NG'ATUTIK 27 - BUKUIT NE TILIL

Tuguk che kiribei koga kiit Kanan

¹ King’at anyun Musa ak boisiekab Israel bik kolenji, Orib ng’atutik tugul che kang’atak rani.

² Ak eng’ betut ne olandoe Jordan obendi emet ne konin Jehovah Kamuktaindeng’ung’, itononsechigei koik che eechen, ak imal:

³ yeityo isirji koichato ng’alek tugul che bo ng’atutioni, ye kailande; si kobiit iit emet ne konin Jehovah Kamuktaindeng’ung’, emet ne nyiitat chego ak kumik, ko u ye kiiarorun Jehovah Kamuktaindetab kwanisieguk.

⁴ Ak ye kailandae Jordan, ilumde koichato, che ang’atin rani, eng’ tulwetab Ebal, ak imal.

⁵ Ak iteekyi eng’ oloto Jehovah Kamuktaindeng’ung’ kaptisisiet, kaptisisiet ne bo koik: ameyae koichato karna.

⁶ Teekyi Jehovah Kamuktaindeng’ung’ kaptisisiet eng’ koik che ma kiwai: ak igochi Jehovah Kamuktaindeng’ung’ kagochinoik che kibeelei eng’ oloto:

⁷ ak ieny kagochinoik che bo kalyet, ak iamisie eng’ oloto; si ibaibaitu eng’ taitab Jehovah Kamuktaindeng’ung’.

⁸ Ak isirji koichato ng’alek tugul che bo ng’atutioni kotook komie.

⁹ Ak kimwachi Musa ak tisiik che Lawik, Israelik tugul, kolenji, Sis, ebit, ee Israel; keegu rani bikab Jehovah Kamuktaindeng’ung’.

¹⁰ Kas it anyun kutitab Jehovah Kamuktaindengung’, yai ng’atutikyik ak konetisiosiekyik, che kaang’atin ra.

¹¹ King’at anyun Musa bik betunoto kolenji,

¹² Tonondos bichu eng’ tulwetab Gerisim koberur bik, ye kaolandae Jordan; Simeon, Lawi, Juda, Isakar, Josep ak Bemjamin.

¹³ Tonondos bichu eng’ tulwetab Ebal agobo chubisiet; Reuben, Gad, Aser, Sebulun, Dan ak Naptali.

¹⁴ Ak kowol Lawik kolenji bik tugul che bo Israel eng’ kutit ne o,

¹⁵ Chubot ne yaei kanamwet ne kiwaei anan ne kitanyi, ne wechei Jehovah, boisietab musogindet, ne lumdoi eng’ ung’ot. Ak kowol bik tugul kole, Amen.

¹⁶ Chubot chi ne sasei kwanda anan kamet. Ak kole bik tugul, Amen.

¹⁷ Chubot chi ne inaktoe kiwotetab chitab kokwennyi. Ak kole bik tugul, Amen.

¹⁸ Chubot chi ne ibeeti ne korat. Ak kole bik tugul, Amen.

¹⁹ Chubot chi ne imaasi kiruogetab ne toondet, ak ne matinyei kwanda, ak mosoget. Ak kole bik tugul, Amen.

²⁰ Chubot chi ne ibegei ak osotiotab kwandanyi; amu kang’any ach ngorietab kwandanyi. Ak kole bik tugul, Amen.

²¹ Chubot chi ne ibegei ak tiony age tugul. Ak kole bik tugul, Amen.

²² Chubot chi ne ibegei ak chepkamet ne cheptab kwandanyi, anan ne cheptab kamet. Ak kole bik tugul, Amen.

²³ Chubot chi ne ibegei ak korgetab yugoi. Ak kole bik tugul, Amen.

²⁴ Chubot chi ne birei chitab kokwennyi eng’ ung’ot. Ak kole bik tugul, Amen.

²⁵ Chubot chi ne taachei melekto si kobar chi ne matinyei tengek. Ak kole bik tugul, Amen.

²⁶ Chubot chi ne ma igimit ng’alekab ng’atutioni koyai. Ak kole bik tugul, Amen.