NG'ATUTIK 16 - BUKUIT NE TILIL

Ng’atutik agobo igorwek

¹ Rib arawetab Abib, ak iyachi Jehovah Kamuktaindeng’ung’ paska: amu kiimoong’une Jehovah Kamuktaindeng’ung’ eng’ Misri kemoi eng’ arawetab Abib.

² Ak igochi Jehovah Kamuktaindeng’ung’ tiseiywot ne bo paska, eng’ kechirek ak eng’ tuga, eng’ ole leweni Jehovah kotebe kainennyi oloto.

³ Ameam makatinik che kiginde mermerek koboto paska, am eng’ betusiek tisab koboto makatinik che ma kinde mermerek, choto makatinikab nyalilda; amu kiimong’une emetab Misri eng’ kagirgiret: si ibwat betut ne kiimong’une emetab Misri kote isobe.

⁴ Amat kegeerjin mermerek eng’ komosweguk tugul eng’ betusiek tisab; amat koeekyi banyek che igoitoi koek kagochinet eng’ betut ne bo tai koskoleny.

⁵ Amat ieny che bo paska eng’ komosta age tugul ne bo kurgotiguk, ne konin Jehovah Kamuktaindeng’ung’;

⁶ ago eng’ ole leweni Jehovah Kamuktaindeng’ung’ kotebe kainennyi, ieny eng’ oloto che bo paska koskoleny, ye machei kororokto asista, eng’ betut ne kiimong’u eng’ Misri.

⁷ Ak iyo si iam eng’ ole leweni Jehovah Kamuktaindeng’ung’: ak iweege karon iwe ole mi emaisieguk.

⁸ Am betusiek lo makatinik che ma kinde mermerek: ak koek eng’ betutab tisab tuiyetab kaming’inetab ge eng’ Jehovah Kamuktaindeng’ung’; amat iyai boisio age tugul betunoto.

⁹ Iityigei wigisiek tisab: koboch betut ne ketau inam chepkesweng’ung’ iges bek, iit wigisiek tisab.

¹⁰ Ak iripchi Jehovah Kamuktaindeng’ung’ igorta ne bo wigisiek eng’ kagochinet ne kigoitoi eng’ chamnyet, ne igochini, che te che kiiberurun Jehovah Kamuktaindeng’ung’:

¹¹ ak ibaibaitu eng’ taitab Jehovah Kamuktaindeng’ung’, inye, ak wering’ung’, ak cheptang’ung’, ak otwogindeng’ung’ ne muren, ak otwogindeng’ung’ ne tie, ak Lawindet ne mi kurgotiguk, ak toondet, ak ne matinyei kwanda, ak mosoget, che mi koboten, eng’ ole leweni Jehovah Kamuktaindeng’ung’ kotebe kainennyi.

¹² Ak ibwat ile ki i otwogindet eng’ Misri: rib anyun konetisiosiechu ak iyai.

¹³ Iyae igortab keriosiek betusiek tisab, ye kaiyum tuguk che bunu ruanyung’ung’ ak che bunu ole kitue sabibuguk:

¹⁴ ak ibaibaitu eng’ igortang’ung’, inye, ak wering’ung’, ak cheptang’ung’, ak otwogeng’ung’ ne muren, ak otwogindeng’ung’ ne tie, ak Lawindet, ak toondet, ak ne matinyei kwanda, ak mosoget, che mi kurgotiguk.

¹⁵ Ripchi Jehovah Kamuktaindeng’ung’, igorta eng’ betusiek tisab eng’ ole leweni Jehovah: amu iberurun Jehovah Kamuktaindeng’ung’ tuguk tugul che inyoru, ak boisionik tugul che bo euneguk, ak ibaibaitu mising’.

¹⁶ Ingobwa mureniguk tugul taitab Jehovah Kamuktaindeng’ung’ konyil somok eng’ kenyit eng’ ole leweni inendet; eng’ igorta ne bo makatinik che ma kinde mermerek, ak eng’ igortab wigisiek, ak eng’ igortab keriosiek: amat kobwa taitab Jehovah ak eut buch:

¹⁷ ingogoito chi age tugul ko u ye imuchi, ne te kaberuretab Jehovah Kamuktaindeng’ung’ ne kigonin.

Ng’alek agobo kiruogik

¹⁸ Inde kiruogik ak bounik kurgotiguk tugul, che konin Jehovah Kamuktaindeng’ung’ ko u ortinweguk: si koruokyi bik eng’ kiruoget ne bo imanda.

¹⁹ Amemaas kiruoget: ametiytii bik: anan itaach che bo kagaigaet; amu kerei konyekab che ng’omen tuguk che bo kagaigaet, ak kogunuri ng’alekab che bo imanda.

²⁰ Isub che bo imanda kityo, si isob, ak inyaban emet ne konin Jehovah Kamuktaindeng’ung’.

²¹ Amat iminji ketit age tugul ne bo Asera ole negite kaptisisietab Jehovah Kamuktaindeng’ung’, ne tun iteekyinige.

²² Amat iteech toloita agine; ne wechei Jehovah Kamuktaindeng’ung’.