NG'ATUTIK 18 - BUKUIT NE TILIL

Tuguk che kigochin tisiik ak Lawik

¹ Manyoru kebeberta anan borotet koboto Israel tisiik Lawik, oret komugul ne bo Lawi: amei kagochinoikab Jehovah che bunei mat kigochin, ak borotennyi.

² Ak manyoru borotet eng’ tupchosiekwak: borotenywa Jehovah, ko u ye kimwachi.

³ Egu ni melektab tisiik che konu bik, eng’ ichek che igoitoi tiseiywek, ngo eito anan kechir, ingogochi tisiindet kusto, ak tagilgilik tuwai, ak moet.

⁴ Tongoanikab beguk, divaiguk, ak mwaniguk, ak kororik che bo tai che bo kechireguk, igochi inendet choto.

⁵ Amu kalewen Jehovah Kamuktaindeng’ung’ inendet eng’ ortinweguk tugul, kotonon si kobois eng’ kainetab Jehovah, inendet ak werikyik koigeny.

⁶ Ak ngo bun Lawindet kurgotiguk alak tugul eng’ Israel tugul, ole menyei, ak konyo eng’ chamnyennyi tugul ne bo sobondanyi ole leweni Jehovah;

⁷ ingobois anyun eng’ kainetab Jehovah Kamuktaindennyi, ko u ye yaei tupchosiekyik tugul, Lawik che tonondos eng’ oloto eng’ taitab Jehovah.

⁸ Ingoam kebeberwek che aechin, koboto che nyorune aldaetab tuguk che bo kwandanyi.

Atebetab maotiot ak boisiennyi

⁹ Ye kaiit emet ne konin Jehovah Kamuktaindeng’ung’, ko menetgei iyai tuguchoto yaachen yaei bororiosiechoto.

¹⁰ Amat kobiit eng’ okwek ne igoitoi werinnyi anan cheptanyi kobun mat, anan ne boisie ng’orset, anan kipsogeiyot, anan ne isogisiei, anan bonindet,

¹¹ anan ne abusisiei, anan ne ng’alali ak oik, anan bonindet, anan ne ng’alali ak che kigobek.

¹² Amu wechei Jehovah chi age tugul ne yaei tuguchu: onei Jehovah Kamuktaindeng’ung’ ichek eng’ taing’ung’ amu tuguchu wechei.

¹³ Egu ne igesunotgei eng’ Jehovah Kamuktaindeng’ung’.

¹⁴ Amu bororiosiechu tun iluule, koyani che boisie sogeinotet, ak che ng’orsei: ago ma chamun inye Jehovah Kamuktaindeng’ung’ iyai choto.

¹⁵ Tun ing’eetun Jehovah Kamuktaindeng’ung’ maotiot eng’ che otupche, eng’ kwenung’ung’, ne u ane; ogas it inendet;

¹⁶ ko u tugul che kiimach eng’ Jehovah Kamuktaindeng’ung’ eng’ betutab tuiyet eng’ Horeb, ile, Amat kota agas kogeny kutitab Jehovah Kamuktaindennyu, anan kota ageer mai o kogeny, si mamei.

¹⁷ Ak kilenja Jehovah, Kamwa komie choto kamwa.

¹⁸ Ang’eetyini maotiot eng’ tupchosiekwak, ne u inye; ak ande ng’alekyuk kutinnyin, ak komwachi ichek tugul che ang’ate inendet.

¹⁹ Ak age tugul ne mamachei kogas ng’alekyuk che tun mwaei eng’ kainennyu, ko tun ateebe inendet.

²⁰ Ago maotiot ne mwaei ng’olyo eng’ losetab ge eng’ kainennyu, ne ma ang’at inendet komwa, anan ne ng’alali eng’ kainaikab cheptalelisiek, komei maotiondonoto.

²¹ Ak ngile eng’ muguleldang’ung’, Kinae nee ng’olyot ne ma mwa Jehovah?

²² Ye kang’alal maotiot eng’ kainetab Jehovah, ngo mayaak kioto, anan kosulda, ko noto ne ma mwa Jehovah: kimwa maotiot eng’ losetab ge amat iywei inendet.