NG'ATUTIK 22 - BUKUIT NE TILIL

Ng’atutik che terotin

¹ Ama, ye igeer tetab ne otupche anan kechiriennyi kobetoti, iung’egei: kwerichi iman ne otupche.

² Ak ngo manegitenen ne otupche, anan ngo mengen inendet, igetu anyun konyo gong’ung’, ak kotebe oldang’ung’ agoi kocheng’an ne otupche, ak iweekyi.

³ Ak iyai ko u noto eng’ sigiriennyi; ak iyai ko u noto eng’ ngoriennyi; yai ko u noto anyun eng’ kiy age tugul ne kabet ne bo tupcheng’ung’, ne kabetyi, ago kainyoru: ameuny ge.

⁴ Ama, ye igeer sigirietab tupcheng’ung’ anan tennyi ne kagobut eng’ oret taban, iung’egei: kanyol itoret kong’eet.

⁵ Amat kolaach kobogoriondo che bo murenik, anan kolaach mureno ngoriet ne bo kobogorio: amu age tugul ne yaei tuguchuto, ko wegot eng’ Jehovah Kamuktaindeng’ung’.

⁶ Ngigeer keswetab taritiet eng’ oret, eng’ ket age tugul anan eng’ ng’ony, komi arek anan koik, kosiebei kamet arek, anan koik, ko mat iib kamet koboto arek:

⁷ kanyol iunde kamet kwo, ago imuchi iipchigei arek; si komieit eng’ inye, ak kochang’a betusieguk.

⁸ Ye iteech got ne leel, itegel got barak iyiem kotuiyo, si meipchi gong’ung’ korotik, ngo chirkwin chi eng’ oloto.

⁹ Ameminji mbareng’ung’ ne bo sabibuk keswek che bo ortinwek aeng’ che terotin: si ma kiistoenen tugul, keswek che kiigol, ak ruratetab mbareng’ung’ ne bo sabibuk.

¹⁰ Ameratyine eito ak sigiriet ye ibati mbaret.

¹¹ Amelaach ngoriet ne kigiburuch kororikab kechirek ak katanit.

¹² Napchi sawoinik ngorieng’ung’ ne itugegei, eng’ tabanwekyik ang’wan.

Ng’atutik agobo ribetab ge

¹³ Ngotun chi osotiot, ak kwo ole mi, ak kowech,

¹⁴ ak komwaita ng’alekab tewernatet agobo inendet, ak kotaam eng’ ng’alek che yaach, kole, Kiatun osotiondoni, ak ye kingarikyi, ko mageerji tuguk che iboru bergeinatet:

¹⁵ koipchi anyun kwandab cheboto ak kamet boisiek eng’ ormarichetab nganaset tuguk che iboru bergeinatetab cheboto:

¹⁶ yeityo kolenji kwanitab cheboto boisiek. Kiagochi murenoni cheptanyu kotun, ago kowech; ma cham;

¹⁷ ogeero, kigotewer, kole, Mageerji cheptang’ung’ tuguk che iboru bergeinatet; ago chu tuguk che iboru bergeinatetab cheptanyu. Yeityo koito ngoriet eng’ taitab boisiekab nganaset.

¹⁸ Konam anyun boisiekab nganasanato murenonoto kotigon;

¹⁹ ak komage inendet sekelisiek bogol che bo feda, si kogochi kwandab cheboto, amu kiitaam eng’ ng’alek che yaach bergeiyat ne bo Israel: ak egu osotiondennyi: maimuchi kobagakta eng’ betusiekyik tugul.

²⁰ Ago ngo bo iman ng’olyondonito, kele ma kinyorji cheboto tuguk che iboru bergeinatet:

²¹ kimut anyun cheboto agoi kurgetab gotab kwandanyi, ak kolage inendet koik murenikab nganasennyi kot kome: amu kiyai abusnatet eng’ Israel, amu kiyai kugoinatet eng’ gotab kwandanyi: iste anyun ko u noto yaitiet eng’ kwenung’ung’.

²² Nginyoru chi ne ibegei ak kwondo ne kigitunji chito age, kebarei tuwai, chichoto koboto kwonyoto; iste anyun ko u noto yaitiet eng’ Israel.

²³ Ngo mi chepto ne bergeiyat ne kigeyachi koito, ak konyorji chi nganaset ak koruiyo ak inendet;

²⁴ omutu tuwai kobwa kurgetab nganaset, ak olage koik kobek: cheboto, amu ma waach, ago kimi nganaset: ak murenonoto, amu kagotewer osotiotab chitab kokwennyi: iste anyun ko u noto yaitiet eng’ kwenung’ung’.

²⁵ Ago ngo nyor mureno chepto eng’ timin, noto kigeyachi koito, ak kosuub, koipgei; kebarei murenonoto inegei:

²⁶ ago meite kiy cheboto; matinyei cheboto tengekto ne nyoljin meet: amu u chito ne kang’eetyi chitab kokwennyi ak kobar, u noto agine ng’olyondonito:

²⁷ amu kinyorji timin; ak kiwaach cheboto kiga keyachi koito, ama biit chi ne kisor.

²⁸ Ngonyor mureno chepto ne bergeiyat, ne tom kigochi chi, ak kosuub, ak koruiyo tuwai, ak ngenyor;

²⁹ ingogochi murenonoto karuiyo tuwai kwandab cheboto sekelisiek konom che bo feda, ak koek osotiondennyi, amu koitewer; maimuchi kobagakta agoi.

³⁰ Amat konam chi osotiotab kwandanyi, anan kong’any ach ngoritab kwandanyi.