NG'ATUTIK 31 - BUKUIT NE TILIL

Ng’alek che mwachine Musa saisere bik ak Josua

¹ Kiwa Musa anyun komwachi Israelik tugul ng’alechu.

² Kolenji, Koboch ra ko kenyisiekyuk ko bogol ak tiptem; ma amuchi amanda ak among’u: ak kilenja Jehovah, Melandoe Jordanini.

³ Jehovah Kamuktaindeng’ung’, inendet ne landoi kondoenen; ak kobar bororiosiechu mi taing’ung’, ak inam ichek: landoi Josua kondoenen, ko u ye kimwa Jehovah.

⁴ Yachin Jehovah ichek ko u ye kiyachi Sihon ak Og, laitorinikab Amorik, ak emenywa; che king’em.

⁵ Indewok Jehovah ichek eunekwok eng’ taing’wong’, ak oyachi bichoto ko u ng’atutiet komugul ne kiang’atak.

⁶ Ogimegitu, onyiganitu, amoiywei, anan oarogense amu ichek: amu wendi Jehovah Kamuktaindeng’ung’ koboten; mametoin inendet, ama bagaktoin.

⁷ Ak kiguur Musa Josua, ak kolenji, eng’ taitab Israelik tugul, Kimitu, nyiganitu: amu obendi koboto bichu oite emet ne kiiyosiechi Jehovah kwanisiekwok kole igochin; ak igochini ichek konyaban.

⁸ Inendet Jehovah ne indoenen; mi koboten, amemetoin, ama bagaktoin; ameiywei, anan iarogen.

Kogochin ng’atutik tisiik

⁹ Kisir anyun Musa ng’atutioni, ak kogochi tisiik werikab Lawik, che kiibei moinget ne bo arorutietab Jehovah, ak boisiek tugul che bo Israel.

¹⁰ Ak king’at Musa bichoto kolenji, Kenyit age tugul ne igesunegei kenyitab tisab, eng’ betut ne kiging’at ne bo kenyit ne bo katiaget, eng’ igorta ne bo keriosiek,

¹¹ ye kabwa Israel tugul koborgei eng’ taitab Jehovah Kamuktaindeng’ung’ eng’ ole tun leweni, isoman anyun ng’atutioni eng’ taitab Israel tugul kogas.

¹² Iyum bik, murenik, gotab kor ak lagok, ak toondeng’ung’ ne mi kurgotiguk, si kobiit kogas, ak konetgei, ak koiywei Jehovah Kamuktindeng’wong’, ak korib koyai ng’alek tugul che bo ng’atutioni;

¹³ si kogas lagokwak che tom konai ak konetgei koiywei Jehovah Kamuktaindeng’wong’, betusiek tugul kote osoptosi eng’ emet ne olandoe Jordan obendi oname.

Ng’alek che kindoune tiendab Musa

¹⁴ Kilenji Jehovah Musa, Keero, kagorik betut ne imee: kuur Josua anyun, ak obe otononse emait ne kituiyechin, si ang’at inendet. Kiba anyun Musa ak Josua, kotononso eng’ emaitab tuiyet.

¹⁵ Ak kitook Jehovah eng’ Emait eng’ toloitab boldet: kitonone toloitab boldet kurgetab Emait.

¹⁶ Ak kilenji Jehovah Musa, Keero, irue koboto kwanisieguk; yeityo kong’eetyo bichu koibotgei ak kanamonik che bo bororiosiek alak che bo emet, ole bendi kotebe kwenunywa, ak kobagakta, ak kobut kayomisennyu, ne kigiyomisge ak ichek.

¹⁷ Kolal anyun nereknatennyu eng’ betunoto agobo ichek, yeityo abagakte, ak auny togennyu, ak kiwong’ ichek, ak kobwanji yaitwogik ak nyalilwogik che chang’; ak kole eng’ betunoto, Tos mabwanjech yaitwogtichu amu mami Kamuktaindennyo kobotech?

¹⁸ Ak, auny togennyu betunoto iman amu yaitwogik tugul che kiyai, amu kaweektagei koot kanamonik.

¹⁹ Osirjige anyun nguno tieni, si inet lagokab Israel: inde kutuswekwak, si koek baoriandennyu tieni agobo lagokab Israel.

²⁰ Amu ye kaamut koit emet ne kiayosiechi kwanisiekwak, noto nyiitat chego ak kumik; ak ye kagoamis kobiyong’so, ak konerio; koweektagei anyun ole mi kanamonik koba koot, ak kosasa, ak kobut kayomisennyu.

²¹ Ak ye tun kagobwanji yaitwogik che chang’ ak nyalilwogik, kobaorian anyun tieni eng’ tainywa ko u baoriat; amu mautie iyotenywa eng’ kutuswekwak: amu agot nguno angen kabwatutikwak che ibwati, kotom amut koba emet ne kiayosiechi.

²² Kisir anyun Musa tieni betunoto, ak konet lagokab Israel.

²³ Kiigochi anyun Josua weritab Nun ng’atutiet, kolenji, Kimitu, nyiganitu: amu imuti lagokab Israel koba emet ne kiayosiechi: ak ami koboten.

²⁴ Ak ye kingo kagosir Musa koges ng’alekab ng’atutioni eng’ bukuit, agoi kogesgei,

²⁵ kong’at Musa Lawik che kiibei moingetab arorutietab Jehovah, kolenji,

²⁶ Oib bukuineb ng’atutik, onde ole negite moingetab arorutietab Jehovah Kamuktaindeng’wong’, si kotebe oloto koek baoriat agobo inye.

²⁷ Amu angen ngelelnateng’ung’, ak uuindab kaating’ung’: ogeero, kaongelelji Jehovah, kota asobe ami kobotok betuni; oyae anyun ne tia ye kaamei?

²⁸ Oyumwa boisiek tugul che bo ortinwekwok, ak kiptainikwok, kobwa yu ami, si amwachi ng’alechu koba itikwak, aguur kipsengwet ak ng’ony kobaorian agobo ichek.

²⁹ Amu angen ale ye kaamei ong’emge mising’ kot, omaste eng’ oret ne kiang’atak; ak koityok yaitiet eng’ betusiek che bo let; amu omache oyai yaitiet eng’ taitab Jehovah, otach inendet amu boisionikab eunekwok.

³⁰ Kimwachi Musa tuiyet komugul ne bo Israel ng’alekab tieni kogas, agoi kogesgei.