NG'ATUTIK 29 - BUKUIT NE TILIL

Kagiilosiek ak kateunoik

¹ Chu ng’alekab kayomiset ne king’at Jehovah Musa koyai koboto lagokab Israel eng’ emetab Moabik, koboto kayomiset ne kiiyomisgei ak ichek eng’ Horeb.

² Ak kiguur Musa Israelik tugul kolenji, Kiogeer tugul che kiyachi Jehovah Parao, ak otwogikyik tugul, ak emennyi tugul, eng’ emetab Misri eng’ taing’wong’;

³ tiemisiosiek che eechen che kigeer konyeguk, kaborunoik, ak kwong’utichoto eechen:

⁴ ago kitom kogonok Jehovah muguleldo ne oguiye, anan konyek che ogeere, anan itik che ogase, agoi rani.

⁵ Ak kiandoiywok eng’ kenyisiek artam eng’ ong’atet: ma osegitu ngoroik che olaachi, ama osegitu kweoniguk eng’ kelyeguk.

⁶ Ma oam makatinik, ama oee divaik anan maiyek: si kobiit onai ole a Jehovah Kamuktaindeng’wong’.

⁷ Ak ye kingoitu oli, kobokyech Sihon, laitoriatab Hesbon, ak Og, laitoriatab Basan, ak kigibar laitorinichoto:

⁸ ak kiginam emenywa, ak kigigochi bikab Reuben, ak che bo Gad, ak kebebertab oretab Manase koek borotet.

⁹ Orib anyun ng’alekab kayomisoni, ak oyai, si kiberurok eng’ tugul che oyae.

¹⁰ Otonondosi ra okwek tugul eng’ taitab Jehovah Kamuktaindeng’ung’; bounikwok, ortinwekwok, boisiekwok, ak kiptainikwok, agot murenik tugul che bo Israel,

¹¹ lagokwok, osotikwok, ak toondeng’ung’ ne mitei nganasoguk, koboch ne murmuri kweniguk agoi ne siilei beeguk.

¹² Si kobiit oarorjige ak Jehovah Kamuktaindeng’ung’, ak kayosiennyi, ne yaei Jehovah Kamuktaindeng’ung’ koboten rani:

¹³ si kogimitin rani iegu bororiennyi, si koek Kamuktaindeng’ung’, ko u ye kimwaun, ak ko u ye kiiyosiechi kwanisieguk, Abraham, Isak, ak Jakobo.

¹⁴ Mayomisok okwege eng’ kayomisoni ak kayosioni;

¹⁵ ago koboto inendet ne tononi kobotech eng’ yu rani eng’ taitab Jehovah Kamuktaindennyo, ak koboto inendet agine ne mami kobotech rani:

¹⁶ (amu ongen ole kigiteptoi eng’ emetab Misri; ak ole kigibwanunde eng’ kwenutab bororiosiek che kiobun kwenunywa;

¹⁷ ak kiogeer tugukwak che kiwechei, ak kanamonikwak, ketik ak koik, feda ak tahabu, che kimi kwenunywa:)

¹⁸ si mabiit chi eng’ okwek mureno anan kwondo, anan gab chi, anan oret, ne mastoi muguleldanyi rani kobagakta Jehovah Kamuktaindennyo, kwo koot kanamonikab bororiosiechoto; si mabiit eng’ okwek tigitiotab ng’wanindo ak ng’wonet;

¹⁹ ak ye kas ng’alekab chubisioni, koberurgei eng’ muguleldanyi kole, Atebye eng’ kalyet, agot ngawendoti eng’ ngelelnatetab muguleldanyu, kotese melelda bogitet.

²⁰ Mametoi Jehovah chichoto, ago iyenjin chichoto neregek ak ng’etkonda che bo Jehovah, ak kotebe chichoto chubisioni tugul ne kigisirji bukuini, ak kobukto Jehovah kainennyi eng’ kureretab kipsengwet.

²¹ Ak ibesie Jehovah chichoto ortinwek tugul che bo Israel kobunji yaitiet, ko u chubisiosiek tugul che bo kayomiset ne kigisirji bukuinito bo Ng’atutik.

²² Ak kole ibinda ne biitu, lagokwok che biitu let eng’ okwek, ak toondet ne bunu emet ne loo, ye keer korotwek che bo emonoto, ak mainwek che kiigochi Jehovah komianso:

²³ ak kowalak emet komugul koek tuguk che laldos, ak munyuk, ak lalet, kot ko ma kegolei, ama koiyei, ama kobite suswo oloto, kergeitu ak ng’emisietab Sodom ak Gomora, Adma ak Seboim, che king’em Jehovah kowong’ eng’ neregekyik, ak eng’ nyitatennyi:

²⁴ ak kole bororiosiek tugul, Amu nee si koyachi Jehovah ko u ni emoni? Iboru nee mai bo neregechu ng’wonen?

²⁵ Kole anyun bik, Amu kibagakta kayomisetab Jehovah, Kamuktaindetab kwanisiekwak, ne kiyai koboto ichek ye kiimutu komong’ eng’ emetab Misri;

²⁶ ak kiba koot kanamonik, ak kogutung’ji, kanamonik che kima kongen, ak che kima chamji inendet:

²⁷ kilal anyun nereknatetab Jehovah amu noto agobo emoni, koipchi chubisiosiek tugul che kigisirji bukuini:

²⁸ kiitut Jehovah ichek komong’ eng’ emenywa eng’ neregek ak eng’ nyitatet, ak eng’ ng’wanindo, koonji emet age ko u rani.

²⁹ Bo Jehovah Kamuktaindennyo tugukab ung’ot: ago chechok ak lagokyok koigeny tuguk che ng’ang’atin, si kobiit keyai ng’alek tugul che bo ng’atutioni.