NG'ATUTIK 30 - BUKUIT NE TILIL

Kayomisutik ak kigiil bik eng’ rirek

¹ Ak ye bwanjin tukchu tugul, berurto ak chubisiet, che kiande taing’ung’, ak ibwat anyun eng’ kwenutab bororiosiek tugul, ole kigoonjin Jehovah Kamuktaindeng’ung’,

² ak ngiweekyige Jehovah Kamuktaindeng’ung’, igas it kutinnyi ko u tugul che kang’atin rani, inye ak lagoguk, eng’ muguleldang’ung’ komugul, eng’ sobondang’ung’ komugul;

³ kowal anyun Jehovah Kamuktaindeng’ung’ luulet ne kigiluulin ak korirenen, ak koweek koyumin eng’ bororiosiek tugul, ole kiiyestochin Jehovah Kamuktaindeng’ung’.

⁴ Ngo mi che kiiyestochi tabanwekab kipsengwet, koyumin eng’ oloto Jehovah Kamuktaindeng’ung’, ak komutun eng’ oloto:

⁵ ak komutyin Jehovah Kamuktaindeng’ung’ emet ne ki bo kwanisieguk, si kobunjin; ak koyaun ne mie, kotesin ichang’itu isiir kwanisieguk.

⁶ Ak komuratan Jehovah Kamuktaindeng’ung’ muguleldang’ung’, ak mugulelwekab iyoteng’ung’, si icham Jehovah Kamuktaindeng’ung’ eng’ muguleldang’ung’ komugul, ak eng’ sobondang’ung’ komugul, si isob.

⁷ Ak konde Jehovah Kamuktaindeng’ung’ chubisiosiechu tugul buniguk, ak eng’ ichek che wechin, che kiusin.

⁸ Ak iweege igas it kutitab Jehovah, ak iyai ng’atutikyik tugul che ang’atin rani.

⁹ Ak koyain Jehovah Kamuktaindeng’ung’ iegu ne tinyei chang’indab berurto eng’ boisionik tugul che bo euneguk, ak eng’ iyoteng’ung’, ak eng’ iyotetab tuguk, ak eng’ ruratetab emeng’ung’; amu tun boiboitunenen Jehovah kogeny koyaun ne mie, ko u ye kibaibaitune kwanisieguk:

¹⁰ ngigas it kutitab Jehovah Kamuktaindeng’ung’, irib ng’atutikyik ak konetisiosiekyik che sirotin eng’ bukuini bo Ng’atutiet; ngiweekyige Jehovah Kamuktaindeng’ung’ eng’ muguleldang’ung’ komugul, ak eng’ sobondang’ung’ komugul.

¹¹ Amu ma uui mising’ eng’ inye ng’atutioni kaang’atin rani, ama loo.

¹² Mami kipseng’wet, kot ile, Ng’o ne togostoiyech kipsengwet, si koibwech, ak kogonech kegas, si keyai?

¹³ Ama mi nyanjet bitonin, kot ile, Ng’o ne landoi eng’ nyanjet, si koibwech, ak kogonech kegas, si kobiit keyai?

¹⁴ Ago negitenen ng’olyondoni mising’, mitei kuting’ung’, ak muguleldang’ung’, si kobiit iyai.

¹⁵ Keero, kande rani taing’ung’ sobondo ak mieindo, meet ak yaitiet;

¹⁶ amu kaang’atin rani ale icham Jehovah Kamuktaindeng’ung’, iwendote ortinwekyik, irib ng’atutikyik ak konetisiosiekyik ak kiruogutikyik, si isob itesage, si koberurin Jehovah Kamuktaindeng’ung’ eng’ emet ne iwendi iname.

¹⁷ Ago ngo masta muguleldang’ung’, amecham igas, ago ngichuutin, iwe isa kanamonik, ak iot;

¹⁸ aboruok rani ale, olustosi iman; machang’itu betusiekwok eng’ emet, ole olang’jini eng’ Jordan iwendi inam.

¹⁹ Kaaguur kipsengwet ak ng’ony kobaorianjok rani, ale, kande taing’ung’ sobondo ak meet, kaberuret ak chubisiet: lewen sobondo anyun, si isob, inye ak iyoteng’ung’:

²⁰ icham Jehovah Kamuktaindeng’ung’, igas it kutinnyi, ak onamgei ak inendet: amu inendet sobondang’ung’, ak koindab betusieguk, si kobiit imeny emet ne kiiyosiechi Jehovah kwanisieguk kogochi Abraham, Isak, ak Jakobo.