NG'ATUTIK 23 - BUKUIT NE TILIL

Ng’atutik che terotin

¹ Amat komanda ole mi tuiyetab Jehovah chito ne kigitui kitit, anan ne kigitil taritiennyi.

² Amat komanda ole mi tuiyetab Jehovah chito ne bo sarbuch; amat komanda tuiyetab Jehovah agoi ibinda ne bo taman.

³ Amat komanda ole mi tuiyetab Jehovah Amonindet anan Moabindet; amat komanda ole mi tuiyetab Jehovah agot eng’ ibinda ne bo taman eng’ tilionutikwak agoi koigeny:

⁴ amu kima torogunenok makatinik ak beek ye kiomong’une Misri; amu kial Balaam weritab Beor konyo eng’ Petor ne mi Mesopotamia konyo kochupten.

⁵ Ago kima kasyi Jehovah Kamuktaindeng’ung’ Balaam; ago kiiweech Jehovah Kamuktiandeng’ung’ chubisiet koek kaberuret, amu kichamin Jehovah Kamuktaindeng’ung’.

⁶ Amat icheng’ kalyenywa anan borotenywa eng’ betusieguk tugul koigeny.

⁷ Amewech Edomindet; amu ng’etab kamet: amewech Misrindet; amu ki i toondet eng’ emennyi.

⁸ Ingomanda ole mi tuiyetab Jehovah lagokwak che sichei eng’ ibinda ne bo somok.

⁹ Ye kebokte nganaset obarge ak buniguk, iribege anyun yaitiet age tugul.

¹⁰ Ngo mi chi age tugul eng’ okwek ne ng’wan amu noto konyor kemoi, komanda anyun sang’utab nganaset, amat konyo nganaset orit:

¹¹ ago ingoungei koskoleny, ak ye kagororokta asista konyo nganaset orit.

¹² Nyolu agine itinye ole imasyini eng’ sang’utab nganaset:

¹³ ak mie itinye kit ne u mogombet koboto kariguk; si ye imache imaste, ibale ole imasyini, ak ye kaigesu itub:

¹⁴ amu wendote Jehovah Kamuktaindeng’ung’ kwenutab nganaseng’ung’, kosorun, ak koon buniguk eng’ taing’ung’; ingotililit anyun nganaseng’ung’ amu noto: si mageerjin kiy ne ma tilil, eng’ inye, ak koweek kometen.

¹⁵ Amat iweekyi otwogindet kiptaiyandennyi ne kimweune:

¹⁶ ingomeny koboten, eng’ kwenung’ung’, eng’ ole leweni eng’ age ne bo kurgotiguk ole machei: amat ius.

¹⁷ Amat kobiit chepkugonio eng’ tibikab Israel, anan ne isubi biteetab Sodomik eng’ werikab Israel.

¹⁸ Ameibu melektab chepkugoniot, anan che kiale seset kobwa gotab Jehovah Kamuktaindeng’ung’ eng’ kaarorunet age tugul: amu wechei Jehovah Kamuktaindeng’ung’ choto tuwai.

¹⁹ Amebesendochi tupcheng’ung’ ile tun inyorune keljinet; besendab siling’isiek, besendab amitwogik, anan besendab kiy age tugul ne kibesendoi si kenyorune keljinet.

²⁰ Imuchi ibesendochi bunotyot si tun inyorune keljinet; ago mebesendochi ne otupche ile tun inyorune keljinet: si koberurin Jehovah Kamuktaindeng’ung’ eng’ tuguk tugul che iyae eng’ eung’ung’, eng’ emet ne iwendi iname.

²¹ Ye iarorji Jehovah Kamuktaindeng’ung’ kaarorunet, ko mat igaegei: amu magenen Jehovah Kamuktaindeng’ung’ kioto iman; si maek tengekto eng’ inye.

²² Ago ngo ma iarorji kiy, ko maegu tengek eng’ inye.

²³ Rib iyai ne kemwa eng’ kuting’ung’; ko u ye kiarorji Jehovah Kamuktaindeng’ung’, kagochinetab chamnyet, ne kaiaroru eng’ kuting’ung’.

²⁴ Ye iwe mbaretab sabibuk ne bo chitab kokweng’ung’, iam anyun logoek agoi ibiye ko u ye imache; ago amat inde king’ung’.

²⁵ Ye iwe mbaretab chitab kokweng’ung’ ne mi bek, imuchi ibach bek; ago amenamji chepkeswet ile iges bekab chitab kokweng’ung’.