ak kiam ruratetab mbaret; Ak kiigochi kochuchun kumik eng’ ruandet, Ak mwanik eng’ ruandet ne uui;

¹⁴ Mwaitab chego ne bo akwet, ak chegab kechirek, koboto mwanikab arekab kechir, Ak mengichikab Basan, ak ng’ororek, Koboto mwanikab nganok che miachen: Ak kieei divaik, korotikab sabibuk.

¹⁵ Ago kiner Jesurun, ak kotiaris: Kainer, kainyigisitu, kaiakwaitu: Kibagakta anyun Kamuktaindet ne kiyai inendet, Ak kosas Ruandetab yetunennyi.

¹⁶ Kiigochi koam ng’etkonda eng’ cheptalelisiek che ter, Kitach eng’ tuguk che kiwechei.

¹⁷ Kieng’ji tiseiywek oik, che ma Kamuktaindet, Cheptalelisiek che kima kongen, Che kibiitu let, Che kima koiywei kwanisiekwok.

¹⁸ Mebwati Ruandet ne kisichin, Kiiutie Kamuktaindet ne kisichin.

¹⁹ Ak kigeer Jehovah, ak kowech, Amu tagetab ne kitach werikyik ak tibikyik.

²⁰ Ak kile, Aung’e togennyu, Ageere ole teptoi kagesunenywa: Amu ichek ibinda ne imaasat mising’. Lagok che matinyei kayanet.

²¹ Kigona ng’etkonda eng’ noto ne ma Kamuktaindet; Kitacha eng’ tangoitanywa: Ak agochi ichek ng’etkonda eng’ che ma bororiet; Atache ichek eng’ bororiet ne abusat.

²² Amu kalal mat ne bo neregekyuk, Ak lalei agoi keringet ne loo mising’, Ak kobeel ng’ony koboto ruratennyi, Ak kobeel ole tonone tulonok.

²³ Atesyini yaitwogik; Amwoge ichek kipchabonikyuk:

²⁴ Sagitos eng’ rubet, Ak kebeel eng’ mat ne korom Ak ng’emisiet ne ng’wan; Ak ayokyi kelekab tiong’ik, Koboto ng’wonetab che ichuutegei ng’ony che bo temburiek.

²⁵ Rebisiei rotwetab chok eng’ ole bo sang’, Ak mi kamuiset go; Barei muren ak bergeiyat, Ne chuchuni ak chito ne bo kalwalek.

²⁶ Kiale, Aiyestochini ole loo, Agochini kogesgei kabwatenywa eng’ bik:

²⁷ Nda kima aiywei tagisietab bunyot, Si maibwat bunikwak berberindo, Ak komwa kole, Kagotororit eunnyo, Ak ma yai Jehovah choto tugul.

²⁸ Amu ichek bororiet ne matinyei koruoch, Ama tinyei naet.

²⁹ Nda ka ng’omen, ta konaei nito, Ak kobwat kagesunenywa!

³⁰ Kotos imuktoi ano koon chichage elfut, Ak koon aeng’ elfusiek taman, Nda kima alda Ruandenywa ichek, Ak kogoito Jehovah ichek?

³¹ Amu ma u ruandenywa Ruandennyo, Amu ingen agichek bunikyok kole u noto.

³² Amu ketinywa ne bo sabibuk kobunu ketitab Sodom, Ne bunu mbarenikab Gomora: Murmure bich sabibukwak, Ng’wonen sabibukwak che kiirurugok:

³³ Ng’wonetab maswetisiek divaikwak, Ng’wonet ne korom ne bo erenok.

³⁴ Tos ma konorotin eng’ oldanyu chuto, Kiging’och koboto konoraikyuk?

³⁵ Nenyu mugetut, ak kageeret, Eng’ betut ne kagochabaita kelyekwak: Amu karik betutab nyalildanywa, Ak chogu tuguk che bwanjin ichek.

³⁶ Amu iruokyinechin Jehovah bikyik, Ak korir mo agobo otwogikyik; Ye keer kole kagowandagei kimnatenywa, Ama mi ne kong’et ne ratat anan ne ma ratat.

³⁷ Ak kole, Mi ano kanamonikwak, Ruandet ne kiimang’u;

³⁸ Che kiamei mwanikab tiseiywekwak, Che kieei divaik che bo kagochinenywa ne kieei? Ingong’eetyo choto kotoretok, Ingoek ichek che omwechini.

³⁹ Ogeer anyun nguno ole ane, ko a inendet iman, Mami cheptalelit, ami anege: Abare, ak asoobi; Kiaguoten, ak kianya: Ak mami ne imuchi kosor eng’ eunnyu.

⁴⁰ Amu kanamji eunnyu kipsengwet, Ak ale, Ko u ye asobe koigeny,

⁴¹ Ngalit rotwennyu bo chok ne ilyeli, Ak konam eunnyu kiruoget; Ayaakyini mugetut bunikyuk, Ageerjini che wecha.

⁴² Agochini kipchabonikyuk kobogityo korotik, Ak koam banyek rotwennyu ne bo chok; Koboto korotikab che kigibar ak che kigiluul, Eng’ metowekab kandoikab bunik.

⁴³ Oboiboitu, okwek bororiosiek, koboto bikyik: Amu yaaktoi mugetut che bo korotikab otwogikyik, Yaakyin mugetut bunikyik, Ak koyai kagaigaet agobo emennyi, ak bikyik.

⁴⁴ Kinyo Musa anyun komwachi bik ng’alek tugul che bo tieni kogas eng’ itikwak, inendet ak Hosea weritab Nun.

⁴⁵ Ak kiiges Musa ng’alechu tugul che kimwachi Israel tugul:

⁴⁶ ak kilenji, Onde mugulelwekwok ng’alechu tugul kabaorianwok ra; che tun ong’ate lagokwok, korib koyai ng’alek tugul che bo ng’atutioni.

⁴⁷ Amu ma tangoi eng’ okwek ni; amu sobondang’wong’, ak otese betusiekwok eng’ emet amu nito, eng’ ole obendi olandoe Jordan oname kobunjok.

⁴⁸ Kimwachi Jehovah Musa betunoto, kolenji,

⁴⁹ Togoste tulwoni bo Abarim, agoi tulwetab Nebo, ne mi emetab Moab, ne tokyingei Jeriko; igeer emetab Kanan ne agochini lagokab Israel kobunji:

⁵⁰ si imechi tulwet ole itogosyini, si kiyumin koboto biguk, ko u ye kimechi Aron ng’etab komet tulwetab Hor, ak kigiyum koboto bikyik;

⁵¹ amu kiongelelja eng’ kwenutab lagokab Israel eng’ beekab Meriba ne bo Kades, eng’ ong’atetab Sin; amu kima ogonyita eng’ kwenutab lagokab Israel.

⁵² Amu igeere emet eng’ taing’ung’; ago meite oloto, emenoto ne agochini lagokab Israel.