NG'ATUTIK 24 - BUKUIT NE TILIL

Ng’atutik che terotin

¹ Ngotunis chi, ama nyor osotiondennyi chamet eng’ tainnyi, amu kageerji chichoto kiy ne ya kwonyoto, kosirji anyun siretab besiet, konde eunnyi, ak koon eng’ gonnyi.

² Ak ye kagomanda eng’ gotab chichoto, komuchi koek osotiotab chito age.

³ Ak ngo wech inendet manong’otiot ne bo let, ak kosirji siretab besiet, ak konde eunnyi, yeityo koon eng’ gonnyi, anan ngo me manong’otiot ne bo let, ne kiitun inendet;

⁴ ko mat komut manong’otiondennyi ni ki bo tai, ne kionei inendet, kole koek osotiondennyi kogeny, ko kagong’wanit; amu wegot noto eng’ taitab Jehovah: amat igochi emet koyai tengek, ne konin Jehovah Kamuktaindeng’ung’ koek borotet.

⁵ Ye kagotunis chito, ko mat kwo luget, anan kiim eng’ boit age tugul: kotebi eng’ ga kenyit agenge, si kobiit kobaibai osotiondennyi ne kogotun.

⁶ Amat koib chi koitab bai anan isiet kobunji kaarorunet: amu ngo nam ko u noto ko kabunji kaarorunonoto sobondab chi.

⁷ Ngenyor chi ne kachor tupchennyi age ne bo lagokab Israel, ak koyachi ko u otwogin, anan koalda, ingome anyun chorindonoto: iste ko u noto anyun yaitiet eng’ kwenung’ung’.

⁸ Ripge eng’ koroitab mogondosik, rib komie eng’ kagiiletab ge, ak iyai ko u tugul che inetin tisiik Lawik: ko u ye kiang’at ichek, orib anyun si oyai ko u noto.

⁹ Ibwat kit ne kiita Jehovah Kamuktaindeng’ung’ Miriam, eng’ oret ye kiomong’u eng’ Misri.

¹⁰ Ye ibesendochi chitab kokweng’ung’ kiy age tugul, ko mat iwe gonnyi inemu kit ne iname besendo.

¹¹ Tonone sang’, inye ne iyaaksei, si koibun konyo sang’ kit ne iname besendo.

¹² Ak ngo kibanania chichoto, komat iru itinye kinnyi ne iname besendo:

¹³ iweekyi kinnyi ko karorokto asista, si kobiit kotugegei ye ruei ak koberurin: ak koek noto imanda eng’ inye eng’ taitab Jehovah Kamuktaindeng’ung’.

¹⁴ Amesastae otwogindet ne nyoru melekto ne kibanania ne nyalili, ngo age eng’ che otupche, anan ngo bo bunotik che mi emeng’ung’ eng’ kurgotiguk:

¹⁵ igochi inendet melektanyi eng’ betunnyi ne bo melekto; ameng’ kororokto asista kotom igochi; amu kibanania, ak imang’u choto: si marirji Jehovah agobo inye, ak koek tengekto eng’ inye.

¹⁶ Magibarei kwanisiek amu lagok, anan kebar lagok amu kwanisiek: kibarei chi age tugul inegei agobo tengektanyi.

¹⁷ Amemaas kiruogetab toondet, anan ne matinyei kwanda; anan iname besendo ngorietab mosoget:

¹⁸ ago ibwat ile ki i otwogin eng’ Misri, kiitiachin Jehovah Kamuktaindeng’ung’ eng’ oloto: kang’atin anyun amu noto ale iyai kiito.

¹⁹ Ye igesisie eng’ mbareng’ung’, ak iutie ratutikab bek eng’ mbar, ko mat iweege iwe iibu: ingobunji toondet, ak ne matinyei kwanda, ak mosoget: si kobiit koberurin Jehovah Kamuktaindeng’ung’ eng’ tuguk tugul che iname eung’ung’.

²⁰ Ye itui logoekab emitiguk ko megetyinotegei iturote eng’ temenik: ingobunji toondet, ak ne matinyei kwanda, ak mosoget.

²¹ Ye ibute logoekab mbareng’ung’ ne bo sabibuk, ko megetyigei iturote: ingobunji toondet, ak ne matinyei kwanda, ak mosoget.

²² Ak ibwat ile ki i otwogindet eng’ emetab Misri: kang’atin anyun eng’ noto ale iyai ng’olyondonito.