NG'ATUTIK 3 - BUKUIT NE TILIL

Kigesu tetunetab ng’alek agobo banda

¹ Kigiweege anyun ketogoste oret ne wendi Basan: ak kiibokyech Og laitoriatab Basan, inendet ak bikyik tugul, konyo koyai luget eng’ Edrei.

² Ak kilenja Jehovah, Ameiywei inendet: amu kaande inendet eung’ung’, ak bikyik tugul, ak emennyi; ak iyachi inendet ko u ye kiiyachi Sihon laitoriatab Amorik, ne kimenyei Hesbon.

³ Ak kiindewech anyun Jehovah Kamuktaindennyo eunekyok Og agine, laitoriatab Basan, ak bikyik tugul: ak kigibar kot komang’etyi agot agenge.

⁴ Ak kigilul nganasokyik tugul eng’ betusiechoto; kima biit nganaset agot agenge ne ma kiluul eng’ ichek; nganasok tamanwogik lo, emet komugul ne bo Argob, bororietab Og eng’ Basan.

⁵ Kiging’ote nganasochuto tugul irimosiek che koen, ak kurgotik, ak temeleiywek; koboto nganasok che chang’ mising’ che kima king’ot.

⁶ Kiging’em anyun kiwong’u, ko u ye kiging’em Sihon laitoriatab Hesbon, kiging’em anyun ko u noto nganaset age tugul ne kimenyei bik, koboto gotab kor ak lagok.

⁷ Ago kigiluul kobunjech tuga tugul, ak tuguk che kimi nganasok.

⁸ Ak kigireb emet eng’ betusiechoto eng’ eunekab laitorinik aeng’ che bo Amorik che kimi Jordan bitonin, koboch atebwetab Arnon agoi tulwetab Hermon;

⁹ (kuure Sidonik Hermon Sirion, ak kuure Amorik tulwonoto Senir;)

¹⁰ nganasok tugul che bo warenget, ak Gilead komugul, ak Basan komugul, agoi Saleka ak Edrei, nganasokab bororietab Og eng’ Basan.

¹¹ (Amu king’et Og inegei, laitoriatab Basan, ne bo che king’et eng’ Repaik; ogeero, ki bo karnet itogunnyi; tos ma mi itogunoto Raba ne bo lagokab Amon? Ki kakwautik sogol che bo eut koindanyi, ak ki kakwautik ang’wan che bo eut tebeesindanyi, ko u kakwautietab chito.)

¹² Ak kiginam emonoto kobunjech eng’ betusiechoto: koboch Aroer, ne negite atebwetab Arnon, ak kebebertab emetab tulonok ne bo Gilead, ak nganasokyik, kiagochi bikab Reuben ak che bo Gad:

¹³ ak kiagochi noto kebeberta age ne bo emetab Gilead, ak Basan komugul ne bororietab Og, emet tugul ne bo Argob, agot Basan komugul kebebertab oretab Manase. (Kiguure noto, emetab Repaik.

¹⁴ Kiluul Jair weritab Manase emet komugul ne bo Argob, agoi kiwotetab Gesurik ak Maakatik; ak kiguure choto, agot Basan, koguurtoe kainennyi, Habot-Jair, agoi ra.)

¹⁵ Ak kiagochi Makir emetab Gilead.

¹⁶ Ak kiagochi bikab Reuben ak bikab Gad koboch Gilead agoi atebwetab Arnon, kwenutab atebwet, ak kiwotennyi, agoi ainetab Jabok, noto kiwotetab lagokab Amon;

¹⁷ ak Araba agine, ak Jordan koboto kiwotennyi, koboch Kineret agoi araraita ne mitei Araba, ak Araraitab Munyuk, ne mitei kelutab Pisga ole tokyingei kong’asis.

¹⁸ Ak kiang’atak betunoto alenjok, Kigogonok Jehovah Kamuktaindeng’wong’ emoni kobunjok: olande ko kaolaach karik, ondoe tupchosiekwok lagokab Israel, okwek tugul che bo luget.

¹⁹ Ago ingotebi eng’ nganasokwok che kiagonok osotikwok, ak lagokwok, ak tukwok, (angen ale otinye tuga che chang’;)

²⁰ agoi kogochi Jehovah tupchosiekwok kamuung’et, ko u okwek, ak konyaban ichek emet ne igochin Jehovah Kamuktaindeng’wong’ eng’ Jordan bitonin: yeityo oweege anyun chi tugul ole mitei tugukyik che kiagonok.

²¹ Ak kiang’at Josua betunoto alenji, Kiigeer eng’ konyeguk tuguk tugul che kiyachi Jehovah Kamuktaindeng’wong’ laitorinichuto aeng’: yachin ko u noto Jehovah laitornatosiek tugul che mi ole iwendi.

²² Amoiywei ichek; amu Jehovah Kamuktaindeng’wong’ ne yaei luget agobo okwek.

²³ Ak kiasa Jehovah eng’ betunoto alenji,

²⁴ Ee Kiptaiyat Jehovah, kaitau iborji kiboitiondeng’ung’ etunateng’ung’, ak eung’ung’ ne kim: amu tos mi cheptalelit nguno kipsengwetisiek anan ng’ony, ne imuchi koyai ko u boisioniguk, ak ko u biosioniguk che kimen?

²⁵ Kasain ale, chamwa alanda awa ageer emet ne kararan ne mi Jordan bitonin, tulwonoto kararan, ak Lebanon.

²⁶ Ago kinerekya Jehovah agobo okwek, ak ma kaswa: ak kilenja Jehovah, Ingoyamin; amata ing’alalwa kogeny agobo ng’olyondonito.

²⁷ Togoste Pisga barak, ak toben komostab cherongo, ak murot ne bo katam, ak murot ne bo tai, ak ole tokyingei kong’asis, ak igeerote eng’ konyeguk; amu melandoe Jordanini.

²⁸ Ago ng’at Josua, ak igiil inendet, ak igimit: amu inendet ne landoi kondoe bichu, ak kogoch konyaban emet ne ta igeere.

²⁹ Kigitebe anyun atebwet ne tokyingei Bet-peor.