NG'ATUTIK 21 - BUKUIT NE TILIL

Tisisiet agobo chi ne kigibar ama nai chi

¹ Ngo biit musto eng’ timin ne kigibarei eng’ emet ne konin Jehovah Kamuktaindeng’ung’ kobunjin, ama kinai ne kibarei;

² komanda anyun boisieguk ak kiruogiguk, ak kokwa agoi nganasok che mi komoswek tugul kong’eete ole mi musto:

³ ingokweri boisiekab nganaset ne negite musto, roriat ne bunu akwet ne tomo kobois, ne tomo keratyi chogit;

⁴ ingokweri boisiekab nganasanato roriandanato kwo atebwet ne roote beek, ne tomo kibat, anan kegol, ak koiiny kaatitab roriandanato eng’ atebwonoto:

⁵ yeityo korikta yoto tisiik werikab Lawi; amu choto che kilewen Jehovah Kamuktaindeng’ung’ koboisiechi ak koberuris eng’ kainetab Jehovah; ak tebyei ko u ng’olyondenywa kit age tugul ne kagimoitos ak biret age tugul:

⁶ yeityo koun eunekwak boisiek tugul che bo nganasanato negite musto, eng’ baragutab roriandanato kagiiny kaatit eng’ atebwet.

⁷ Ak kowol kole, Ma tumda eunekyok korotichu, ama keer konyekyok.

⁸ Ee Jehovah, nyochi kaat biguk Israel, che kiitiach, amengotebe kwenutab biguk Israel korotik che matinyei tengek. Ak kobiit nyoetab kaat amu tengektab korotik.

⁹ Iste ko u noto anyun korotik che matinyei tengek eng’ kwenung’ung’, ye keyai ne nyolu eng’ taitab Jehovah.

Katunisiet agobo tibik che luulenik

¹⁰ Ye kewe kobarge ak buniguk, ak konde euneguk Jehovah Kamuktaindeng’ung’, ak imut koek luulenik,

¹¹ ak ngigeer eng’ kwenutab luulenichoto kwondo ne kararan, ak imach inendet, imutyigei koek osotiondeng’ung’;

¹² imut anyun kwo gong’ung’; ak konem metinnyi, ak korar siokyik;

¹³ ak kolakta ngoroik che kigiluuldoi, kotebe gong’ung’ anyun, korirji kwandanyi ak kamet arawet agenge komugul: ak ye ibata noto iwe ole mi iegu manong’otiondennyi, ak koek inendet osotiondeng’ung’.

¹⁴ Ak ngo mecham inendet, iunde kwo, ole machei; ago amat ialde eng’ siling’isiek, ameyachi ko u ye iyachini otwogindet, amu koinyere inendet.

¹⁵ Ngo tinyei chi osotik aeng’, ngo chamanet age, ko chepkinyariat age, ak kigosikyi lagok tuwai, chamanet ak chepkinyariat; ak ngo kiisib kosich chepkinyariat werit;

¹⁶ ko eng’ betut ne pchechin chichoto werikyik tugukyik, ko mat kogochi koeet weritab chamanet kosiir weroto o kisichei chepkinyariat:

¹⁷ ago iyani kole, werit ne o, weritab chepkinyariat, ye igochin inendet kebeberwek aeng’ eng’ tugul che tinyei: amu inendet taunetab kimnatennyi chechik tuguk che nyoljin werit ne o.

Biretab werit ne ngeleliot

¹⁸ Ngotinyei chi werit ne uui met ak ko ngelelio, ne magase it kutitab kwandanyi, anan kamet, agot ngotigon ko magase it;

¹⁹ konam anyun kwandanyi ak kamennyi, ak komutyi boisiekab nganasennyi, agoi ormarichetab oldanyi;

²⁰ kolenji boisiekab nganasennyi, Uui met werinnyo ak ko ngelelio magasech it: kipkeiya, ak ko kibogitio.

²¹ Ak kolage koik murenik tugul che bo nganasennyi, agoi kome: iste anyun yaitiet ko u noto eng’ kwenung’ung’; ak kogas Israel tugul, ak koiywei.

²² Ak ngo yai chi tengekto ne nyoljin meet, ak kebar, ak isonginin eng’ ketit;

²³ ko mat kotebe musto ketit barak agoi koeech, ago kanyol itub eng’ betunoto; amu chubot eng’ Kamuktaindet ne kigartati; si meng’wanit inye emeng’ung’ ne konin Jehovah Kamuktaindeng’ung’ koek borotet.