NG'ATUTIK 17 - BUKUIT NE TILIL

¹ Ameeng’ji Jehovah Kamuktaindeng’ung’ eito, anan kechiriet, ne tinyei berut, anan kiy age tugul ne ya: amu wechei noto Jehovah Kamuktaindeng’ung’.

Ng’alek agobo saetab konamonik

² Ngo biitune kwenung’ung’, eng’ kurgotiguk alak tugul che konin Jehovah Kamuktaindeng’ung’, ne muren, anan kwondo, ne yaei ne ya eng’ taitab Jehovah Kamuktaindeng’ung’ kobistoe arorutiennyi,

³ ak kwo koot kanamonik, kogutung’ji, anan asista, anan arawet, anan age tugul ne bo chang’indab kipsengwet, ne ma ang’at;

⁴ ak kemwaun, ak igas, isiach anyun eng’ kagiiletab ge, ak ngo bo iman noto, ak ko u noto kioto, kele, kiyaei ne te noto ne kiwechei eng’ Israel;

⁵ imutu anyun murenonoto anan kobogoriondonoto ne kayai kioto ya, konyo kurgotiguk, chichoto anan kobogoriondonoto; ak inyo ilach eng’ koik kot kome.

⁶ Kibarei chichoto eng’ ng’alekab baorinik aeng’ anan ko somok; magibarei eng’ baornatetab chito agenge.

⁷ Ingosib kolach baorinichoto kibarei, yeityo kolach bik tugul. Iste anyun ko u noto yaitiet eng’ kwenung’ung’.

Tilei ng’alek che biitu tisiik ak kiruogik

⁸ Ngo biit ng’olyot ne uui eng’ kiruoget ne temenen, ne bo korotik eng’ korotik, ak ng’olyot eng’ ng’olyot, ak biret eng’ biret, che kaek kabeletab ge eng’ kurgotiguk: ing’eet anyun, iwe ole leweni Jehovah Kamuktaindeng’ung’;

⁹ ak inyo ole mi tisiik Lawik, ak kiruogindet ne mi eng’ betusiechoto: ak iteeb; ak koborun ole teptoi kiruoget.

¹⁰ Si iyai anyun ko u ole teptoi ng’alekwak, che iborun eng’ komosta ne leweni Jehovah; si irib iyai ko u tugul che inetin:

¹¹ ko u ng’olyotab ng’atutiet ne inetin bichoto, ak ko u kiruoget ne mwaun, iyai ko u noto: amemaste eng’ kiruoget ne iborun, iwe eutab tai anan katam.

¹² Ak chito ne yaei eng’ losetab ge ne magasei ng’alekab tisiindet ne tononi koboisiei eng’ taitab Jehovah Kamuktaindeng’ung’, anan kiruogindet, komeei chichoto: ak iiste yaitiet eng’ Israel.

¹³ Ak kogas bik tugul, ak koiywei, si mata koyai eng’ losetab ge kogeny.

Keleweni laitoriat. Boisionikyik

¹⁴ Ye kaiit emet ne konin Jehovah Kamuktaindeng’ung’, ak inam kobunjin, ak imeny oloto; ak ile, Kande laitoriat koboiywa, ko u bororiosiek tugul che mi komoswekyuk;

¹⁵ inde anyun iman koek laitoriat koboun, inendet ne leweni Jehovah Kamuktaindeng’ung’: inde age eng’ tupchosieguk koek laitoriat ne boun: amat inde bunotyot ko boun, ne ma ne otupche.

¹⁶ Ago amat kotesyigei mbartanyisiek, anan kogochi bik koweektagei Misri, si kotes mbartanyisiek: amu kimwawok Jehovah kole, Amata oweektage oranato kogeny.

¹⁷ Amat kotes osotik, si magusgong’ muguleldanyi: anan kotesyigei feda ak tahabu che chang’.

¹⁸ Ak ye kagotebe ng’echeretab bororiennyi, kosirjigei ng’atutioni konde bukuit, kosub noto tinyei tisiik Lawik:

¹⁹ ak kotepto, ak kosoman kote kosobei: si konetgei koiywei Jehovah Kamuktaindennyi, korib ng’alek tugul che bo ng’atutioni ak konetisiosiechu, koyai:

²⁰ si meetgei eng’ muguleldanyi kosiir tupchosiekyik, ak komasta kometo ng’atutiet, kwo eutab tai anan ne bo katam: si kobiit kochang’a betusiekyik eng’ laitornatennyi, inendet ak lagokyik, eng’ kwenutab Israel.