NG'ATUTIK 25 - BUKUIT NE TILIL

Ng’atutik che terotin

¹ Ngo biit tiiyet eng’ bik, ak kobwa kapkiruok, ak koruokyi kiruogik; koiityi anyun ne bo imanda imanda, ak kogikyi ne ya;

² ak ngegeer kole nyoljin chichoto ya biret, komwachi kiruogindet koru, ak kebir eng’ tainnyi, ko u koitet ne yamegei ak yaitiennyi.

³ Imuchi kobir birutik artam, amat kotes: amu ngo siir choto ak kobir birutik che chang’, koek tupcheng’ung’ ne sasat eng’ inye.

⁴ Amerat kutitab eito ye tiechei bek koborei.

⁵ Ngo meng’jindos che tupcho, ak ngo me age, ama sich werit, ko mat kotun chi ne bo sang’ ne kamee manong’otiot: ingondi ne tupcho ak koek manong’otiondennyi, ak komutyigei koek osotiondennyi, ak koyachi kwonyoto ne kota yachin ng’etab kamet, manong’otiotab kwonyoto.

⁶ Ak ingetochi werit ne bo tai ne isib kosichei kwonyoto, kainetab ng’etab kam ne kime, si maburburenok kainennyi eng’ Israel.

⁷ Ak ngo mamachei chichoto kondi osotiotab ng’etab kamet, ingowo anyun noto bo ng’etab kam ole mi boisiek eng’ ormarich, kwo kolenji, Kaesio bamuru kotononji ne tupcho kainennyi eng’ Israel, kaesio koyaiywa ne nyoljin tupchetab manong’otionnyu.

⁸ Yeityo koguur boisiekab nganasennyi chichoto, ak kong’alalsechi: ak ngo tonon kole, Machame andi;

⁹ kwo osotiotab ng’etab kamet eng’ taitab boisiek, ak kocher kweiyotab chichoto, ak kong’utyi togennyi; ak kowol mosoganato kole, Ingeyachi ko u noto chito ne esioi kolal matab ng’etab kamet.

¹⁰ Ak keguure kainennyi eng’ Israel, Gotab inendet ne kigitiage kweiyot.

¹¹ Ngo birgei bik, ak kwo osotiotab age kosor manong’otiondennyi eng’ ne birei, ak kosapchi konam kitik:

¹² til anyun eunnyi, amat irire.

¹³ Amat inde loleng’ung’ ratilisiek che terotin, ne o ak ne ming’in.

¹⁴ Ametepte eng’ gong’ung’ tuguk che terotin che kigere bek, ne o ak ne ming’in.

¹⁵ Tepte ratilit ne nyolu ne bo imanda; tepte kit ne kigere bek ne nyolu ne bo imanda: si kochang’a betusieguk eng’ emet ne konin Jehovah Kamuktaindeng’ung’.

¹⁶ Amu wechei Jehovah Kamuktaindeng’ung’ tugul che yaei tuguk che u choto, tugul che yaei che ma bo iman.

¹⁷ Ibwat kit ne kimwaun Amalek eng’ oret ye kiobunu Misri;

¹⁸ ko u ye kinyorjin oret, ak kobar biguk che kimi let, tugul che ki nyalulyotin che kiletu, ye kinegit itanui, ak ye kiga ing’et mising’; ama iywei Amalek Jehovah.

¹⁹ Ye tun kagogonin Jehovah Kamuktaindeng’ung’ kamuung’et eng’ buniguk tugul che mi komosweguk tugul, eng’ emet ne konin Jehovah Kamuktaindeng’ung’ koek boroteng’ung’ kobunjin, ibukte anyun kabwatetab Amalek eng’ kureretab kipsengwet; amat iutie.