NG'ATUTIK 20 - BUKUIT NE TILIL

Ng’atutik agobo lugosiek

¹ Ye iwe obarge ak buniguk, ak iro mbartanyisiek, ak karisiek, ak bik che chang’ kosiirok, ko mat iywei: amu mi Jehovah Kamuktaindeng’ung’ koboten, ne kiimutun imong’u eng’ emetab Misri.

² Ak ye iit ole mi luget, korik anyun tisiindet ak kong’alalji bik,

³ ak kolenji ichek, Ogaso, ee Israel, korikyi rani luget obarge ak bounikwok: amogochi mugulelwekwok kotanuiso; amoiywei anan orukrugense, among’ komuok bichoto;

⁴ amu wendi kobotok Jehovah Kamuktaindeng’wong’, koyai boriet agobo okwek, eng’ bunikwok, kosoruok:

⁵ yeityo kong’alalji bik kandoik, kolenji, Ng’o ne kateech got ne leel, ama igochi Kamuktaindet? Ingoweek kwo gonnyi, si mame eng’ boriet, ak kogochi chito age Kamuktaindet gonnyi.

⁶ Ng’o ne kimin mbaretab sabibuk, ak tomo kobut logoekyik? Ingoweek kwo gonnyi, si mame eng’ boriet, ak koboisie chito age logoekyik?

⁷ Ng’o ne kigigochi chepto, ak tom kotun? Ingoweek kwo gonnyi, si mame eng’ boriet, ak kotun age cheboto.

⁸ Ingong’alalji kandoik bik kogeny kolenji, Ng’o ne nyogor ne machei kotanui? Ingoweek kwo gonnyi, si machootyo mugulelwekab tupchosiekyik ko u nenyi.

⁹ Ak ye kagoges kandoik ng’alekwak eng’ bik, konde anyun kandoichoto, kiptainikab lugosiek kondochi bik.

¹⁰ Ye irikyi nganaset ne obarege, iteebe kalyet korok.

¹¹ Ak ngo wolun kalyet, ak koyatun, koegu anyun bik tugul che bo nganasanato otwogiguk ak kootin.

¹² Ak ngo macham koyai kalyet koboten, ago komach koyai luget koboten, iyiem anyun nganasanato:

¹³ ak ye kagondeun Jehovah Kamuktaindeng’ung’ nganasanato euneguk, ibar muren age tugul ne mi oloto eng’ rotwetab chok:

¹⁴ ago luul kobunjin gotab kor, ak lagok, ak tuga, ak tugul che mi nganaset, ak tuguk tugul che mi oloto; ak iam tugukab buniguk che kagonin Jehovah Kamuktaindeng’ung’.

¹⁵ Yachi ko u noto nganasok tugul che looen mising’ eng’ inye, che ma nganasokab bororiosiechu.

¹⁶ Ago eng’ nganasok che bo bororiosiechu che konin Jehovah Kamuktaindeng’ung’ koek borotet, ko meunde kiy age tugul ne mi yoto kosob:

¹⁷ ago iwong’u kot ko mang’et; Hitik, Amorik, Kananik, Perisik, Hibik, ak Jebusik; ko u ye kigong’atin Jehovah Kamuktaindeng’ung’:

¹⁸ si mainetin isub iyai tugukwak tugul che kiwechei, che kigoyachi kanamonikwak; ngo yai ko u noto ko kochalwogenji Jehovah Kamuktaindeng’wong’.

¹⁹ Ye kaiyiem nganaset betusiek che chang’, imache ibar iluul, ko mat ieb katikyik ing’em; amu imuchi iam che bo ketichoto; ameluul anyun; amu tos chi ketitab timin, ne tos iyiem?

²⁰ Kobate ketik che ingen ile magiamei, iluul anyun ketichoto, ing’em; ing’ote irimet nganasanato obaregei, agoi kolul.