NG'ATUTIK 2 - BUKUIT NE TILIL

Tetunetab ng’alek agobo banda agoi koterteri Amorik

¹ Kigiweege anyun, kenam bandanyo kebe ong’atet eng’ oret ne wendi Nyanjet ne Birir, ko u ye kimwawa Jehovah: ak kigimuut tulwetab Seir betusiek che chang’.

² Ak kimwawa Jehovah, kole,

³ Kogoyam betusiek che kiomuut tulwoni; oweege oba murot ne bo katam.

⁴ Ak ing’at bik, ilenji, Kanyol obun kiwotetab tupchosiekwok lagokab Esau, che menyei Seir; ak iyweok: oripge mising’ anyun:

⁵ amomoiye kiy ak icheget; amu magonok emenywa, agot ne yamei kotiech keldo: amu kiagochi Esau tulwetab Seir kobunji.

⁶ Oale icheget amitwogik eng’ feda, si oam; ak oale kogeny icheget beek eng’ feda, si oee.

⁷ Amu kigoberurin Jehovah Kamuktaindeng’ung’ eng’ boisiet tugul ne bo euneguk: kigonai bandang’ung’ eng’ ong’atani o: kimi koboten Jehovah Kamuktaindeng’ung’ eng’ kenyisiechu artam; ma rarun kiy.

⁸ Kigirob anyun kiwotetab tupchosiekyok lagokab Esau, che menyei Seir, kebun oretab Araba kebun Elat ak Esiongeber. Ak kigiweege kebun oretab ong’atetab Moab.

⁹ Ak kilenja Jehovah, Ameiim Moab, anan iborie icheget eng’ luget: amu magonin emennyi kobunjin; amu kiagochi lagokab Lot emetab Ar kobunji.

¹⁰ (Kimenyei Emik oloto keny, bik che kimen, ak ko chang’, ago ko koen, ko u Anagik:

¹¹ kiiti icheget kele Repaik, ko u Anagik: ago kuure Moabik ichek Emik.

¹² Ak kimenyei Horik agichek keny Seir, ago kiisubu lagokab Esau bichoto; ak kibar koisto eng’ tainywa, ak komeny oloto kogeer ichek; ko u ye kiyai Israelik eng’ emenywa ne kiigochi Jehovah.)

¹³ Ong’eetye anyun, olandae kererutab Sered. Ak kigilandae anyun kererunoto bo Sered.

¹⁴ Ak koboch ngab keng’eetye eng’ Kades-barnea, agoi kelandae kererutab Sered, ko ki kenyisiek sosom ak sisiit; agoi kogesgei ibinda tugul ne bo murenikab luget, eng’ nganaset, ko u ye kiiyosichei Jehovah.

¹⁵ Ak kigirindoi ichek eutab Jehovah si kobar ichek eng’ nganaset kot kogesgei.

¹⁶ Ak kingo kagobek bik tugul che bo luget kowong’gei,

¹⁷ kolenji Jehovah,

¹⁸ Isiirtoe rani Ar, kiwotetab Moab:

¹⁹ ak ye irikte ole negite lagokab Amonik, ko meiim anan omoiye kiy ak bichoto: amu magonin emetab lagokab Amonik kobunjin: amu kiagochi lagokab Lot kobunji.

²⁰ (Kiiti kele bo emonoto agine Repaik: kimenyei Repaik keny oloto; ago kuure Amonik bichoto Samsumik;

²¹ bik che eechen, ak ko chang’, ak ko koen, ko u Anagik, ago kibar Jehovah ichek eng’ tainywa; ak kibwa yoto, ak komeny kogeer ichek;

²² ko u ye kiyachi lagokab Esau, che kimenyei Seir, ye kingobar Horik eng’ tainywa: ak kibwa ichek komeny oloto, kogeer bichoto, agoi ra.

²³ Ak kibwa Kaptorik che kibunu Kaptor kobwa kobar Abik che kimenyei kestonik agoi Gasa, ak komeny oloto kogeer ichek.)

²⁴ Ong’eetye anyun, onam bandang’wong’, olandae atebwetab Arnon: ogeero, kande eung’ung’ Sihon Amorindet laitoriatab Hesbon, koboto emennyi: itau anyun inam kobunjin, ak iyai luget ak inendet.

²⁵ Atau ra agochini koiywein ak koarogenso agobo inye, bik che mitei kureret tugul ne bo kipsengwet komugul, che ta kogasei ng’aleguk, ak kobotanso; ak konyor ng’wanindo amu inye.

²⁶ Ak kiayokte bik koba eng’ ong’atetab Kedemot koba oldab Sihon laitoriatab Hesbon koib ng’alek che bo kalyet, kolenji,

²⁷ Chamwa abun emeng’ung’: abune oret ne o kityo, mamastoi eutab tai anan eutab katam.

²⁸ Kona amitwogik che aame aal, ak aal beek che ae: chamwa kityo awo asiirto;

²⁹ ko u ye kichamwa lagokab Esau che menyei Seir, ak Moabik che menyei Ar; agoi alandae Jordan awa emet ne konech Jehovah Kamuktaindennyo.

³⁰ Ago ma chamwech Sihon laitoriatab Hesbon kebun oldanyi: amu kiiuuiit tamirmiriennyi Jehovah Kamuktaindeng’ung’, kot ko ma chamdagei, si kondeun inendet eung’ung’ ko u rani.

³¹ Ak kilenja Jehovah, Ogeero, katau anyun ande taing’ung’ Sihon ak emennyi: tau anyun nam si inyaban emennyi.

³² Ak kimong’jech anyun Sihon, inendet ak bikyik tugul, kobwa koyai luget eng’ Jahas.

³³ Ak kigon Jehovah Kamuktaindennyo inendet eng’ tainnyo; ak kigibar inendet ak werikyik, ak bikyik tugul.

³⁴ Ak kiginam nganasokyik tugul eng’ betunoto, kiging’em nganaset age tugul ne kigimenyei, koboto kobogorisiek ak lagok; ma kimete agot agenge ne king’et:

³⁵ ago kigiluul tuga kobunjech, koboto tuguk che kimi nganasok, che kiga kenam.

³⁶ Koboch Aroer, ne mi tabandab atebwetab Arnon, ak nganaset ne mi atebwet, agoi Gilead, ma biit nganaset ne kigimit kosiirech: kigon Jehovah Kamuktaindennyo tugul eng’ tainnyo:

³⁷ kobate emetab lagokab Amonik ne kima irikyi; komoswek tugul che bo ainetab Jabok, ak nganasok che bo emetab tulonok, ak oldo tugul ne kietenech Jehovah Kamuktaindennyo.