NG'ATUTIK 19 - BUKUIT NE TILIL

Nganasok che kimwechin

¹ Ye kaisto Jehovah bororiosiek, ne nenywa emet ne konin Jehovah Kamuktaindeng’ung’, ak inam emenywa, ak imeny nganasokwak, ak gorikwak;

² itabanjigei nganasok somok eng’ kwenutab emeng’ung’ ne konin Jehovah Kamuktaindeng’ung’ kobunjin.

³ Chopchigei oret ak ipche kiwotosiekab emeng’ung’, ne konin Jehovah Kamuktaindeng’ung’ kobunjin, koek kebeberwek somok, si komuch komwechi chi age tugul ne karumis.

⁴ Ni ng’olyotab chito ne karumis, ne kamwechi oloto si kosob: inendet ne kabar chitab kokwennyi ama nai, ne kima kowechei inendet eng’ betusiek che kigosiirto;

⁵ ko u ye kawa chito timdo koeb ketit koboto chitab kokwennyi, ak ye kasut aiywet komachei koeb ketit, ak kochun aiywet eng’ kungit, ak kochililji aiywet chitab kokwennyi, ak kome; ingomwechi anyun age eng’ nganasochoto si kosob:

⁶ si mata kosub ne igeeri korotik rumindet, kota kolaldos neregekyik, ak konam, amu loo oret, ak kokwer kome; ago kima konyoljin meet amu kima kowechei inendet eng’ tai.

⁷ Kang’atin anyun amu noto, ale, Itabanjigei nganasok somok.

⁸ Ak ngobaraun Jehovah Kamuktaindeng’ung’ kiwoteng’ung’, ko u ye kigoyosiechi kwanisieguk, ak kogonin emet komugul ne kiiarorji kwanisieguk kole igochin;

⁹ ngirib ng’atutioni komugul, ne kang’atin rani ak iyai, icham Jehovah Kamuktaindeng’ung’, ak iwendote ortinwekyik kotugul; ites anyun nganasok alak somok, koboto choto somok:

¹⁰ si ma kitumda korotik che matinyei tengek eng’ emeng’ung’ ne konin Jehovah Kamuktaindeng’ung’ koek borotet, si manamin korotichoto.

¹¹ Ago ngo wech chi chitab kokwennyi, ak kosapchi, ak kong’eetyi kokwer kome; ak komwechi nganaset age eng’ chuto:

¹² koyokto anyun boisiek che bo nganasennyi kimut eng’ oloto kamwechi, nyo konde eutab ne yaaktoi korotik, si kobar.

¹³ Ama, ye igeer, irire, ago iste korotik che matinyei tengek eng’ Israel, si komieit eng’ inye.

Birutik agobo kenisiet ak baornatetab lembech

¹⁴ Amenaktae kiwotetab chitab kokweng’ung’, ne kiindoi bik che bo keny, eng’ boroteng’ung’ ne inyabani, eng’ emet ne konin Jehovah Kamuktaindeng’ung’ kobunjin.

¹⁵ Amat kobaorianji chi baoriat agenge eng’ tengek age tugul, anan eng’ chalwok age tugul, eng’ lelut age tugul ne kayai: kigimiti ng’olyot eng’ ng’alekab baorinik aeng’ anan ko somok.

¹⁶ Ngo ng’eet baoriat ne ma bo iman kobaorianji chi age tugul agobo yaitiet;

¹⁷ ingotononso anyun ichek tuwai, choto ibelegei, eng’ taitab Jehovah, eng’ taitab tisiik ak kiruogik che mi eng’ betusiechoto;

¹⁸ ak kogin kiruogik kogiiljigei: ak, ngo ma bo iman baoriat, ak kabaorianji ne tupcho eng’ lembech;

¹⁹ oyachi anyun, ko u ye kata machei koyachi ne tupcho: iste ko u noto anyun yaitiet eng’ kwenung’ung’.

²⁰ Ak kogas che kong’et, ak koiyweis, si mata koyai yaitiet ne u noto eng’ kwenung’ung’ kogeny.

²¹ Ama, ye igeer, irire; kigeere sobondo sobondo, konda eng’ konda, keldet eng’ keldet, eut eng’ eut, keldo eng’ keldo.